མཚར་གཤིས།
འཇིག་རྟེན་གྱི་ཟློས་གར་ཞིག།
རླུང་འཚུབ་དང་ལྷན་ཅིག་ཏུ།།
ལ་ལུང་དང་རི་ཆུ་རྒྱུད།།
ལྷིང་འཇགས་ཀྱི་དབེན་གནས་དཀྲུགས།།
བསྟན་འཛིན་གྱི་སྐྱེ་ཆེན་ཞིག།
འཇིག་རྟེན་གྱི་དེད་དཔོན་ཏུ།།
མི་མངོན་གྱི་ཀློང་རུམ་ནས།།
ལྷ་སྲུང་གིས་མཚན་གནས་སྩོལ།།
རི་རྒྱལ་གྱི་དབུ་རྩེ་ནས།།
གཞན་ཕན་གྱི་བ་དན་ཕྱར།།
གཟི་བྱིན་གྱི་འོད་སྟོང་འབར།།
ཞི་བདེ་ཡི་ལྷ་བྱ་འཕུར།།
ངུར་སྨུག་དང་གསེར་ཞྭ་བསྣམས།།
ལུས་དབང་གིས་གདན་སར་འདེད།།
ཁས་བླང་གི་དམ་ལས་འདའ།།
ཡ་ང་བའི་ཟུངས་ཁྲག་བསྲེས།།
འཇིག་རྟེན་གྱི་སྒྲོན་མེ་ཞིག།
གངས་རི་ཡི་ར་བར་བརྒལ།།
སྙན་གྲགས་དང་གཟི་བྱིན་ལྷན།།
དངོས་མེད་ཀྱི་དྲྭ་བར་ཚུད།།
མཐུར་ཐུག་གི་རེ་མདུན་ཆེད།།
ངུར་སྨུག་གི་གོས་ལ་འཐམས།།
ལུང་རིག་གི་འཁོར་གསུམ་སྤྲས།།
ཕས་རྒོལ་གྱི་ལོག་རྟོག་གཞོམ།།
ཡ་ཁོག་གི་རེ་མདུན་ཏེ།།
མུན་ནག་གི་ཀློང་ན་བཅོལ།།
ལག་ཟུང་གི་ཐལ་མོ་ལྷན།།
མིག་མཐའ་ནས་དངུལ་ཆུ་ལུད།།
