ཞུ་འཕྲིན་ལྷ་རྔའི་སྒྲ་དབྱངས།

སྐུ་གཅིག་ཡོན་ཏན་སྟོང་ལྡན་རྗེ་བླ་མ།།

སྒྲིབ་གཉིས་སྤྲིན་ཚོགས་ཀུན་བྲལ་རྫོགས་སངས་རྒྱས།།

ཚད་གསུམ་ལུང་རྟོགས་བོན་དང་སེམས་དཔའ་བཅས།།

གནས་བཞིའི་ཐུགས་རྗེས་འབྲལ་མེད་སྐྱོང་དུ་གསོལ།།

གཤེན་གྱི་དྲང་སྲོང་དཔལ་ཆེན་མཁས་པ་ལྟར།།

ལྟར་སྣང་དྲེགས་ལྡན་ཕྱོགས་ལས་རྣམ་རྒྱལ་ཞིང་།།

ཞིང་འདིར་མཁས་པའི་ཁྱུ་མཆོག་ཁྱོད་ཀྱི་མདུན།།

མདུན་སྟེགས་བཀྲ་ཤིས་རེ་ཁཱས་མཛེས་པའི་སར།།

བགྲང་བྲ་ཉི་ཤུར་མི་ཟས་ཟོས་ན་ཡང་།།

ཡང་དག་རིན་གྱིས་དབུལ་བའི་མུ་ཏོ་བས།།

བས་མཐའི་ཚལ་ནས་བརྡུངས་པ་ལྷ་རྔའི་སྒྲ།།

སྒྲ་དབྱངས་རིག་པའི་བུ་ལ་མཐོ་རུ་འདེགས།།

ཁྱོད་སྐུ་སེར་ཆེན་ཁྲི་གདུགས་གཞོན་ནུའི་གཟི།།

གཟི་བྱིན་མོག་པོར་བཏང་བའི་འཚེ་བ་དབེན།།

དབེན་གནས་སེམས་དཔའ་འདུས་པ་རྒྱ་མཚོའི་གྲལ།།

གྲལ་སྟོད་བདེ་བར་བཞུགས་པ་དགའ་བ་བརྟས།།

འདི་ནས་སྒོ་གསུམ་རྣམ་བཀྲའི་མཇུག་སྒྲོ་ཡང་།།

དུག་གསུམ་རླུང་ཁར་ཡན་པ་ལ་བསམ་ཚེ།།

སྐྱབས་གསུམ་བསླུ་བ་མེད་པའི་ཞིང་མཆོག་ལ།།

རྣམ་གསུམ་དད་པའི་སྲོག་ཐག་མ་ཆད་ཙམ།།

༧དཔལ་ལྡན་སྨན་རིའི་མཁས་མང་འདུས་དབུས་སུ།།

ལྔ་རིག་གནས་ལ་བརྩོན་བཞིན་མཆིས་སོ་སྐད།།

ཀུན་རྫོབ་མིང་གི་མེ་ཏོག་མཛེས་ན་ཡང་།།

དོན་དམ་མི་ཚེ་གཡེང་ལ་ཟད་འདི་སྐྱོ།།

འོན་ཀྱང་མཁན་སློབ་ཉི་ཟླ་ཟུང་འབྲེལ་གྱི།།

སྐྱབས་འོག་ཕན་བདེ་འབྱུང་བའི་གདུགས་དཀར་ཞབས།།

ཐོས་བསམ་རོལ་བའི་བགོ་སྐལ་ལ་བསམ་ཚེ།།

བསོད་ནམས་བསགས་པའི་འབྲས་བུ་ཡིན་ནོ་ལོ།།

འགྲོགས་དང་འདྲིས་པའི་དུངས་བ་ཟབ་མིན་ཡང་།།

ལས་དང་རྐྱེན་གྱི་བག་ཆགས་ཆེས་ཟབ་ཕྱིར།།

ཁྱོད་དང་འཇལ་བའི་འདུན་པ་ཆེ་མོད་ཀྱང་།།

རྐྱེན་དང་མ་འཕྲད་ད་བར་ལུས་འདི་འགྱོད།།

འོན་ཀྱང་གནས་འདིར་འབྱོར་བའི་ཉེ་དུས་སུ།།

སུ་དང་འབྲེལ་ནས་གློག་འཕྲིན་ལམ་བརྒྱུད་དེ།།

དེ་ཕྱོགས་དང་བཅས་གསུང་གླེང་མང་བྱུང་བས།།

བས་མཐའི་ཀུ་ཧུད་མགྲིན་གླུ་ཐོས་བཞིན་སྐྱིད།།

ལྷད་མེད་བརྩེ་བ་ཆེན་པས་ཉེར་སྐུལ་ཏེ།

དྲི་མེད་སོར་པད་ལས་འོངས་དངུལ་དམར་དག །

ཅང་མེད་བུ་ཆུང་ང་ཡི་སྙིམ་པའི་མཐིལ།།

ཆད་མེད་འབྱོར་བས་དགའ་བའི་མཐའ་མ་རིག །།

བོན་བརྒྱད་མཚོན་ཆ་བོར་བའི་ཕྱག་ཆེན་གྱིས།།

རྣམ་བདུན་འཕགས་པའི་ནོར་བུ་འཆང་བ་ཁྱེད།།

རྒྱན་དྲུག་མཁས་པའི་འགྲམ་ཆང་མངར་མོ་ཡིས།།

གནས་ལྔ་སྨྲ་བའི་བློ་འདབ་ཅི་ཡང་རྒྱས།།

