མཛད་འཕྲིན་ནོར་བུའི་དོ་ཤལ།
༸རྒྱལ་བ་སྨན་རི་བའི་ཁྲི་འཛིན་སོ་གསུམ་པའི་དགུང་སྟོན་ལ་ཕུལ་བའི་ཤིས་ཚིག
༼དཔོན་གསས་མཆོད་པའི་གཤེན་དབྱངས་ལས་དྲངས།༽
ཡེ་ནས་ཀ་དག་སྤྲོས་བྲལ་བོན་ཀྱི་སྐུ། །
རོལ་རྩལ་འགག་མེད་ལོངས་སྤྱོད་རྫོགས་པའི་སྐུ། །
གཞན་དོན་གང་འདུལ་དེར་སྟོན་སྤྲུལ་པའི་སྐུ། །
སྐུ་གསུམ་ངོ་བོ་ཀུན་འདུས་༸སྨན་རི་བ། །
ཕྱོགས་བཅུའི་སངས་རྒྱས་སྟོང་གི་མཁྱེན་བརྩེའི་སྟོབས།
།
མ་ལུས་གཅིག་ཏུ་བསྡུས་པའི་ཉིན་མོ་བྱེད། །
སྙིགས་མའི་དུས་འདིར་འགྲོ་བའི་མགོན་དུ་ཤར། །
མི་ནུབ་རྟག་ཏུ་བཞུགས་པར་གསོལ་བ་འདེབས། །
མ་རིག་བདུད་དཔུང་འཇོམས་ནས་མྱང་འདས་ཀྱི། །
ས་ལམ་ཐེམ་སྐས་རིམ་པར་བསྒྲོད་ཟིན་ཡང་། །
ཚད་མེད་སྙིང་རྗེ་ཆེན་པོས་རབ་བསྐུལ་ཏེ། །
གོ་ལའི་སྒང་འདིར་རྒྱལ་བའི་སྲས་སུ་སྤྲུལ། །
སྔོན་བྱོན་དམ་པ་གོང་མའི་མཛད་སྤྱོད་བཞིན། །
ཁྱིམ་སྤངས་རབ་བྱུང་རྣལ་མའི་ཚུལ་བཟུང་ནས། །
རིས་མེད་གྲྭ་སར་བརྒྱུད་དེ་གཞུང་ལུགས་ཁྱོན། །
གཏིང་དཔག་ངང་གིས་གཅོད་པའི་མཁའ་ལྡིང་རྒྱལ། །
ང་དགུ་དུས་ཀྱི་འགྱུར་ཁུགས་མེ་ཁྱིའི་ལོར། །
སངས་རྒྱས་བསྟན་དང་འགྲོ་བའི་དོན་དགོངས་ཏེ། །
ཞབས་སོར་པད་མོའི་འཁོར་ལོ་ལྷོ་རུ་བསྒྱུར། །
ངལ་མེད་གཞན་དོན་མཛད་པའི་འཕྲིན་ལས་ཅན། །
ལོན་ཌོན་མཐོ་སློབ་གཙུག་ལག་སློབ་གླིང་དུ། །
སྐལ་བཟང་ལས་ཀྱིས་འཛོམས་པའི་རྐང་དྲུག་ཚོར། །
བཅུ་ཕྲག་རིག་པའི་གདམས་ངག་སྦྲང་རྩི་ཡིས། །
སྐོམ་པའི་གདུང་བ་སེལ་མཁན་སྨན་རི་བ། །
གངས་ཅན་ལྷ་སྐལ་སྤྱིན་རས་གཟིགས་དབང་གིས། །
བྱེས་འབྱོར་གཞོན་ནུའི་སློབ་གླིང་གསར་དུ་བསྐྲུན།
།
དུས་དེར་མགོན་ཁྱེད་སློབ་དགེ་སྐར་ཚོགས་དབུས། །
ཟླ་བཞིན་འཕགས་པའི་བྱམས་བརྩེའི་གོང་བུའི་དཔལ། །
དབྱིན་བོད་ཟབ་སྦྱོང་འཛིན་རིམ་གསར་བཙུཊ་སྐབས། །
བློ་གསལ་རིག་པའི་འབྲས་བུ་གཡུར་ཟའི་དུས། །
ཀླད་རྙིང་ཕྲག་དོག་སད་སེར་ལྡང་བའི་མོད། །
ཉིན་བྱེད་ཁྱེད་ཀྱང་ནོར་ཝེའི་གླིང་དུ་བཞུད། །
འཕགས་ཡུལ་བོན་གཞིས་ཐོབ་རྒྱལ་གསར་པ་རུ། །
གཡུང་གླིང་མཁན་ཆེན་དམ་པ་ལ་སོགས་པས། །
རབ་འབྱམས་མཚན་རིལ་གསེར་བུམ་བཅུད་དུ་བཀོད། །
རྩ་གསུམ་བོན་སྐྱོང་ཚོགས་ཀྱི་བསྙེན་སྒྲུབ་བཙུགས།
།
གཞིས་བྱེས་བོན་འབངས་ཡོངས་ཀྱི་མགོན་པོ་རུ། །
དཀྱིལ་འཁོར་གསེར་བུམ་དཀྲུགས་པའི་མགུལ་རྒྱུན་དུ།
།
ངོ་མཚར་དགེ་བའི་མཚན་རྟགས་དཔལ་འབར་ཞིང་། །
ལྷང་ངེར་བཞེངས་པའི་སྐྱབས་རྗེ་སྨན་རི་བ། །
གཟའ་སྐར་འཕྲོད་སྦྱོར་བཟང་པོའི་སྐལ་བཟང་ཉིན། །
འཇིགས་བྲལ་གཅན་ལྔས་བཏེགས་པའི་ཁྲི་འཕང་དུ། །
ཞབས་སོར་བཀོད་པའི་སྙན་འཇེབས་དབྱར་རྔའི་སྒྲ། །
འཛིན་མའི་ཁྱོན་འདིར་ཁྱབ་པས་དད་གསུམ་འཁྲུངས། །
བཀོད་ལེགས་ལྟ་ན་སྡུག་པའི་གཙུག་ལག་ཁང་། །
གསར་དུ་བསྐྲུན་ཞིང་བོན་བསྟན་གསལ་བྱེད་དུ། །
བཤད་སྒྲུབ་འདུས་སྡེ་རཌྞ་སྨན་གླིང་སོགས། །
འཛུགས་སྐྲུན་མཁན་པོ་རྟག་ཏུ་བརྟན་བཞུགས་གསོལ། །
རྡུལ་བརྩེགས་གོ་ལ་ཟླུམ་པོའི་ཡང་རྩེ་ནས། །
གཤེན་བསྟན་མེ་རོ་སྤར་བའི་བསང་དུད་ཀྱི། །
དྲི་ཞིམ་ཕྱོགས་བཅུར་ཁྱབ་མཛད་སྨན་རི་བའི། །
སྐུ་ཚེ་བསྐལ་བརྒྱར་བརྟན་པའི་བཀྲ་ཤིས་ཤོག །
ཅེས་པ་འདི་ནི་༸སྐྱབས་རྗེ་༸རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་བསྟན་པ་དང་འགྲོ་བའི་དོན་དུ་སྐུའི་བཀོད་པ་མིར་བཞེས་ནས་དགུང་གྲངས་བརྒྱད་ཅུར་ཕེབས་པའི་དགུང་སྟོན་ལ་རྟེན་འབྲེལ་གྱི་ཚུལ་དུ་ཕུལ་བའོ།། །། ཐ་ཚན་མུ་ཙུག་སྨར་རོ།། །།
