མཁར་ནག་སྐལ་བཟང་རྒྱ་མཚོ།།

                 དེང་སྐབས་སྤྱི་ཚོགས་འཕེལ་རྒྱས་ཀྱི་མྱུར་ཚད་ཇེ་མགྱོགས་སུ་སོང་བར་བརྟེན།  རྩོམ་རིགས་འགྲེམས་སྤེལ་གྱི་ཐབས་ལམ་ཡང་ཤིན་ཏུ་མང་བས།   རྩོམ་པ་པོ་དང་ཀློག་པ་པོ་ཀུན་ལ་ཧ་ཅང་སྟབས་བདེ་ཡིན་མོད།   འོན་ཀྱང་སྟབས་བདེ་དྲག་པས་མཁས་མི་མཁས་ཀུན་གྱིས་རང་རང་ས་ནས་བརྩམས་ཆོས་མང་པོ་སྤེལ་བས།   དེ་དག་ལས་བསམ་གཟས་པའམ་ཡང་ན་རང་གིས་མ་རྟོགས་པས་དབང་གིས་གཞན་དག་ལ་ཕོག་ཐུག་གཏོང་བའི་གཏམ་ཡང་མང་པོ་མཐོང་རྒྱུ་འདུག 　སྐབས་འདིར་རང་གིས་བརྗོད་པར་འདོད་པའི་གླེང་གཞི་ཞིག་ཅུང་ཙམ་གླེང་དགོས་པ་བྱུང་ཏེ། དེ་ཡང་བན་བོན་གྱི་གྲུབ་མཐའ་དང་བོད་ཀྱི་ལོ་རྒྱུས་སོགས་རྗོད་པའི་སྐབས་སུ་རྩོམ་པ་པོ་འགའ་ཤས་ཀྱིས་བོན་པོ་དང་སངས་རྒྱས་ཆོས་ལུགས་ཞེས། དེ་གཉིས་སོ་སོར་ཕྱེས་ནས་གཤེན་རབ་གཡུང་དྲུང་བོན་གྱི་གྲུབ་མཐའ་ནང་བ་སངས་རྒྱས་པའི་གྲལ་ནས་ཕུད་གྲབས་བྱས་འདུག ཕར་བལྟོས་ཚོད་ལ་དེ་དག་མཁས་པའི་ཉམས་ལྟར་སྣང་ཡང༌།  དོན་དུ་བོན་དང་ཆོས་ཞེས་པའི་ཐ་སྙད་ཀྱི་གོ་དོན་མ་རྟོགས་པའམ་ཡང་ན་ཕྱོགས་ཞེན་གྱི་དབང་　གིས་དགེ་སྡིག་གི་སྤང་བླང་ལ་མ་འཛེམ་པ་རེད།  སྤྱིར་བོན་ཞེས་པ་ཞང་ཞུང་སྐད་ཀྱི་གྱེར་གྱི་བརྡ་ལས་དྲངས་པ་ཡིན་ལ།  ཐོག་མའི་གོ་དོན་ཡང་བཟླ་བའམ་འདོན་པའི་དོན་ཡིན།  བོན་པོ་ཞེས་པ་སྔགས་ཟློ་མཁན་གྱི་གང་ཟག་ལ་གོ་དགོས་པས།  སྤྱི་སྟེང་དུ་བོན་ཞེས་པ་དེང་སེང་གི་ཆོས་ལུགས་ཞེས་པ་དང་དོན་མཚུངས་ཕྱིར་བོན་པོ་ཐམས་ཅད་ནང་བ་ཡིན་པས་ཁྱད་པ་　མེད་ལ།  　གདོད་མའི་དུས་སུ་ལྷ་བོན་དང་ཀླུ་བོན།　　བདུད་བོན་དང་བཙན་བོན་སོགས་གདོད་མའི་བོན་རིགས་དུ་མ་ཞིག་མཆིས་མོད།　འོན་ཀྱང་སྟོན་པ་གཤེན་རབ་ཀྱིས་སྤེལ་བའི་བསྟན་པ་ལ་གཤེན་རབ་གཡུང་དྲུང་གི་བོན་ཞེས་བརྗོད་ལ།  གདོད་མའི་བོན་དང་ཁྱད་པར་ཆེ་སྟེ།　　སྟོན་པ་གཤེན་རབ་ཀྱི་གདོད་མའི་བོན་རིགས་དེ་དག་ཐམས་ཅད་ཚར་བཅད་ནས་དམར་མཆོད་སོགས་སྡིག་གཅོད་ཀྱི་རྒྱུན་བཅད་ནས།   　　