རང་བྱུང་དད་པའི་ཤུགས་གླུ།
ཤར་ཕྱོགས་རྒྱལ་མོ་རོང་དུ། །
གཟུགས་སྐུ་དབང་པོ་ཚེས་པས། །
གསར་སྐྱེས་པད་མོའི་ཚོགས་ཀྱི། །
བློ་སྒོ་འདབ་སྟོང་བཞད་སོང་། །
གཅེས་པའི་ཡབ་གཞིས་བྲལ་ནས། །
མདོ་ཁམས་སྟོད་ལ་ཕེབས་དུས། །
མ་འོངས་བསྟན་དོན་དགོངས་ནས། །
སྨན་རིའི་དགོན་ཆེན་བཞེངས་སོང་། །
ཐུགས་བསྐྱེད་སྨོན་ལམ་ཟབ་པས། །
བསིལ་ལྡན་གངས་རིའི་ལྗོངས་དེར། །
གཞན་སྣང་འགྲོ་བ་འདྲེན་པའི། །
སྲིད་ཞིའི་སྒྲོན་མེར་གྱུར་སོང་། །
མ་རིག་སྨག་རུམ་ཁྲོད་དུ། །
ཀུ་མུད་ཡིད་ཁ་ཕྱེས་པས། །
སངས་རྒྱས་དམ་པའི་ཟླ་ཞལ། །
སྐར་ཚོགས་དབུས་ནས་སྤ་སོང་། །
མེ་ཏོག་ཧ་ལོའི་འབྲུ་ལ། །
ཕྱོགས་མེད་བུང་བ་འཁོར་བཞིན། །
མཁྱེན་གསུམ་ཕྱུག་པའི་མགོན་ལ། །
སྐལ་ལྡན་སློབ་བུ་འཁྱུད་སོང་། །
འཁོར་བའི་འདམ་གྱི་ཀློང་དུ། །
མི་གཟིགས་བླ་མར་སྤྲུལ་ཀྱང་། །
འདམ་རྫབ་དྲི་མས་དག་པས། །
གཞན་གྱི་འགྲན་ཟླ་བྲལ་སོང་། །
མཚན་ཉིད་སྡེ་ལྔ་ལ་སོགས། །
ལེགས་བཤད་དབྱར་རྔ་བསྒྲཊ་པས། །
ཕས་རྒོལ་ལོག་ལྟའི་བྲག་རྫོང་། །
གཞོམ་ནས་ཐལ་བ་བརླགས་སོང་། །
མ་རྨད་འདུལ་བསྟན་སྤེལ་ནས། །
ཁྲི་གཙུག་རྒྱལ་བའི་གདུང་སོབ། །
༧སྐྱབས་གཅིག་མཉམ་མེད་བླ་མ། །
ཀུན་ལ་བདེ་སྐྱིད་བསྐྲུན་སོང་། །
ཚེས་བརྒྱད་ཐོ་རངས་བཞད་དུས། །
རྒྱལ་ཚབ་རིན་ཆེན་བསྐོས་ནས། །
རྒྱལ་བསྟན་ཡུན་གནས་སྨོན་བཞིན། །
རྒྱལ་བའི་གནས་སུ་གཤེགས་སོང་། །
