བཤེས་གཉེན་ལགས།

ཁྱེད་ནི་ཨ་སྔོན་གནམ་གྱི་དྲོད་འཇམ་ཉི་མ་ལགས།

ང་ནི་ཁྱེད་ལ་འཁོར་བའི་པད་མའི་མེ་ཏོག་ཡིན།

བཤེས་གཉེན་ལགས།

ཁྱེད་ནི་ཚེས་ཆེན་བཅོ་ལྔའི་དཀར་གསལ་ཟླ་བ་ལགས།

ང་ནི་ཁྱེད་ལ་འཁོར་བའི་ཀུ་མུད་མེ་ཏོག་ཡིན།

བཤེས་གཉེན་ལགས།

ཁྱེད་ནི་དྭངས་ཤིང་བསིལ་བའི་བརྒྱད་ལྡན་ཆུ་བོ་ལགས།

ང་ནི་ཁྱེད་ལ་འཁོར་བའི་གསེར་མིག་ཉ་ཆུང་ཡིན།

བཤེས་གཉེན་ལགས།

ཁྱེད་ནི་ཚར་དུ་དངར་བའི་སྐལ་བཟང་མེ་ཏོག་ལགས།

ང་ནི་ཁྱེད་ལ་འཁོར་བའི་རྐང་དྲུག་བུང་བ་ཡིན།

བཤེས་གཉེན་ལགས།

ཁྱེད་ནི་ཨ་སྔོན་དགུང་ལ་སྙེགས་འདྲའི་གངས་རི་ལགས།

ང་ནི་ཁྱེད་ལ་འཁོར་བའི་གངས་ལྷ་མེ་ཏོག་ཡིན།

བཤེས་གཉེན་ལགས།

ཁྱེད་ནི་གཏིང་མཐའ་དཔོག་དཀའི་མ་ཕམ་གཡུ་མཚོ་ལགས།

ང་ནི་ཁྱེད་ལ་འཁོར་བའི་ངང་པ་སེར་པོ་ཡིན།

བཤེས་གཉེན་ལགས།

ཁྱེད་ནི་མི་འགྱུར་ཁྲི་ལ་བཞུགས་པའི་བླ་མ་ལགས།

ང་ནི་ཁྱེད་ལ་འཁོར་བའི་གཡུང་དྲུང་རིལ་མོ་ཡིན།

བཤེས་གཉེན་ལགས།

ཁྱེད་ནི་འཁོར་བའི་སེམས་ཅན་འདྲེན་པའི་དད་དཔོན་ལགས།

ང་ནི་ཁྱེད་ལ་འཁོར་བའི་རྗེས་འཛིན་བྲན་གཡོག་ཡིན།

བཤེས་གཉེན་ལགས།