བོན་བསྟན་རྒྱས་པའི་སྨོན་ལམ་ཡིད་བཞིན་ཀུན་འགྲུབ་
ཅེས་བྱ་བ་བཞུགས།
ཨེ་མ་ཧོ། བསྐལ་བཟང་འགྲོ་བའི་སྐྱབས་མཆོག་བླ་ན་མེད། །
བདག་གིས་ཇི་སྨོན་བསམ་འགྲུབ་དབང་པོ་ལ། །
སྨོན་ལམ་ཐེབས་བཞིན་འགྲུབ་པར་བྱིན་གྱིས་རློབས། །
སྐྱབས་མཆོག་གཡུང་དྲུང་གནས་བཞིའི་ཐུགས་རྗེ་ཅན། །
དོན་དམ་བསླུ་བ་མེད་པའི་བདེན་སྟོབས་དང། །
བོན་ཅན་དམ་རྒྱ་མཚོའི་མཐུ་རྩལ་དང་། །
བདག་གི་བདེན་སྨོན་རྣམ་པར་དག་པའི་མཐུས། །
གྲུབ་མཐའི་རྒྱལ་པོ་ཐེག་ཆེན་གཡུང་དྲུང་བོན། །
རབ་འབྱམས་སྐྱེ་དགུའི་བསོད་ནམས་ཞིང་མཆོག་ཏུ། །
ཕྱོགས་བཅུའི་ཞིང་ཁམས་ཀུན་ཏུ་ཁྱབ་རྒྱས་ནས། །
ནམ་ཡང་འགྱུར་ནུབ་མེད་པའི་བཀྲ་ཤིས་ཤོག །
བསྐལ་སྟོང་ཉིན་མོར་བྱེད་པའི་སྒྲོན་དབང་མཆོག །
རྒྱལ་གཤེན་བསྟན་པའི་རང་ལུགས་འོད་པོ་ཆེ། །
ཡིད་ཅན་བསོད་ནམས་མཁའ་ལ་བརྟག་འབར་ཞིང་། །
དུས་ཀུན་འགྲིབ་པ་མེད་པའི་བདེ་ལེགས་ཤོག །
གཤེན་བསྟན་རིན་ཆེན་གསེར་གྱི་ལྷུན་པོ་ལ། །
མདོ་སྔགས་ཉི་ཟླ་འབུམ་གྱིས་ལེགས་འཁྱུད་ཅིང་། །
ཕྲིན་ལས་ཟེར་ཕྲེང་ཕྱོགས་བཅུར་རབ་གཡོས་ནས། །
ཞིང་ཀུན་རྣམ་དཀར་སྣང་བས་རྟག་ཁྱབ་ཤོག །
མདོ་འབུམ་རྒྱུད་མཛོད་པད་མོའི་དགའ་ཚལ་དུ། །
མཐའ་ཡས་འགྲོ་བའི་བུང་བས་མངོན་རོལ་ཏེ། །
འཆད་རྩོད་རྩོམ་བསྒྲུབ་ལེགས་བརྒྱའི་སྙན་འགྱུར་འབུམ། །
ནམ་མཁའི་མཐར་ཁྱབ་རྒྱུན་དུ་སྒྲོག་པར་ཤོག །
རབ་འབྱམས་ཕྱོགས་བཅུའི་ཞིང་ཁམས་ཐམས་ཅད་དུ། །
རྒྱུད་གསུམ་ཟུང་འབྲེལ་དགོན་སྡེ་བསམ་མཐའ་ཡས། །
བཤད་སྒྲུབ་ཕྲིན་ལས་ཉི་ཟླའི་ཟེར་བཞིན་རྒྱས། །
ཕུན་ཚོགས་དགེ་མཚན་ཡར་ཟླ་ལྟར་འཕེལ་ཤོག །
རྒྱལ་ཀུན་འདུས་ཞལ་མཚན་ལྡན་བླ་མའི་ཚོགས། །
ཞབས་པད་གདོང་ལྔའི་ཁྲི་ལ་རྟག་བརྟག་བརྟན་ཅིང་། །
