བདེན་པའི་ཐ་ཚིག་ཉག་གཅིག

བདེན་པའི་ཐ་ཚིག་ཉག་གཅིག་ནི།  ཆད་མེད་སྙིང་གི་དམ་བཅའ་མཐུད།  བསྟན་སྲུང་རྨ་བྱའི་གོས་ཅན་གྱིས།  གཞུང་འདི་ཡོངས་སུ་ཟུངས་ཤིག་ཀྱཻ།  ཟབ་མོའི་གཙུག་ལག་དམ་པ་འདི།  མཇུག་དོན་བསླབ་པ་མདོར་བསྡུས་བསྟན།  དེ་ཡང་ས་བཅད་རྣམ་པ་ལྔ་།   དང་པོ་བརྩམ་གཞི་གང་གིས་བསླངས།  དེ་ཉིད་ཉམས་སུ་ཇི་ལྟར་ལེན།  གཟུང་ཐུབ་སྣོད་ལྡན་སུ་ལ་གཏད།  ལག་ལེན་གཏན་ལ་འབེབ་ལུགས་དང་།  དེ་ཡི་ཡོན་ཏན་འབྱུང་ཚུལ་བཅས།  ས་བཅད་རྣམ་པར་ལྔས་བསྡེབས་ཏེ།  དང་པོ་ཚུལ་འདི་བརྩམ་པའི་གཞི།  སྔོན་ཚེ་དུས་གསུམ་མཁྱེན་པ་ཡིས།  མན་ངག་དུས་ཀྱི་འཁོར་ལོ་གསུངས།  དེ་ཡི་དགོངས་འགྲེལ་རྒྱ་ནག་ཏུ།  ཀོང་ཙེ་རྗེས་འབྲངས་དང་བཅས་པས།  གཙུག་ལག་རྩིས་སྒོ་མང་དུ་གསུངས།  དེ་ཡང་བརྒྱུད་པ་ཁུངས་ལྡན་ནི།  ལོ་ཙཱ་ནམ་མཁའ་གཡུང་དྲུང་སོགས།  ཞང་བོད་མཁས་པ་མང་པོ་ཡིས།  རྒྱ་རྩིས་ཕྱི་ནང་གསང་གསུམ་བསྒྱུར།   རྒྱ་བོད་ཞང་གསུམ་རྩིས་ཀྱི་ཁྱབ།  ཁྱད་པར་བོད་ཡུལ་ཐོག་མ་རུ།  རྒྱུ་ཡི་བོན་འདི་སྔ་ཞེས་གྲགས།  ཁ ཅིག་སྲོང་བཙན་སྒམ་པོ་ཡན།  བོད་ལ་ཡི་གེ་མེད་ཅེས་ཟེར།  དེ་ཕྱིར་ལྷག་པའི་བསླབ་པ་དང་།  ཐུན་མོང་རིག་བྱེད་མེད་པར་འདོད།  གང་འདི་འབྲེལ་མེད་རྫུན་སྨྲ་སྟེ།  སྔོན་ཐལ་རྒྱལ་དང་གཤེན་པོ་ཡིས།   མདོ་སྔགས་བསྟན་པ་དར་བའི་ཚེ།   བོད་རྣམས་རྒྱུ་འབྲས་བོན་སྒོ་ལ།  སྤྱོད་ན་ཐར་ལམ་གང་གིས་འཁྲིད།   ཟབ་མོའི་བདེན་དོན་གང་གིས་སྟོན།   མ་སྤྱོད་བོད་རྣམས་བྱ་སྤྲེལ་བཞིན།  འདོད་དོན་བརྡའ་སྤྲོད་ཇི་ལྟར་བྱེད།  ཡི་གེར་མ་བསྟེན་དོན་རྟོགས་ན།   ཐམས་ཅད་གཟུངས་སྤོབས་བློ་ལྡན་པས།  ལྗོངས་འདི་རྒྱལ་བས་ཅིའི་ཕྱིར་འདུལ།  ཡི་གེ་མི་དགོས་བརྡ་འཕྲོད་ན།   བོད་དང་བྱོལ་སོང་ཁྱད་པར་ཅི།  བསླབ་པའི་སྣོད་ཙམ་ག་ལ་རུང་།   དེ་ཕྱིར་མངོན་སུམ་རྗེས་དཔག་གི།   ཚད་མས་དཔྱད་ན་དམ་བཅའ་བུད།   འོན་ཀྱང་རྒྱ་ཆེ་རོལ་པ་ལས།   བཤད་པའི་འཕགས་ཡུལ་ཡིག་རིགས་རྣམས།   སྔོན་ཆད་བོད་ལ་མ་གྲགས་ཞེས།   སྨྲ་ན་དེ་ལ་རྩོད་མི་བྱ།   ཁ་ཅིག་རྨོངས་པ་རང་ལུགས་སུ།   བཅོས་ནས་འཆོས་གཞིའི་དྲིན་རྣམས་བརྗེད།   བདེན་པའི་དོན་ལ་སྐྱོན་འདོགས་སོགས།  རང་སུན་རང་གིས་འབྱིན་པའང་ཡོད།  ཁ་ཅིག་བོན་ལ་མ་བསླབ་པས།  བོན་གྱི་སྙིང་པོ་ག་ལ་རྟོགས།  དེ་ཕྱིར་ཕྱི་རོལ་ཕྱོགས་བསྒྲུབ་སོགས།  ཡང་དག་དོན་ལ་ཐེ་ཚོམ་ཚིག   ཁྱི་རྒན་མྱོས་པའི་ཅ་ཅོ་བཞིན།   མང་ཡང་རེ་ཞིག་བཏང་སྙོམས་སོ། ། ཞེས་མཁས་གྲུབ་ལོང་རྟོགས་རྒྱ་མཚོའི་གསུངས་རྩོམ་༼ནག་རྩིས་སྣང་སྲིད་མེ་ལོང་༽ལས་དྲངས། །