བཀའ་དང་བཀའ་བརྟེན་གྱི་ས་མཚམས་གླེང་བ།
བརྗོད་བྱེད་ཚིག་གིས་བསྡུས་པའི་གཡུང་དྲུང་གི་བོན་རིན་པོ་ཆེ་བཀའ་དང་བཀའ་བརྟེན་གྱི་ས་མཚམས་རགས་ཙམ་གླེང་བ་ལ། གཞན་ལུགས་དང་རང་ལུགས། དེ་ལ་རྩོད་པ་སྤང་བ་དང་གསུམ་ལས།
དང་པོ་འདི་ལ་འགའ་ཞིག་གིས་‘‘སངས་རྒྱས་ཀྱིས་གསུངས་པ་བཀའ་ལ། དེ་ལ་བརྟེན་ནས་སེམས་དཔའ་དང་རྟོག་གེ་བ་ཕལ་པས་མཛད་པ་བཀའ་བརྟེན་ཞེས།’’གསུང་པ་དང་། ཡང་མཁས་པ་འགའ་ཞིག་གིས། ‘‘གང་གིས་གསུང་ཀྱང་རུང་སྟེ་རང་རྐྱ་ཐུབ་པ་ནི་བཀའ་ལ། མ་ཐུབ་ན་བརྟེན་པ།’’ཞེས་གསུང་པ་སོགས་མང་དུ་སྣང་ཡང་མདོར་བསྡུས།
གཉིས་པ་སངས་རྒྱས་སྐུ་ཡིས་འདུལ་དུས་སུ་གསུངས་བའི་བཅོས་སླད་མེད་པའི་ཚད་མར་གྱུར་པ་སྟེ་བཀའ་རུ་འཇོག་ཏེ། བཀའ་ཡི་མ་མཐའི་ས་མཚམས་ནི་སྐུ་ཡིས་འདུལ་དུས་མ་རྫོགས་པར་དང་ཡ་མཐའ་སངས་རྒྱས་ཀྱི་བསྟན་པ་དབུ་འཛུགས་པ་ནས་ཡིན་ལ། འགྲེལ་ཡིད་བཞིན་རྣམ་པར་བཀོད་པའི་རྒྱན་ལས།
བཀའ་དང་བཀའ་བརྟེན་གྱི་ས་མཚམས་བཤད་པའི་སྐབས་སུ།‘‘དེས་ན་གཉིས་པ་རང་ལུགས་ནི་སངས་རྒྱས་སྐུས་འདུལ་བའི་དུས་སུ་གསུངས་པ་དང། དེ་ལ་མ་བཅོས་མ་སླད་པ་གཅིག་ཡིན་ཏེ། བཀའ་ཡི་མཚན་ཉིད་བཅོས་སླད་མེད། ཅེས་དང། བདུད་ཀྱི་ལོག་ཚིག་དང་འཁོར་ཞུ་བ་པོའི་ངག་ཀྱང་བཀའ་ཡི་ཁོངས་སུ་བསྡུས་ནས་བྱོན་པས་སོ།’’ཞེས་གསུངས། བོན་རང་ལུགས་ལ་བཀའ་ཡིན་ན་སངས་རྒྱས་རང་གི་གསུང་ཡིན་པའི་ངེས་པ་མེད་ལ།
བཀའ་བརྟེན་ནི་གསུང་གི་བསྟན་པ་དབུ་འཛུགས་པ་ནས་ས་མཚམས་ངོས་བཟུང་དགོས་པར་སྣང་། འགྲོ་མགོན་རིན་པོ་ཆེའི་སྔགས་འགྲེལ་ལས‘‘སངས་རྒྱས་ཀྱི་གསུང་གི་བསྟན་པ་ལ་གསུང་པ་དང་བཀའ་ཡི་དགོངས་པ་འགྲེལ་བ་ནི་བརྟེན་པ་སྟེ། ང་དང་མཉམ་པའི་རྩལ་ཤུགས་ཁྱོད་ལ་ཡོད། ཅེས་པའི་ཡོན་ཏན་དང་ལྡན་པའི་སློབ་དཔོན་མུ་ཆོ་ལྟ་བུ་གསུངས་པ་ཡང་བརྟེན་པར་བྱོན་ཏེ་སྟོན་པའི་བཀའ་ལ་སློབ་དཔོན་བཀའ་ཡིས་བརྟེན་ཞེས་གསུང་པས་སོ།’’ཞེས་གསུང་པ་ལས་སོགས་ཤུགས་ཀྱི་མངོན་ནོ།།
གསུམ་པ་ལ་སངས་རྒྱས་ཀྱིས་གསུངས་པ་བཀའ་ལ། དེ་ལ་བརྟེན་ནས་སེམས་དཔའ་དང་རྟོག་གེ་བ་ཕལ་པས་མཛད་པ་བཀའ་བརྟེན་ཞེས་པས། དེས་ན་གསུང་གི་འདུལ་དུས་སུ་སྦྱང་པའི་ཤེས་རབ་ཟབ་མོས་གསུང་པ་བཀའ་ཞེས་གསུང་པ་དང་འགལ་ལ། རང་རྐྱ་ཐུབ་པ་ནི་བཀའ་ལ། མ་ཐུབ་ན་བརྟེན་པ་གསུངས་པས། དེས་ན་ལུང་ལས། ཁམས་བརྒྱད་ལྟ་བུ་རང་རྐྱ་མ་ཐུབ་པ་ཞེས་གསུང་པ་ལས་སོགས་དང་འགལ། / དགེའོ།། །།