གཟན་གྱི་གཏོར་མས་ལྷ་སྲིན་གྱི་ཚོགས་མཉེས་པར་བྱས་པ་ལས་གཏོར་མ་དར་བ་ཡིན་ལ། 　 དེང་སྐབས་བན་བོན་གང་ཡིན་ཡང་གཏོར་མ་འདྲ་མིན་མང་པོ་ཞིག་བཅའ་སྲོལ་ཡོད་པ་ཡང་སྟོན་པ་གཤེན་རབ་ཀྱི་ལུགས་　ཡིན་པ་ལས།   སྟོན་པ་ཤཀྱ་ཐུབ་པའི་བསྟན་པ་བྱུང་སའི་རྒྱ་གར་ན་གཏོར་མ་མེད་པ་ནི། 　 མཁས་དབང་དགེ་འདུན་ཆོས་འཕེལ་གྱིས་བརྩམས་པའི་《རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མ་》ལ་བལྟོས་ན་ཤེས་སླའོ།   དེང་སང་གདོད་མའི་བོན་རིགས་དེ་དག་དངོས་སུ་མེད་པས།གོང་དུ་བོན་པོ་དང་སངས་རྒྱས་ཆོས་ལུགས་ཞེས་པའི་སྐབས་ཀྱི་བོན་པོ་དེའང་གཤེན་རབ་གཡུང་དྲུང་གི་བོན་ལ་གཟུར་བ་ཡིན་ཕྱིར།　　　དེ་དག་ལ་འཁྲུལ་སེལ་གྱི་སྨན་མཆོག་ཅིག་སྦྱིན་པར་འདོད་དེ།  སྤྱིར་གཡུང་དྲུང་བོན་གྱི་ལུགས་ལ་བོན་གྱི་སྒྲ་འཇུག་པའི་ཡུལ་བརྒྱད་ཙམ་ཡོད་དེ།  　ཤེས་བྱ་དང་འཁོར་འདས་གཉིས་དང༌།　 ཡིད་ཤེས་ཀྱི་ཡུལ་དང༌།  བསོད་ནམས་དང༌།  དོན་དང༌།   ལམ་དང༌། གསུང་རབ་དང༌། 　 ཐེག་པ་སོགས་ལ་བོན་གྱི་སྒྲ་འཇུག་ལ། 　གཡུང་དྲུང་གི་བོན་གྱི་མཚན་ཉིད་ལ་མཁན་ཆེན་ཉི་མ་བསྟན་འཛིན་དབང་གི་རྒྱལ་པོས།  སྤྱད་ཅིང་ཉམས་སུ་བླང་བ་ལ་བརྟེན་ནས་ལུས་ཅན་གྱི་སྡུག་བསྔུལ་སྐྱོབ་པར་བྱེད་པའི་རྣམ་དཀར་གྱི་ཡོན་ཏན་དུ་བཞེད་ལ།  　　དེ་དང་སངས་རྒྱས་ཀྱི་བསྟན་པ་དོན་གཅིག་ཏུ་འདོད།   གྲུབ་མཐའ་ཕྱི་ནང་གི་ཁྱད་པར་ཡང་བོན་ལུགས་ལས།  སྐྱབས་གནས་སྟོན་པ་ལྟ་སྤྱོད་འབྲས་བུ་ཡིས།   ཕྱི་རོལ་ནང་བའི་ཁྱད་པར་འབྱེད་པར་བྱེད། དཀོན་མཆོག་སྐྱབས་སུ་མི་འཛིན་ཕྱི་རོལ་འགྱུར། 　ཅེས་དང་མཆོག་གསུམ་སྐྱབས་གནས་སུ་ཁས་ལེན་མིན་དང་བཀའ་རྟགས་ཀྱི་ཕྱག་རྒྱ་བཞི་ཁས་ལེན་མིན་སོགས་ཀྱིས་ཕྱི་ནང་གི་ཁྱར་པར་འབྱེད་པ་　ཡིན་ལ།　འདི་ལྟར་ཕྱི་བའི་ནི་ལྷ་དབང་ཕྱུག་དང་ཚངས་བ་སོགས་ལ་སྐྱབས་སུ་རེ་ལ།　　