འཕྲིན་ལས་ཀྱི་ཕྱག་ཆ་རྐང་གླིང་

གི་རབ་བཤད།

བསྭོ་སྔོན་ཚེ་ལྷ་གནས་གཡུ་ལུང་ཤེལ་བྲག་ཏུ། །

འཆི་མེད་གཙུག་ཕུད་གསང་བ་འདུས་པ་ཡིས། །

རུ་ཏྲ་ཕོ་མོ་བསྒྲལ་བའི་བརླ་རྐང་ནི། །

རྐང་དུང་གླིང་བུ་དབང་བསྡུད་ཕྱག་ཆ་བཟོ། །

སྐྱེ་འགྲོ་སེམས་ཅན་མ་ལུས་དབང་དུ་བསྡུས། །

ལྷ་སྲིན་སྡེ་བརྒྱད་མ་ལུས་ཟིལ་གྱིས་གནོན། །

ལྷ་མིན་རི་ནག་འཇོམས་པའི་གནས་མཆོག་ཏུ། །

མུན་པ་ཀུན་གསལ་འོད་ཟེར་དཔག་མེད་ཀྱིས། །

གནམ་བདུད་ཀླུ་བདུད་བསྒྲལ་བའི་བརླ་རྐང་ལ།་།

ལོག་རྟོག་དགྲ་བགེགས་འདུལ་བའི་རྐང་གླིང་བཟོ། །

སྐལ་ལྡན་སེམས་ཅན་ཐམས་ཅད་ཐར་པར་དྲོངས། །

ལོག་འདྲེན་དགྲ་བགེགས་མ་ལུས་ཤུགས་ཀྱིས་བསྒྲལ། །

ཞང་ཞུང་དབལ་གྱི་བྲག་ཕུག་རོང་ཆེན་དུ། །

དབལ་བོན་ཆེན་པོ་སྟག་ལ་མེ་འབར་གྱིས། །

སྲིན་པོ་ཕོ་མོ་བསྒྲལ་བའི་བརླ་རྐང་ལ། །

བསྟན་དགྲ་བདུད་དཔུང་བཤིག་པའི་བརླ་རྐང་བཟོ། །

སངས་རྒྱས་བསྟན་པ་དེར་ཞིང་རྒྱས་པ་དང། །

བསྟན་པའི་དགྲ་དཔུང་བཤིག་པའི་རྐང་གླིང་བཟོ། །

སངས་རྒྱས་བསྟན་པ་དར་ཞིང་རྒྱས་པ་དང། །

བསྟན་དགྲ་བདུད་རིགས་ཐམས་ཅད་ཟིལ་གྱིས་གནོན།།

འཛམ་གླིང་རིན་ཆེན་མཛེས་པའི་ཞིང་ཁམས་སུ། །

སྟོང་རྒྱུང་མཐུ་ཆེན་དྲན་པ་ནམ་མཁའ་ཡིས། །

བཅོ་ལྔ་རྟ་གྲི་ཕོའི་རྐང་གླིང་དང་། །

བཅུ་དྲུག་ཐོག་གྲི་མོའི་རྐང་གླིང་བཟོ། །

བསླབ་གསུམ་བསྟན་པ་དར་རྒྱས་ཡུན་གནས་ཕྱིར། །

སྣང་སྲིད་ལྷ་འདྲེ་མ་ལུས་དབང་དུ་བསྡུས། །

ཕ་དགྲ་བོན་གཤེད་དུན་ཙེ་ཟིལ་གྱིས་གནོན། །

ཞིང་ཁམས་དུར་ཁྲོད་བརྒྱ་དང་རྩ་བརྒྱད་ནས། །

གྲུབ་ཐོབ་ཆེན་པོ་ཚེ་དབང་རིག་འཛིན་གྱིས། །

དཔའ་བོ་བཅོ་ལྔ་ལོན་པའི་རྐང་གླིང་དང། །

བཅུ་དྲུག་ན་ཚོད་མཁའ་འགྲོའི་རྐང་གླིང་ལ། །

