| 2012/4/19 21:56:00ཉེ་སྔར་མཚོ་སྔོན་མི་རིགས་དཔེ་སྐྲུན་ཁང་གིས་“བོད་ཀྱི་རྩོམ་རིག་དཔེ་ཚོགས་”ཤིག་བསྡུ་སྒྲིག་གནང་འཆར་ཡོད་པ་ལྟར། དེའི་ནང་དུ་གཡུང་དྲུང་བོན་ཕྱོགས་ཀྱི་ཡིག་ཆའང་བསྡུ་རྒྱུ་རེད། དེ་ཡང་དུས་རབས་ཉི་ཤུ་པའི་ལོ་རབས་བརྒྱད་ཅུ་པའི་སྔོན་གྱི་རྩོམ་ཡིན་དགོས་པ་མ་ཟད། རྩོམ་ལུགས་ལ་ཡང་བསྟོད་ཚིག སྙན་ངག མགུར་གླུ། ལྷུག་རྩོམ། སྒྲུང་གཏམ། ཟློས་གར། རྣམ་ཐར་རྟོགས་བརྗོད། བསླབ་བྱ་ལེགས་བཤད། གསོལ་འདེབས་སོགས་ཀྱི་ཡིག་ཆ་དགོས་པས། རྒྱ་ཆེ་བའི་གཡུང་དྲུང་བོན་གྲོགས་རྣམས་ཀྱིས་རྩོམ་རིག་གི་ཁྱད་བོན་འབུར་དུ་ཐོན་ཞིང་། བོད་གནའ་བོའི་རྩོམ་རྩལ་གྱི་དྲི་རླངས་འཐུལ་ཞིང་འཛམ་གླིང་རྩོམ་རིག་གི་དགའ་ཚལ་དུ་འགྲེམ་སྤེལ་བྱས་ཀྱང་ངོ་གནོང་མི་དགོས་པའི་རྒྱུ་ཆ་མཁོ་འདོན་དང་འོས་སྦྱོར་བྱ་རྒྱུ་ཐུགས་རྗེ་ཆེ།
གཞན་ཡང་དུས་རབས་བདུན་པའི་སྔོན་གྱི་ཡིག་ཆ་འམ་གནའ་རྩོམ་གྱི་ཁྱད་བོན་ལྡན་པའི་ཡིག་ཆ་ཡིན་ན་ལྷག་པར་དུ་བཟང་། རྒྱུ་མཚན་ཡང་རྒྱ་ཆེ་བའི་ཀློག་པ་པོ་ལ་གཡུང་དྲུང་བོན་གྱི་རྩོམ་རིག་གི་ཡིག་ཆ་མང་པོ་ངོ་སྤྲོད་བྱ་བའི་བརྒྱུད་བོད་ཀྱི་རྩོམ་རིག་གི་ལོ་རྒྱུས་གོང་མཐོར་འདེགས་དགོས་པ་སོགས་ཀྱི་དགེ་མཚན་ཆེན་པོ་ཡོད་པས་སོ།། དེས་བས་གཡུང་དྲུང་བོན་གྲོགས་རྣམས་ཀྱིས་བློ་གྲོས་ཀྱི་རྩལ་ཡོངས་སུ་སྤྲུགས་ནས་ལས་དོན་འདི་ལ་རྒྱབ་སྐྱོར་ཚད་མེད་གནང་བར་ཞུ་ཞུ།
རྩོམ་ཡིག་བསྐུར་ཡུལ་གཤམ་གྱི་གློག་འཕྲིན་ཁ་བྱང་ལྟར་འབྲེལ་གནང་ཞུ།
1144232616@qq.com
བཀའ་ལན་དགོངས་ཕྱོགས་གསུངས་འདུག་པར་བཀའ་དྲིན་ཆེ་ཞུ།
