བསྭོ་དང་པོ་གཤང་གི་བྱུང་ཁུང་བཤད།  །

སྔོན་གྱི་བསྐལ་པ་དང་པོ་ལ།  །

མ་ཅིག་ཆུ་ལྕམ་རྒྱལ་མོ་ཡིས།  །

འདོད་ཆགས་རྒྱ་མཚོ་སྐེམ་པའི་ཕྱིར།  །

གསེར་གྱི་སྤུ་གྲིས་བྲང་གི་ནུ་འབུར་བཅད།  །

ཕྱག་ཏུ་བཞེས་པས་སིལ་སྙན་བྱུང་།   །

གྱེན་བརླང་བདེ་ཆེན་ཞིང་བཀོད་ལྡན།   །

མུ་ཁྱུད་རིམ་གསུམ་སྟོང་གསུམ་དཔེ།   །

སིལ་ཞེས་འཁོར་བའི་ཚ་གདུང་སེལ།   །

སྙན་ཞེས་བསླབ་གསུམ་བསྙན་སྒྲ་སྒྲོགས།  །

སྡོམ་གསུམ་བསྟན་པ་དར་བ་དང།  །

འདོད་ཆགས་མིང་ཡང་མེད་པའི་ཕྱིར།  །

རྣམ་དག་ཁྲིམས་ལྡན་ཕྱག་ཆ་ལགས།  །

བསླབ་གསུམ་བོན་བསྟན་དར་ཞིང་རྒྱས།  །

དུས་དང་སྐལ་པ་དེ་ཙམ་ན།   །

སྲིད་པ་སངས་པོ་འབུམ་ཁྲི་ཡིས།  །

གཏི་མུག་མུན་པ་སེལ་བའི་ཕྱིར།  །

བྲང་གི་ནུ་འབུར་གསེར་གྲིས་བཅད།  །

ཕྱག་གིས་བླངས་ཏེ་ཁྲི་ལོ་གྱུར།   །

གྱེན་སྒོར་འོག་མེན་ཞིང་ཁམས་དཔེ།  །

མུ་ཁྱུད་གསུམ་ལྡན་སྟོང་གསུམ་དཔེ།  །

ཁྲི་ནི་སེམས་ཉིད་རྣམ་པར་དག  །

ལོ་ཞེས་འོད་གསལ་འཁོར་ལོ་བསྒྱུར།  །

གསང་བསྒོམ་བསྟན་པ་དར་བ་དང་།  །

གསང་བསྒོམ་བསྟན་འཛིན་ཕྱག་ཆ་ལགས།  །

གསང་བསྒོམ་བོན་བསྟན་དར་ཞིང་རྒྱས།  །

སྐལ་པ་དེ་ཡི་འོག་རོལ་དུ།  །

བདུད་འདུལ་དབལ་ཆེན་གེ་ཁོད་ཀྱིས།  །

འཁྲུལ་རྟོག་ཞེ་སྡང་ཞི་བའི་ཕྱིར།  །

གསེར་གྱི་ཉི་མ་ཞལ་དུ་གསོལ།  །

ཞལ་རྒོད་ཙམ་གྱིས་ཉི་མ་ཤོར།  །

ཕྱག་གིས་བརྙབ་པའི་ནུ་འབུར་ཟིན།  །

ནུ་མ་ཆད་པས་དབལ་ཆེན་གྱིས།  །

ཕྱག་ཏུ་བླང་པས་གསེར་གཤང་བྱུང་།  །

གྱེར་སྒོར་མི་འགྱུར་དབྱིངས་ཆེན་དཔེ།  །

མུ་ཁྱུད་གསུམ་ལྡན་སྟོང་གསུམ་དཔེ།  །

གསེར་ཞེས་ཉི་མ་བྱུང་བ་དང།  །

གཤང་ཞེས་ཐམས་ཅད་ཟིལ་གྱིས་གནོན།  །

བསྐྱེད་རྫོགས་བསྟན་པ་དར་བ་དང་།  །

ཞེ་སྡང་གདུག་སེམས་འཇོམས་པའི་ཕྱིར།  །

གསང་སྔགས་སྒྲུབ་ཆེན་ཕྱག་ཆ་ཡིན།  །

འདུལ་སྔགས་བོན་བསྟན་དར་ཞིང་རྒྱས།  །

དེ་ནས་གཤང་གི་ཆགས་ཚུལ་བཤད།  །

བཀྲ་ཤིས་ལི་དཀར་གྲུབ་པ་ནི།  །

ཡོད་ཁམས་དཀར་པོའི་ཆགས་ཚུལ་ཡིན།  །

མཛེས་ལྡན་མི་ཏོག་དབྱིབས་བྱས་པ།  །

འོག་མིན་ལྷ་གནས་ཆགས་ཚུལ་ཡིན།  །

མུ་ཁྱུད་རིམ་གསུམ་བསྐོར་བ་ནི།  །

སྟོང་གསུམ་སྟོང་གི་ཆགས་ཚུལ་ཡིན།  །

རིན་ཆེན་ཁྲི་མཁར་བརྩེགས་པ་ནི།  །

ཁྲི་ཐབས་གླ་འདྲེན་བྱས་པ་ནི།  །

