དུས་བཞིའི་རང་མདངས།
#འདིའི་ཡར་སྔོན་མདུན་ངོས་སུ་འཆར་ཐུབ།#
དཔྱིད་དུས་ཀྱི་འབྲོག་ཐང་སྐྱ་མོ།།
རླུང་འཚུབ་ཀྱི་ཐལ་སྐྱ་གཡོ་དུས།།
ཤ་ཞེན་གྱི་འབྲི་མོ་འཁྱོལ་འགྲོ།
གནག་རྫི་ཡི་སྐྱོ་སེམས་རིང་མོ།།
དབྱར་དུས་ཀྱི་འབྲོག་ས་ཕྱུག་མོ།།
རང་བྱུང་གི་གོས་ལྗང་ཀླུབ་དུས།།
ནོར་ལུག་གི་ཤ་ཤེད་རྒྱས་ཤིང༌།།
གནག་རྫི་ཡི་གླུ་དབྱངས་སྙན་མོ།།
སྟོན་རླུང་གི་ལོ་འདབ་འབེབ་དུས།།
སྦྲ་གུར་གྱི་གསང་ཕུགས་ཏེ་ན།།
དཀར་གསུམ་གྱི་སྣོད་ཆས་ལྟེམས་དུས།།
སྦྲ་བདག་ཚོ་དགོད་སྒྲ་ལྷང་ལྷང༌།།
དགུན་གཞུང་གི་འཁྱག་རོམ་འཕྱུར་ཞིང༌།།
རྩྭ་ཐང་གི་གོས་དཀར་གྱོན་དུས།།
ཁྱི་སྤྱང་གི་ངུ་སྐད་ཙམ་ལས།།
རི་ཀླུང་ཀུན་མུན་པས་གཡོག་སོང་།།