རིས་མེད་གྲུབ་མཐའི་ལྟ་སྒོམ་གསན་སྦྱང་ཕྱིར།།

གྲངས་མེད་མཁས་པའི་ཞལ་སྔར་འགྲིམས་པའི་མོད།།

མཚུངས་མེད་ཡོངས་འཛིན་དམ་པའི་སྐྱབས་འོག་ཏུ།།

འཆུག་མེད་ཕེབས་པས་སྤྲོ་བ་འབུམ་གྱིས་བརྟས།།

ཐོས་པ་རྒྱ་མཚོས་ལུང་རིག་གཏེར་བརྒྱ་བསྒྲུབ།།

བསམ་པ་རྒྱ་མཚོས་དཀའ་གནད་མདུན་བརྒྱ་བཤིགས།།

བསྒོམ་པ་རྒྱ་མཚོས་ལྷག་མཐོང་སྒྲོན་མེ་སྤར།།

ཡོན་ཏན་རྒྱ་མཚོས་མཁས་བརྒྱའི་སྙན་པ་འཕྲོག །

རྣམ་དཔྱོད་གསོམ་དཀར་དབྱུག་གུ་རིང་མོ་ཡིས།

གཞུང་ལུགས་འོ་དཀར་མཚོ་ཆེན་བསྲུབ་པ་ལས།

རྩོམ་རིགས་མར་དཀར་གསར་པ་ལེགས་ཕྱུངས་ཏེ།

དཔྱོད་ལྡན་འཛུམ་དཀར་གྲོལ་བའི་དགྱེས་མཆོད་བཏེགས།།

རྒྱལ་སྤྱིའི་མཁས་གྲལ་འགྲིམ་པའི་གྲགས་པ་དེ།།

དེ་ཕྱོགས་ཙམ་མིན་གངས་རིའི་ཞིང་ཁམས་ཀུན།།

ཀུན་གསལ་དབྱིངས་ནས་འབྲུག་སྒྲ་ལྡིར་བཞིན་དུ།།

དུ་མའི་ཉིན་ཞག་འགའ་ལ་འུར་གྱིས་འགེངས།།

རབ་འབྱམས་དགེ་བའི་བཤེས་གཉེན་ཆེན་མོ་ཞེས།།

རབ་སྙན་མཚན་གྱི་ཅོ་པན་འཛིན་མའི་ཡང་།།

རབ་མང་གཞུང་ལུགས་སྦྱངས་བའི་ཡོན་ཏན་ནི།།

རབ་མཁས་བཤེས་གཉེན་གཞན་ལས་འཕགས་ཞེས་གྲགས།།

སྡོམ་བཞིའི་སྐྱེད་ཚལ་གཙང་མའི་རྫི་ངད་ཀྱིས།།

ས་གསུམ་རྒྱལ་བ་དགྱེས་པའི་རྩེ་དགའ་ཅན།།

ཚོགས་གཉིས་ཟོང་གིས་ལྕི་ཞེས་ལྷ་མི་ཀུན།།

མགྲིན་གཅིག་བསྔགས་པའི་མེ་ཏོག་ཁྱོད་ལ་གཏོར།།

འདི་ན་ཉམས་ཆུང་གངས་ཕྲུག་བདག་གིས་ཀྱང་།།

མཁས་དབང་ཁྱོད་ཀྱི་ཞལ་པད་གཙང་མ་ལས།།

ལེགས་འཁྲུངས་སྙན་ཚིག་བྲོ་བ་བརྒྱ་ལྡན་པ།།

ལོངས་སྤྱོད་བགོ་སྐལ་ཐོབ་ལ་སྒུག་བཞིན་མཆིས།།

དེ་ཕྱིར་བརྩེ་ཆེན་དུས་ཀྱིས་ཉེར་སྐུལ་བའི།།

ལམ་སྟོན་བཀའ་སློབ་དཔྱིད་ཀྱི་རྒྱལ་མོའི་གླུ།།

བདག་སེམས་སྤྲོ་དགའ་འཕེལ་བའི་གསོས་སྨན་དུ།།

མྱུར་བར་བསྒྲག་པའི་ཐུགས་དགོངས་གཡེལ་མི་འཚལ།།

ལྷན་འཛོམས་ཉི་མའི་བསྐལ་བཟང་མ་ཤར་བར།།

བར་ཆད་བདུད་ཀྱི་འཚེ་བས་ཡོངས་བཏང་ཞིང་།།

ཞིང་འདིའི་ཤར་ནུབ་གང་ལ་ཕེབ་ན་ཡང་།།

ཡང་དག་བསྟན་པའི་དོན་ཆེན་འགྲུབ་པར་ཤོག །

སྔོན་མེད་དུངས་ཞེན་ཟབ་མོའི་བདག་རྐྱེན་ལས།།

བལྟམས་པའི་ཞུ་འཕྲིན་ལྷ་རྔའི་སྒྲ་དབྱངས་འདི།།

ཧོས་བཙུན་ཕྱ་སྲས་དགྱེས་པའི་ཟླ་གཞོན་པས།།

རི་བོ་ཧི་མ་ལ་ཡའི་འདབས་ནས་བཏེགས།།

མཁས་དབང་དྲང་སྲོང་རྣམ་རྒྱལ་མཆོག་ལ་བརྡ་སྤྲོད་བཏགས་མིང་དུ་ཧོས་ཕྱ་སྲས་དགྱེས་པའི་ཟླ་གཞོན་དུ་འབོད་པས་ཕྱི་ལོ་༢༠༠༥ལོར་ཟླ་༥་ཚེས་༡༣ཉིན་ཕུལ།