སྤྱིར་འུ་ཅག་གིས་སྟོན་པའི་གསུང་སོགས་གཏེར་མའི་རིགས་ཐམས་ཅད་ལ་དད་མོས་ཀྱིས་སྒོ་ནས་དུས་རབས་བདུན་པའི་ཡར་སྔོན་དུ་ངོས་འཛིན་ཡང་། དེ་དག་ཕྱིས་སུ་གཏེར་སྟོན་རྣམས་ཀྱིས་སྐད་གསར་བཅད་ལྟར་ཕབ་སྒྱུར་བྱས་ཡོད་རྐྱེན་དེང་གིས་ཞིབ་འཇུག་པས་མཐོང་མ་ཐག་ཏུ་གནའ་རྩོམ་དུ་འཇོག་མིན་བཤད་དཀའ་བས། དེས་ཕྱིར་གནའ་རྩོམ་གྱིས་ཁྱད་ཆོས་ལྡན་ཞིང་། ཞིབ་འཇུག་པ་དག་གིས་ཀྱང་ཁས་ལེན་པ་དག་ཡིན་ན་ལེགས་པར་སྣང་བས་སོ།གཏམ་བཟང་རེད། ཡིན་ནའང་གཤམ་གྱི་འགྲེལ་བཤད་ནང་དུས་རབས་བདུན་པའི་སྔོན་གྱི་དཔེ་ཆ་གསུང་དུས་གང་འདྲ་ལ་གོ་བ་ལེན་དགོས་པ་ཤེས་དགོས་འདུག དཔེར་ན་སྟོན་པས་གསུངས་ཤིང་གྲི་གུམ་དང་དུས་རབས་བརྒྱད་པའི་སྐབས་སོགས་སུ་གཏེར་དུ་གཟིམས་ནས་ཕྱིས་དུས་རབས་བཅུ་པའི་ཕྱིན་ཆད་ནས་གཏེར་དང་སྙན་རྒྱུད་ཅི་རིགས་བྱུང་བ་དེ་ཚོ་ལ་ངོས་འཛིན་གང་འདྲ་གནང་གི་ཡོད་པ་ཡིན་ནམ། དེ་མིན་བོན་གྱི་སྐྱེས་ཆེན་རྣམས་ཀྱིས་གསུངས་པའི་གསུང་རྩོམ་ཁོ་ན་བསྡུ་བསྒྲིག་གནང་གི་ཡོད་པ་ཡིན་ནམ། དེ་གཉིས་ཀྱི་ཁྱད་པར་ཡང་ཤེས་དགོས་འདུག བཀའ་དྲིན་ཆེ།དུས་རབས་ཉི་ཤུའི་ལོ་རབས་བརྒྱད་ཅུའི་སྔོན་གྱི་རྩོམ་ཡིག་ཡིན་དགོས་ཤིང་། བོད་ཀྱི་རྩོམ་པ་པོ་ལྔ་བརྒྱ་ལྷག་གི་རྩོམ་ཡིག་ལྔ་སྟོང་ལྷག་བསྡུ་རྒྱུ་རེད་པས། བསྡུ་མཚམས་ནམ་འཇོག་ད་དུང་གསལ་ཁ་མ་བྱུང་།
རྟེན་འབྲེལ་ཞུ་ཞུ། ཤུགས་རེ་བྱོས་ཤོག་སྤུན་གྲོགས་དག
ལྷ་གཡག་དར་མས།
ཤིན་ཏུ་ནས་དགའ་འོས་པའི་དོན་བཟང་རེད། ཐུགས་རྗེ་ཆེ། གཞན་ད་རུང་དཔེ་སྐྲུན་ཁང་གི་མིང་དང་རྩོམ་སྒྲིག་པ། རྩོམ་ཡིག་བསྡུ་ཡུན་སོགས་བཀོད་གནང་ན་སྟབས་བདེ་ཡོང་ས་རེད་སྙམ་པ་བྱུང་། རང་ཉིད་ནས་རྗེས་སུ་ཡི་རངས་ཡོད། ཁྲི་གཡུང་བས་སྨན་རི་ནས།
བོན་ཕྱོགས་ཀྱི་དཔྱད་རྩོམ་སྐོར་གྱི་ས་མིག་མེད་དམ། དེ་ཡོད་ན་དགེ་མཚན་ཆེ་བར་སྙམ།བཀྲ་ཤིས་བདེ་ལེགས་ཞུ།།