མཛད་བཟང་གསེར་གྱི་འཁོར་ལོ་རིན་པོ་ཆེས། །
གདུལ་དཀའི་འགྲོ་རྣམས་ཁ་ལོ་གྱེན་བསྒྱུར་ཤོག །
རིག་གྲོལ་ཡོན་ཏན་དྲུག་ལྡན་འདུས་པའི་སྡེ། །
གང་གའི་ཀླུང་གི་བྱེ་སྙེད་ཙམ་འཕེལ་ཞིང་། །
ཐུགས་མཐུན་ཁྲིམས་གཙང་ཕྲིན་ལས་མཐར་ཕྱིན་ནས། །
མདོ་སྔགས་བསྟན་པའི་རྒྱལ་མཚན་འཛིན་པར་ཤོག །
རྣམ་དག་འདུལ་འཛིན་ནོར་བུའི་ལྗོང་བཟང་ལ། །
ཟབ་རྒྱས་སྡེ་སྣོད་ཡལ་འདབ་འབུམ་འབྱམས་ཤིང་། །
ཐེག་ཆེན་སྤངས་རྟོགས་འཛུམ་ལྡན་བྱེ་བའི་དབུས། །
སྐུ་དང་ཡེ་ཤེས་ཕྲིན་ལས་འབྲས་སྨིན་ཤོག །
ངུར་སྨྲིག་ལེགས་འཆང་འཕགས་མཆོག་གྲངས་མེད་ཀྱིས། །
བསླབ་གསུམ་རིན་ཆེན་དང་པོའི་རྩིབས་སྟོང་ཅན། །
ཡངས་པའི་ཞིང་ཁམས་ཀུན་ཏུ་རྟག་བསྒྱུར་ནས། །
འགྲོ་ཀུན་ཞི་བདེའི་དཔལ་ལ་འགོད་པར་ཤོག །
བརྒྱད་ཁྲི་བཞི་སྟོང་ཀླུ་དབང་ལྗོན་པའི་རྩེར། །
ལུང་དང་རིག་པའི་ཁུ་བྱུག་བསྒྲངས་ཡས་པས། །
འགྲོ་ལ་ལེགས་བཤད་འདོམ་པའི་ཚངས་དབྱངས་ཀྱིས། །
གདུལ་བྱ་མཐའ་ཡས་ཤེས་རྒྱུད་བཀྲོལ་བར་ཤོག །
རིང་ལུགས་རྨ་མེད་བསིལ་རིའི་ཁོངས་སིང་ནས། །
རིག་གྲོལ་རྩལ་རྫོགས་སྨྲ་སེང་བསམ་ཡས་ཀྱིས། །
རྒོལ་བ་ཚར་གཅོད་ཚད་གསུམ་རྩོད་པའི་སྒྲས། །
རྨོངས་འཁྲུལ་འཁོར་བའི་ལོག་རྟོག་དྲུང་འབྱིན་ཤོག །
གཞུང་ལུགས་སྒོ་བརྒྱ་བཀྲོལ་བའི་ལྡེ་མིག་མཆོག །
བཅུ་རིག་ཕུལ་ཕྱིན་སྨྲ་དབང་གྲངས་འདས་ཀྱིས། །
ཟབ་དོན་དགོངས་འགྲེལ་འདོད་འབྱུང་ནོར་བུའི་ཆར། །
འགྲོ་ཀུན་ཐར་པའི་དགའ་སྟོན་འབྱེད་པར་ཤོག །
རྒྱ་ཆེ་ཐོས་བསམ་སྒོམ་པའི་རླུང་རྩལ་གྱིས། །
རྒྱུད་གསུམ་བདུད་རྩིའི་རྒྱ་མཚོ་ཡོངས་རྔུབ་ནས། །
ལེགས་བཤད་ཟབ་མོའི་ཆུ་བཞི་རྒྱུན་འབེབས་མཁན། །
མཁས་གྲུབ་དུ་མས་ས་སྟེང་ཀུན་ཁྱབ་ཤོག །