འགྲོ་དྲུག་གླད་ནས་སླད་དུ་འདྲེན།  །

དེ་ནས་ཨ་ལུང་བཏགས་པ་ནི།  །

དད་པས་ཨ་ལུང་ཚུལ་ཡིན་ནོ།  །

དར་སྐུད་ལྕེ་ཐག་བྱས་པ་ནི།  །

ཐུགས་རྗེ་ཉག་ཐག་ཚུལ་ཀྱང་ཡིན།  །

རིན་ཆེན་སྣ་ཚོགས་བརྒྱན་པ་ནི།  །

ལམ་ལྔ་ས་བཅུ་བསྒྲོད་ཚུལ་ཡིན།  །

གཙུག་སྐྱེས་ར་ཡི་གཤང་ལྕེ་ནི།  །

རིག་པ་བོན་སྐུ་ཐིམ་པར་གྱུར།  །

རིགས་ལྔའི་ས་བོན་བཀོད་པ་ནི།  །

ཕྱི་ནང་གསང་བའི་དཀྱིལ་འཁོར་གནས།  །

བཀྲ་ཤིས་རྟགས་བརྒྱད་བཀྲ་བ་ནི།  །

འགྲོ་ཀུན་བདེ་སྐྱིད་ལྡན་པར་འགྱུར།  །

ཆང་བཟུང་ཕྱིང་དཀར་བྱས་པ་ནི།  །

འགྲོ་ཀུན་དག་ལ་འཛུག་པའི་ཕྱིར།  །

ཕྱི་གཡོག་ཀོ་བ་བྱས་པ་ནི།  །

ཕྱིན་པ་ཐམས་ཅད་དགེ་སྤྱོད་ཚུལ། །

གཤང་འཕེན་དར་གྱིས་བྱས་པ་ནི།  །

འགྲོ་ཕན་རྒྱལ་བསྟན་དར་བའི་ཚུལ།  །

རིན་ཆེན་རྒྱན་གྱིས་བརྒྱན་པ་ནི།  །

སེམས་ཅན་འདོད་དགུ་འཕེན་པར་འགྱུར།  །

འཕེན་རྩི་མུ་ཏིག་བརྒྱན་པ་ནི།  །

མུ་སྟེགས་པ་རྣམས་བོན་བསྟན་འཛུགས།  །

དེ་ནས་གཤང་འདི་དར་ཚུལ་ནི།  །

འདི་དག་རྣམས་ནས་དཔེ་བླངས་ནས།  །

རིན་ཆེན་བཀྲ་ཤིས་ལི་དཀར་ལ།  །

རིག་ཅན་བཟོ་བོ་ཀུན་གྱིས་བཟོ།  །

སྟོང་གསུམ་འཇིག་རྟེན་ཀུན་ཏུ་དར།  །

དེ་ནས་གཤང་འདི་དཀྲོལ་ཚུལ་ནི།  །

གཤང་ལྕེ་ཕར་ལ་གཡུག་ཙམ་ན།  །

དགྲ་བགགས་ཐམས་ཅད་ཐལ་བར་བརླག  །

གཤང་ལྕེ་ཚུར་ལ་གཡུག་ཚམ་ན།  །

ཡོན་མཆོད་ལྷ་ཚོགས་ངོ་སོ་མཐོ།  །

ཚམ་ཚམ་དྲག་ཏུ་ཕོབ་ཙམ་ན།  །

ལྷ་སྲིན་སྡེ་བརྒྱད་དབང་དུ་བསྡུད།  །

གཤང་སྐད་དབྱངས་བསྙན་སྒྲོགས་ཙམ་ན།  །

སྲི་ཞུའི་མགྲོན་རྣམས་མཉེས་པར་འགྱུར།  །

ཡོན་ཏན་མགྲོན་རྣམས་ཐམས་ཅད་དང་།  །

ལན་ཆགས་མགྲོན་རྣམས་གདུག་རྩུབ་ཞི།  །

སྙིང་རྗེའི་མགྲོན་རྣམས་འདོད་པས་ཚིམས།  །

ཞི་བའི་འཕྲིན་ལས་ལྷུན་གྱིས་གྲུབ།  །

རྒྱས་པའི་འཕྲིན་ལས་མཐའ་རུ་ཕྱིན།  །

འཇིག་རྟེན་དཔལ་མགོན་བཀའ་ལ་ཉན།  །

ལྷ་སྲིན་སྡེ་བརྒྱད་བྲན་དུ་འཁོར།  །

རིགས་དྲུག་སེམས་ཅན་ཐར་པར་དྲངས།  །

སྒྲུབ་གཤེན་ཡོན་མཆོད་འཁོར་འདས་ཀྱི།  །

ཕྱྭ་ཚེ་ལོངས་སྤྱོད་དབང་ཐང་སྤེལ།  །

མི་མཐུན་རྐྱེན་ངན་ཐམས་ཅད་ཟློག  །

བསམ་དོན་མ་ལུས་འགྲུབ་པར་མཛོད།  །

གཤང་རབ་བསྡུས་པ་རྫོགས་སོ།  ཞེས་པ་འདི་ནི་གཤང་རྔ་ཨུན་སྦུབ་རྐང་གླིང་རྣམས་ཀྱི་བྱུང་ཁུང་རབ་བཤད་ཅེས་པ་ལས་དྲངས།།