ནང་བ་གཤེན་རབ་ཀྱིས་དཀོན་མཆོག་གསུམ་མམ་གཡུང་དྲུང་གནས་བཞི་དང༌།　སོ་སོར་ཕྱེས་ན་ཕྱི་མདོ་ལུགས་ཀྱིས་སངས་རྒྱས་བོན་དང་གཤེན་རབ་གསུམ་ལ་སྐྱབས་སུ་འགྲོ་ཞིང༌།　　ནང་གསང་སྔགས་ལུགས་ལ་བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་འགྲོ་ལ།　　གསང་བ་ཡེ་གཤེན་ལུགས་ཀྱིས་རྩ་དང་རླུང་དང་ཐིག་ལེ་གསུམ་ལ་སྐྱབས་སུ་འགྲོ་ཞིང༌།　　ཡང་གསང་བླ་ན་མེད་པའི་སྐྱབས་ཡུལ་ནི་རང་རིག་དོན་དམ་བྱང་ཆུབ་ཀྱི་སེམས་རིན་པོ་ཆེ་ལ་བྱའོ།　　ཡང་གསང་སྔགས་ལུགས་ལའང་ཕྱི་གཡུང་དྲུང་གནས་བཞི་དང༌།　ནང་དམིགས་པ་སྒོ་བཞི་དང༌།གསང་བ་ཤེས་རབ་རྒྱུན་བཞི་དང༌།　ཡང་གསང་ཕྱག་རྒྱ་གཟེར་བཞི་སོགས་ལ་སྐྱབས་སུ་འགྲོ་ཚུལ་མང་ངོ༌།　སྟོན་པའི་ཁྱད་པར་ནི་ཕྱི་རོལ་བས་དྲང་སྲོང་སེར་སྐྱ་སོགས་མུ་སྟེགས་ཀྱི་སྟོན་པ་བཅུ་གཉིས་སྟོན་པར་འདོད་ལ།　　ནང་བ་གཤེན་རབ་ཀྱི་ལུགས་ལ་སྟོན་པ་སྐྱོན་ཀུན་ཟད་དང་ཡོན་ཏན་ཀུན་ལྡན་སྤང་རྟོགས་མཐར་ཕྱིན་གྱི་རྫོགས་པའི་སངས་རྒྱས་ལ་འདོད་དོ།　　ལྟ་བའི་ཁྱད་པར་ནི།　　ཕྱི་རོལ་བས་བདག་ཏུ་འཛིན་པའི་ལོག་པའི་ལྟ་བ་འཇིག་ཚོགས་ལ་ལྟ་བ་སོགས་རྟག་ཆད་གང་རུང་དུ་ལྟ་ལ།　　　ནང་བ་གཤེན་རབ་པས་ལྟ་བ་བདག་མེད་གཉིས་དང་བཀའ་རྟགས་ཀྱི་ཕྱག་རྒྱ་བཞི་དང༌།　　　　ཁྱད་པར་རྫོགས་པ་ཆེན་པོའི་ལུགས་ལ་སྣང་བཏགས་ཀྱི་བོན་གང་ཡང་མ་བཅོས་རང་ལུགས་སུ་ལྷངས་ཀྱིས་ཤར་བ་དེ་བོན་ཉིད་འཁྲུལ་　མེད་དུ་ཡེར་གྱིས་མཐོང་བའི་ལྟ་བ་ཐོག་བབ་ཏུ་ལྟའོ།　　　སྤྱོད་པའི་ཁྱད་པར་ནི།ཕྱི་རོལ་བས་མེ་ལྔས་རངལུས་སྲེག་པ་དང་ཁ་ཊང་རྩེ་གསུམ་གྱི་སྟེང་དུ་མཆོངས་ཏེ་ལྕེབ་པ་སོགས་ལོག་པའི་སྤྱོད་པ་འབབ་ཞིག་སྤྱོད་ལ༌།　　ནང་བ་གཤེན་རབ་པས་སྡིག་སྤང་དགེ་སྒྲུབ་ཀྱི་སྤྱོད་པ་བཟང་པོ་དང༌།　སེམས་ཅན་གཞན་ལ་འཚེས་པ་སྤང་ཞིང་ཕན་པ་སྒྲུབ་པའི་ཕ་རོལ་དུ་ཕྱིན་པ་དྲུག་གམ་བཅུ་ལ་སོགས་ཀུན་ཏུ་བཟང་བའི་སྤྱོད་པ་རླབས་པོ་ཆེ་ལ་སྤྱོད་པའོ།　　འབྲས་བུའི་ཁྱད་པར་ཡང༌།　