བོན་བསྟན་རྒྱས་པའི་སྨོན་ལམ་ཡིད་བཞིན་ཀུན་འགྲུབ་

ཅེས་བྱ་བ་བཞུགས།

གང་གི་ཐུགས་གསང་ཀུན་ཁྱབ་ཡངས་པའི་ཀློང་། །

ཟབ་དཀར་སྔགས་ཀྱི་ཆུ་འཛིན་འཁྲིགས་པ་ལས། །

ཐེག་ཆེན་ལམ་ལྔའི་གྲུ་ཆར་ཆེས་གཡོས་བས། །

སྨིན་གྲོལ་དབྱར་གྱི་ཕུན་ཚོགས་རབ་རྒྱས་ཤོག  །

རིམ་གཉིས་འཕྲོ་འདུ་ལྷོ་སྤྲིན་འཁྲུག་རུམ་ནས། །

བསྙེན་བསྒྲུབ་གདངས་དབྱངས་རྔ་གསང་འབུམ་ལྡིར་ཞིང་། །

ལས་སྦྱོར་གློག་ཕྲེང་གཡོ་བའི་མེ་ཆར་གྱིས། །

བསྟན་གནོད་མི་མཐུན་ཕྱོགས་ཀུན་གཞོམ་པར་ཤོག །

གཞན་དོན་སྨོན་འཇུག་ནོར་འཛིན་ཡངས་པའི་ལྟོར། །

ལམ་ལྔ་ས་བཅུའི་རྐང་འཐུང་འབུམ་རྒྱས་རྩེར། །

སྤངས་རྟོགས་མཐར་ཐུག་འབྲས་བུ་གཡུར་ཟ་བའི། །

གཡུང་དྲུང་སེམས་དཔའི་ཞིང་ཀུན་གང་བར་ཤོག །

གང་ཐུགས་ཚད་མེད་རླབས་ལས་ཉེར་འཁྲུངས་པའི། །

རྒྱལ་བའི་སྐུ་གསུངས་ཐུགས་རྟེན་ཁྱད་པར་ཅན། །

            རྒྱ་ཆེ་གྲངས་མང་ཞིང་གི་རྡུལ་ཙམ་གྱིས། །

འགྲོ་བའི་སྒྲིབ་གཉིས་བག་ཆགས་སྦྱོང་བར་ཤོག །

ཐེག་ཆེན་ལྟ་སྒོམ་སྤྱོད་དམ་འཕྲིན་ལས་མཁར། །

བླ་མེད་འབྲས་བུའི་འོད་སྟོང་རྟག་འབར་བའི། །

ཕྱག་རྫོགས་དབུ་མའི་རྣལ་འབྱོར་བསམ་འདས་གང་། །

མཐོང་ཐོས་དྲན་འབྲེལ་འགྲོ་ཀུན་གྲོལ་ཐོབ་ཤོག །

རླུང་དང་སེམས་ལ་གྲུབ་པ་མཆོག་བརྙེས་པའི། །

རྣམ་གྲོལ་རྫོགས་པའི་དབང་ཕྱུག་བསམ་མི་ཁྱབ། །

གང་འདུལ་སྤྲུལ་པའི་ཟློས་གར་མི་ཟད་པས། །

མི་སྲིན་ལོག་སྡེ་ཟིལ་གྱིས་གནོན་པར་ཤོག །

གཡུང་དྲུང་བོན་བསྟན་སྐྱོང་བའི་དམ་ཅན་ཚོགས། །

མཐུ་རྩལ་ནུས་སྟོབས་དབྱར་མཚོ་ལྟར་རྒྱས་ཤིང་། །

ཕ་རོལ་མི་མཐུན་ཕྱོགས་ལས་རྟག་རྒྱལ་ནས། །

སྐད་ཙམ་གཡེལ་མེད་ཕྲིན་ལས་བསྒྲུབ་པར་ཤོག །

མཁའ་མཉམ་འགྲོ་ཀུན་བོན་ལ་བློ་ཕྱོགས་ཏེ། །

བདེ་སྐྱིད་འཕན་དར་ལྷ་མིའི་དབང་པོ་ལྟར། །

ཚེ་བསོད་དཔལ་འབྱོར་ལོངས་སྤྱོད་ཕུན་ཚོགས་ནས། །

དུས་རྣམས་ཀུན་ཏུ་བསྟན་ཞབས་འདེགས་པར་ཤོག །

སྔ་ཕྱིའི་ལས་ཉོན་བག་སྒྲིབ་ལས་འཕྲོས་པའི། །

ཕྱི་ནང་གསང་བའི་འགལ་རྐྱེན་བར་ཆོད་ཀུན། །

དབྱར་མཚོའི་ཀློང་དུ་ཁ་ཆར་ཕོག་པ་ལྟར། །

རང་སར་ཞི་ནས་གྲོགས་སུ་འགྱུར་བར་ཤོག །

སྔོན་བསགས་ལེགས་བྱས་མཐུ་ལས་རབ་སྨིན་པའི། །

ཕན་བདེའི་རྩ་ལག་མཐུན་རྐྱེན་ལེགས་ཚོགས་ཀུན། །

ཡིད་བཞིན་ནོར་ལ་སྨོན་ལམ་ཐེབས་པ་བཞིན། །

འབད་རྩོལ་མེད་པར་ལྷུན་གྱིས་འགྲུབ་པར་ཤོག །

ནམ་ཞིག་ཞིང་འདིའི་བཀོད་པ་བསྡུ་བའི་དུས། །

བདག་སོགས་འགྲོ་ཀུན་བདེ་ཆེན་བོན་དབྱིངས་སུ། །

མཐར་ཐུག་བྱང་ཆུབ་ཆེན་པོའི་སྐུར་བརྙེས་ཏེ། །

དབྱེར་མེད་ཐིག་ལེ་གཅིག་ཏུ་རྫོགས་པར་ཤོག །

བོན་གྱི་སྐུ་ལས་གཟུགས་སྐུའི་རྣམ་རོལ་གར། །

བྱེ་བ་ཕྲག་བརྒྱའི་བཀོད་པ་གྲངས་མེད་ཀྱིས། །

ཕྱོགས་བཅུ་པར་འདས་ཞིང་ཁམས་རབ་འབྱམས་ཀྱི། །

མཁའ་ཁྱབ་འཁོར་བ་མ་ལུས་དོང་སྤྲུག་ཤོག  །

གཡུང་དྲུང་སློབ་དཔོན་སངས་རྒྱས་བསྟན་འཛིན་གྱིས།  །

གཡུང་དྲུང་བོན་བསྟན་རྒྱས་སྨོན་གསུང་བསྐུར་ངོར།  །

གཡུང་དྲུང་གླིང་གི་སློབ་རྒན་ཚུལ་རྒྱན་པས། །

གཡུང་དྲུང་ཤད་བར་བརྒྱ་དང་རྩ་བརྒྱད་སྤེལ། །

གཡུང་དྲུང་བོན་བསྟན་རྒྱས་པའི་རྒྱུར་གྱུར་ཅིག།།   །།

དགེའོ།།   ཐ་ཚན་མུ་ཙུག་སྨར་རོ།།   །།