གསེར་དངུལ་ཟངས་ལྕགས་གཡོག་ཞིང་རིན་ཆེན་བརྒྱན། །

དར་ཚོན་སྣ་ལྔའི་ལྷབ་ལྷུབ་འཕྱང་འཕྲུལ་བརྒྱན། །

མི་རྐང་རིན་ཆེན་རྐང་གླིང་ཁྱད་འཕགས་ཀུན། །

མིག་གིས་མཐོང་ཚད་སངས་རྒྱས་ས་ལ་བཀོད། །

རྣ་བའི་སྒྲ་སྐད་གོ་ཚད་དལ་འབྱོར་ཐོབ། །

དད་ལྡན་ཀུན་གྱི་ནད་གདོན་བར་ཆོད་ཞི། །

གསོལ་བ་འདེབས་ཚད་རིག་འཛིན་ས་ལ་བཀོད། །

དེ་དག་དཔེ་བླང་རིག་འཛིན་ཀུན་གྱིས་བཟོ། །

མི་རྐང་ཟས་དང་ར་ཡི་རྐང་གླིང་གི །

འཇིག་རྟེན་ཁམས་འདི་ཀུན་ལ་དར་བར་གྱུར། །

ལྷུན་གྲུབ་ཞི་བའི་རྐང་གླིང་འབུད་ཙམ་ན། །

ཞི་བའི་ཕྲིན་ལས་མཁའ་ལྟར་འགྲོ་ལ་ཁྱབ། །

མཐར་ཕྱིན་རྒྱས་པའི་རྐང་གླིང་འབུད་ཙམ་ན། །

རྒྱས་པའི་འཕྲིན་ལས་འགྲོ་ཀུན་བདེ་ལ་བཀོད། །

སྨིན་གྲོལ་དབང་གི་རྐང་གླིང་འབུད་ཙམ་ན། །

དབང་གི་འཕྲིན་ལས་སྐྱེ་དགུའི་ཐར་ལམ་འདྲེན། །

མངོན་སྤྱོད་དྲག་པོའི་རྐང་གླིང་འབུད་ཙམ་ན། །

དྲག་པོའི་འཕྲིན་ལས་བསྟན་དགྲ་རྡུལ་དུ་རློགས། །

རྐང་གླིང་སྒྲ་སྐད་དེ་ལྟར་སྒྲོགས་པ་ཡི། །

རྒྱལ་བའི་བྱིན་རླབས་དངོས་གྲུབ་ཆར་ལྟར་འབེབས། །

རིག་འཛིན་བྱིན་རླབས་ཐུགས་རྗེ་སྤྲིན་བཞིན་འབེབས། །

མ་སྲིང་མཐུ་རྩལ་དངོས་གྲུབ་ཆར་ལྟར་འབེབས། །

བོན་སྐྱོང་དཔལ་མགོན་ལྷ་སྲིན་སྡེ་བརྒྱད་ཀུན། །

དགྲ་ལ་འགྱོགས་པའི་རྟ་རྒྱུག་མ་ལུས་སྒྲོལ། །

དབལ་མོ་ཕོ་ཉ་ལས་ངན་ཐམས་ཅད་ནི། །

དམ་ཉམས་དགྲ་ལ་རྣོ་མཚོན་ཐོག་ལྟར་འབེབས། །

སྣང་སྲིད་མ་ལུས་ཐམས་ཅད་ཀྱིས། །

ཤ་ཟོ་ཁྲག་འཐུང་རུས་པ་རྡུང་ཞིང་ཟོ། །

དགྲ་བགེགས་ཕུང་ཞིང་བརླག་པའི་ཕྲིན་ལས་མཛོད། །

ཅེས་རྐང་རབ་ཉུང་བསྡུས་རྫོགས་སོ། །

ཞེས་པ་འདི་ནི་གཤང་རྔ་ཨུན་སྦུབ་རྐང་གླིང་གི་རབ་བཤད་ཅེས་པ་ལས་དྲངས་པའོ། ། དགེའོ། །