༄༅།། ཨཿཨཱོྃ་ཧཱུཾ་རཾ་ཛ།

  འོག་མིན་ཤེས་རབ་ལྷ་ལྔའི་ཐུགས་ཀ་ནས། །འོད་ཟེར་ཉག་ཐག་རྒྱུན་དུ་བརྒྱང་བའི་གནས། །སངས་རྒྱས་འབྱོན་ནས་རྒྱལ་བ་གཡུང་དྲུང་གླིང་། །རྣམ་རྒྱལ་ཀུན་གྲགས་གླིང་ལ་གསོལ་བ་འདེབས། བསྐལ་བཟང་སངས་རྒྱས་ཀུན་གྱི་དགོངས་འདུས་རྗེ། །ཀུན་བཟང་ཐུགས་སྤྲུལ་ཨ་ཡིག་འཕྲོ་འདུ་ལས། །ཐུགས་རྗེ་བཞི་ལྡན་སངས་པོ་སྨྲ་སེང་སྐུ། །ཚད་མེད་བཞི་ལྡན་གཙུག་གཤེན་སྟོང་རྒྱུང་སྤྲུལ། །འཛམ་གླིང་ལྷ་སྐལ་སངས་རྒྱས་སྨན་རི་བ། །བདག་སེམས་གཉིས་མེད་སྙིང་ཁའི་པད་གདན་བཞུགས། །ཕྱག་འཚལ་སྡིག་བཤགས་མཆོད་འབུལ་གསོལ་བ་འདེབས། །སྒྲིབ་སྦྱང་ཚོགས་རྫོགས་མཆོག་མཐུན་དངོས་གྲུབ་སྩོལ། །ཡེ་ཤེས་དཀྱིལ་འཁོར་ཤེས་རབ་སྨྲ་སེང་གི། །ཤེས་བྱའི་དཀྱིལ་འཁོར་བླ་མའི་སྐུ་སྤྲུལ་ནས།  །གཡུང་དྲུང་གླིང་དུ་བསྟན་པའི་རྒྱལ་མཚན་འཛུག །རྗེ་བཙུན་བླ་མའི་སྐུ་ལ་གསོལ་བ་འདེབས། །ཤེས་བྱའི་མཁའ་ལ་ཐོས་བསམ་བསྒོམ་བསྒྲུབ་སྤྲིན། །འཆད་རྩོད་རྩོམ་ཆར་ཁམས་གསུམ་འགྲོ་ལ་འབབས། གཡུང་དྲུང་གླིང་དུ་བསྟན་པའི་འབྲུག་སྒྲ་སྒྲོགས། །རྗེ་མཙུན་བླ་མའི་གསུང་ལ་གསོལ་བ་འདེབས། །ཐུགས་དབྱིངས་མཁའ་ལ་ཐུགས་རྗེའི་ཉི་འབུམ་ཤར། མཁྱེན་བརྩེ་འོད་ཟེར་བསྟན་འགྲོའི་སྣང་གསལ་སྒྲོན།  །གཡུང་དྲུང་གླིང་དུ་བསྟན་པའི་ཉི་མ་ཤར། །རྗེ་བཙུན་བླ་མའི་ཐུགས་ལ་གསོལ་བ་འདེབས། །རྐྱོན་མེད་ཡོན་ཏན་ཀུན་འབྱུང་དགོས་འདོད་གཏེར། །མཐའ་ཡས་འགྲོ་ཀུན་རེ་འདོད་སྐོངས་མཛད་པའི། །གཡུང་དྲུང་གླིང་དུ་བསྟན་པའི་གཙུག་རྒྱན་མཛད། །རྗེ་བཙུན་བླ་མའི་ཡོན་ཏན་གསོལ་བ་འདེབས། །མཛད་པས་ཕྲིན་ལས་ནམ་མཁའི་མཐའ་མཉམ་ཞིང་། །རྣམ་བཞིའི་འཕྲིན་ལས་འགྲོ་དྲུག་ཁ་ལོ་བསྒྱུར། །གཡུང་དྲུང་གླིང་དུ་བསྟན་པའི་དར་ཆེན་ཕྱར། །རྗེ་བཙུན་བླ་མའི་འཕྲིན་ལས་གསོལ་བ་འདེབས། །མཆོག་གསུམ་མཁའ་ལ་བྱིན་རླབས་སྤྲིན་ཆར་དབབ། །ཐེག་གསུམ་ཐེག་དགུ་བོན་གྱི་རྩི་ཐོག་རྒྱས། །སྡེ་གསུམ་བསྟན་འཛིན་དཔོན་སློབ་ས་སྟེང་གང་། །སྣོད་གསུམ་བསྟན་འཛིན་མངའ་ཐང་ལོངས་སྤྱོད་རྒྱས། །ཁམས་གསུམ་སེམས་ཅན་སྒྲིབ་སྦྱངས་ཚོགས་རྫོགས་ཕྱིར། །བསླབ་གསུམ་བོན་གྱི་འཁོར་ལོ་རྒྱུན་དུ་བསྐོར། །དུས་གསུམ་མི་ནུབ་བསྟན་པའི་རྒྱལ་མཚན་ཕྱར། །ཐེག་གསུམ་བོན་བསྟན་དར་རྒྱས་ཡུན་གནས་ཤོག ཀུན་མཁྱེན་ཟླ་བ་རྒྱལ་མཚན་གྱི་གསོལ་འདེབས་བྱིན་རླབས་ཆར་འབེབ་མ་ཞེས་བྱ་བ་རྫོགས་སོ།