ཕྱི་རོལ་བས་ལྷ་དབང་ཕྱུག་དང་ཚངས་བ་སོགས་འཇིག་རྟེན་པའི་ལྷའི་གོ་འཕང་འཐོབ་པར་འདོད་ལ།　ནང་བ་གཤེན་རབ་པས་མཐར་ཐུག་གི་འབྲས་བུ་རྫོགས་པའི་སངས་རྒྱས་ཀྱི་གོ་འཕང་ཐོབ་པ་སོགས་ཀྱི་འབྱེད་པའོ།　　དེ་ཕྱིར་སྐྱབས་འགྲོའི་ཡོན་ཏན་སྟོན་དུས་ཀྱང༌།　ནང་བའི་ཁྱུར་འགྲོ་སྡོམ་པའི་རྟེན་གཞི་བྱེད།　སོགས་ཕྱི་ནང་གི་ཁྱད་པར་འབྱེད་བྱེད་ཀྱི་ཚད་གཞིར་བཟུང་ཡོད་དོ།

དེ་བཞིན་དུ་བན་དེ་ལུགས་ལ་ཆོས་ཞེས་པའང་དོན་བཅུ་ལ་འཇུག་པ་རྣམ་བཤད་རིག་པར།  ཆོས་ནི་ཤེས་བྱ་ལམ་དང་ནི། མྱ་ངན་འདས་དང་ཡིད་ཀྱི་ཡུལ། 　བསོད་ནམས་ཚེ་དང་གསུང་རབ་དང༌།  འབྱུང་འགྱུར་ངེས་དང་ཆོས་ལུགས་ལའོ།  ཞེས་གསུངས་ཡོད་ལ།　　གྲུབ་མཐའ་ཕྱི་ནང་གི་ཁྱད་པར་ཡང་ཇོ་བོ་རྗེས།　　ཕྱི་བ་ནང་བ་སྐྱབས་འགྲོའི་ཁྱད།ཅེས་དང་རྗེ་བཙུན་དཀོན་མཆོག་འཇིགས་མེད་དབང་པོས།　སྟོན་པ་བསྟན་པ་ལྟ་བ་གསུམ་གྱི་སྒོ་ནས་འབྱེད་པའི་ཕྱིར།　　རང་སྡེ་རྣམས་ཀྱིས་སྟོན་པ་སྐྱོན་ཀུན་ཟད་ཅིང་ཡོན་ཏན་རྫོགས་པ་དང༌།བསྟན་པ་སེམས་ཅན་ལ་འཚེས་པ་མེད་པ་དང༌།　ལྟ་བ་རྟག་གཅིག་རང་དབང་ཅན་གྱི་བདག་གི་སྟོང་པར་འདོད་པའི་ཁྱད་པར་གསུམ་དང་ལྡན་ཞིང༌།　གཞན་སྡེ་རྣམས་ནི་དེ་ལས་བཟློག་སྟེ་སྟོན་པ་སྐྱོན་དང་བཅས་ཤིང་ཡོན་ཏན་མ་རྫོགས་པ་དང༌།　བསྟན་པ་སེམས་ཅན་ལ་གནོད་ཅིང་འཚེ་བ་དང༌།　　ལྟ་བ་རྟག་གཅིག་རང་དབང་ཅན་གྱི་བདག་ཏུ་གྲུབ་པར་ཁས་ལེན་པའི་ཁྱད་པར་གསུམ་དང་ལྡན་པའི་ཕྱིར།ཅེས་སོགས་མང་དུ་ཡོད་པས།　　　དེ་ཕྱིར་བོན་པོ་དང་སངས་རྒྱས་ཆོས་ལུགས་ཞེས་སོ་སོ་ཕྱེ་བའི་མཁས་པ་དེ་དག་ལ་འདི་ལྟར་བརྗོད་པར་འདོད་དེ།བན་བོན་གང་གི་ལུགས་ལའང་ཕྱི་ནང་གི་འབྱེད་ཆོས་གཙོ་བོ་མཆོག་གསུམ་ལ་སྐྱབས་སུ་འགྲོ་མིན་གྱིས་བྱེད་པ་མཚུངས་པ་དང༌།　བན་བོན་གཉིས་ཀའི་ལུགས་ཀྱི་དཀོན་མཆོག་ལ་མཆོག་དམན་ཅི་ཡང་མེད བཞིན་དུ་གཤེན་རབ་གཡུང་དྲུང་བོན་གྱི་བསྟན་པ་འདི།　　སྟོན་པ་ཤཀྱ་ཐུབ་པས་གསུང་བ་མ་ཡིན་པ་རྒྱུ་མཚན་དུ་བྱས་ནས།　