སྟོན་པ་རྫོགས་པའི་སངས་རྒྱས་གཤེན་རབ་མི་བོའི་སྐུ་སྐྱེ་སྔོན་རབས་ཚོགས་ལམ་རྫོགས་པའི་ཚུལ་ལ་གླེང་བ། 

སྟོན་པ་རྫོགས་པའི་སངས་རྒྱས་ཀུན་ལས་རྣམ་པར་རྒྱལ་བ་སྟོན་པ་གཤེན་རབ་མི་བོ་མཆོག་སྐུ་སྐྱེ་བ་སྔོན་རབས་སུ་ངན་སོང་དང་མཐའ་འཁོབ་མི་ཡི་སྒྲིབ་པ་སྦྱངས་བའི་རྗེས་སུ། དེ་ནས་སྟོན་པ་ ཉིད་སྔར་དད་པ་བཟང་པོས་འཕེན་ཤུགས་ཀྱིས་ཡུལ་གྱི་དབུས་འཛམ་བུ་གླིང་དུ་མི་ལུས་ དལ་འབྱོར་བཅོ་བརྒྱད་དང་ལྡན་པའི་བྲམ་ཟེའི་རིགས་སུ་འཁྲུངས་སོ།  དེ་སྐབས་ནི་མི་རྣམས་ཙེ་ལོ་འབུམ་ཐུབ་པ་སྟེ་བསྐལ་པ་ཡ་ཐོག་གི་དུས་ཡིན་པས་སྟོན་པ་སྣང་བ་རང་འབྱུང་ཐུགས་རྗེ་ཅན་བྱོན་ཏེ།  མི་དགེ་བའི་ལས་ཤ་སྟག་ལས་དགེ་བའི་ལས་ཏིལ་འབྲི་ཙམ་ཡང་མི་བྱེད་པའི་སྡིག་ཏོ་ཅན་བདུད་ཡ་བོ་ཞེས་པ་དེ་ཐུགས་རྗེའི་ཐབས་ཀྱིས་བཏུལ་ནས་འགྲོ་བ་ཁ་ལོ་བསྒྱུར། ཕོ་བྲང་པདྨ་གླིང་ཆེན་བཞེངས། བོན་སྲིད་པའི་གསས་འབུམ་གསུངས།  བྲམ་ཟེ་བློ་གསལ་འཇིག་རྟེན་བོན་བརྒྱད་ཀྱི་བྱ་བ་ལ་བློ་ཁ་ལྡོག  བྱང་ཆུབ་བསྒྲིབ་པའི་ཐབས་ལ་འབད།   སྟོན་པ་རང་འབྱུང་ཐུགས་རྗེ་ཅན་ལ་རྩེ་གཅིག་དད་པའི་གུས་ཤིང་མེ་ཏོག་ནང་ནས་མཆོག་ཏུ་གྱུར་པ་ཨུ་དམ་ཝ་ར་ཕུལ་བས་དྲན་པ་ཉེར་བཞག་ཐོབ།  གཞན་ ཡང་སངས་རྒྱས་དང་བྱང་སེམས་ལ་མཆོད་སྤྲིན་བླ་མེད་བྱས་པས་ཚོགས་ལམ་དང་པོ་རྫོགས་ པར་བརྙེས་ཤིང་སྦྱིན་པའི་ཕ་རོལ་རབ་དགའི་ས་མཆོག་གི་རྒྱལ་ས་ཟིན་ཏེ། ཉི་སྒྲོན་ལས། དེ་དུས་སྟོན་པ་གཤེན་རབ་ཀྱང་། བྲམ་ཟེ་བློ་གསལ་བྱ་བར་སྐྱེས།  ཐམས་ཅད་རང་འབྱུང་སྟོན་པ་ལ།  མེ་ཏོག་ཨུ་དམ་ཝ་ར་ཕུལ།  དྲན་པ་ཉེ་བར་བཞག་པ་ཡི།  ཚོགས་ལམ་དང་པོ་རྫོགས་པར་འགྱུར།  སྦྱིན་རྫོགས་སེར་སྣ་དྲི་མ་བྲལ།  ས་ནི་དང་པོ་རབ་དགའ་ཐོབ།  ཅེས་གསུངས་སོ།། 

དེ་རྗེས་སྟོན་པ་འཁོར་བ་ཀུན་འདྲེན་བྱོན་ནས།  ཕོ་བྲང་བདེ་གནས་ལྷུན་གྲུབ་བཞེངས།  བོན་ནི་རིན་ཆེན་གླིང་འབུམ་གསུངས།  དགེ་ལ་བར་དུ་གཅོད་པར་བྱེད་པའི་ནག་པོ་གདུག་བྱེད་ཀྱི་བདུད་རིགས་བཏུལ།   དེའི་དུས་སུ་སྟོན་པ་གཤེན་རབ་མི་བོ་ནི་རྒྱལ་བུ་དགེ་རྒྱལ་བྱ་བར་འཁྲུངས།  སྟོན་ པ་འཁོར་བ་ཀུན་འདྲེན་ལ་བདུད་རྩི་ས་ཞགས་ཀྱི་མཆོད་པ་སྐྱོགས་གང་ཕུལ་བའི་མཐུས་ མི་ཚངས་སྤྱོད་པའི་སྒྲིབ་པ་དག་ཅིང་ས་གཉིས་པ་དྲི་མེད་ཡེ་ཤེས་ཤེལ་གྱི་ས་ཐོབ་པ་ ཡིན་ཏེ།  དེ་ཉིད་ལས།  དེ་དུས་སྟོན་པ་གཤེན་རབ་ཀྱང་།  རྒྱལ་བུ་དགེ་རྒྱས་བྱ་བར་སྐྱེས།  སྟོན་པ་འཁོར་བ་ཀུན་འདྲེན་ལ།  བདུད་རྩི་ས་ཞགས་སྐྱོགས་གང་དྲངས།  མི་ཚངས་སྤྱོད་བྲལ་ཚུལ་ཁྲིམས་རྫོགས།  ཚོགས་ལམ་ཡང་དག་སྤང་བཞི་ཡི།  ས་ནི་གཉིས་པ་དྲི་མེད་ཐོབ།  ཅེས་གསུངས་པའི་ཕྱིར་རོ། །