ནང་བ་སངས་རྒྱས་ཀྱི་གྲུབ་མཐའ་ལས་ལོགས་སུ་དགར་བར་འདོད་ན༌།　　འོ་ན་བན་ལུགས་ཀྱི་བྱམས་ཆོས་སྡེ་ལྔ་དང་གཞན་གསང་སྔགས་དང་རྫོགས་ཆེན་ཡང་ཐུབ་པས་གསུང་པ་མིན་པས་ཇི་ལྟར་འདོད།　　　ད་དུང་སྔར་འདས་དང་སླར་འབྱོན་གྱི་བསྐལ་བཟང་སངས་རྒྱས་གཞན་རྣམས་ཀྱི་བསྟན་པ་ཡང་ཐུབ་　　པས་གསུང་བ་མིན་པས་ནང་བ་སངས་རྒྱས་ཀྱི་གྲས་སུ་མི་བརྩིའམ།　　གྲུབ་མཐའ་ཕྱི་ནང་གི་འབྱེད་ཆོས་ཐུབ་པས་གསུང་བ་ཡིན་མིན་གྱིས་ཕྱེ་པ་མ་ཡིན་པ་ཁྱེད་ཅག་གི་ཡིད་ལ་འཇགས་　པར་འཚལ།　　　དེ་ཕྱིར་བན་དེ་དང་བོན་པོའམ།　　ཡང་ན་གཤེན་ལུགས་དང་ཤཱཀ་ལུགས།གཤེན་བསྟན་དང་ཐུབ་བསྟན་སོགས་ཀྱིས་སོ་སོར་ཕྱེ་བ་ལས།　　ད་དུང་བོན་པོ་དང་སངས་རྒྱས་ཆོས་ལུགས་ཞེས་སོ་སོར་ཕྱེ་ན་རང་གི་རང་མཚང་རྗེན་པར་ཕུད་པ་ལས་མེད་པས་ཉམས་འཇོག་འཚལ།　　　ཞེས་ཀྱང་སྨྲ་བར་འདོད་དོ།　　ཡང་ཅིག་བཤད་ན་ནང་བའི་བསྟན་སྒོར་ཞུགས་པ་བདེན་ན་སངས་རྒྱས་ཀྱི་བསྟན་པ་ནང་ཕན་ཚུན་ལྟ་ཅི།　　　ཐ་ན་ཕྱི་རོལ་བ་ལའང་སྐབས་སུ་མ་བབས་པར་གྲུབ་མཐའི་ཕྱོགས་ཞེན་གྱིས་སྨད་པ་རྩ་བ་ནས་སྤང་དགོས་ཏེ།　　རྒྱུ་མཚན་ཡང་བདག་ཅག་ནང་བ་སངས་རྒྱས་པའི་ལུགས་ལ་བདག་འཛིན་མ་རིག་པ་མ་སྤང་　བར་སངས་རྒྱ་ཚུལ་མེད་པས་སོ།　　ལུང་གིས་ཀྱང་གྲུབ་སྟེ།　　བན་དེ་ལུགས་ལ་རྣམ་སྣང་རྩ་ལྟུང་གི་རྒྱུད་ལས།　མུ་སྟེགས་ཅན་ལ་སྨད་མི་བྱ།　　མུ་སྟེགས་ཅན་ལ་སྨད་བྱས་ན།　རྣམ་པར་སྣང་མཛད་རིང་བའི་རྒྱུ།　　ཞེས་དང༌།　བོན་ལུགས་བཀའ་རྟེན་སུམ་བརྒྱ་བ་ལས་ཀྱང༌།　　ཕྱི་ནང་ཁྱད་པར་ཕྱེས་ན་ཕྱི་རོལ་བ།　　　དངོས་མེད་ཆ་མཐུན་སྐྱོན་མེད་འགའ་སྲིད་ཙམ།　དངོས་ལའང་སྨད་མི་རུང་བ་རྒྱལ་བས་གསུངས།　ཞེས་གསུང་བའི་ཕྱིར།　　　ཅེས་སྒ་རིགས་ཀྱི་སྤྲུལ་མིང་བ་མཁར་ནག་ཤེས་རབ་སྐལ་བཟང་རྒྱ་མཚོའམ་མཚོ་སྐྱེས་ཟླ་བ་གཞོན་ནུར་འབོད་པས་ལྷག་བསམ་རྣམ་དག་གིས་བྲིས་པ་དགེ་ལེགས་འཕེལ།

༢༠༠༨ལོའི་དཔྱོད་ལྡན་མཆོད་པའི་མེ་ཏོག་སྟེང་དུ་སྤེལ།