བདག་གི་རང་གནས་གཉིས་པ།

ཀ་བ་མེད་པས་བདེ་ཞིང་རྒྱ་ཁྱོན་ཡངས།

ཁ་ཆར་བུ་ཡུག་ནང་དུ་མི་འོང་ལ།

ག་ནས་བལྟས་ཀྱང་གཙང་ཞིང་དྲོད་སྐྱིད་ལྡན།

ང་ཡི་སྤྱིལ་ཆུང་གྲུ་བཞི་བདེ་བའི་གནས།

ཅ་དངོས་འཇིག་རྟེན་ནོར་རྫས་མོད་མིན་ཡང་།

ཆ་རྐྱེན་ཉེར་མཁོའི་ཡོ་བྱད་མི་ཉུང་ཞིང་།

ཇ་ཧོང་མདངས་ལྡན་གདན་དང་ན་བཟའ་སོགས།

ཉ་ར་བདག་འཛིན་མེད་ཀྱང་རྐུ་འཕྲོག་དབེན།

ཏ་གུ་དངོས་གྲུབ་འབྱུང་བའི་ནོར་བུ་སྟེ།

ཐ་སྙད་ཚིག་གིས་བརྗོད་པར་མི་ནུས་པའི།

ད་བཞུགས་སྔར་བྱོན་སྲས་བཅས་རྒྱལ་བའི་གསུང་།

ན་འཆིའི་སྡུག་བསྔལ་སྐྱོབས་པའི་མགོན་དུ་བཞུགས།

པ་ཊུ་མཁས་པའི་ལེགས་བཤད་གླེགས་བམ་དང་།

ཕ་རྒོད་བླ་མའི་གདམས་ངག་ཟབ་མོ་སོགས།

བ་སོ་ལྟར་དཀར་དྲི་མེད་བཀའ་ལུང་དག

མ་ལུས་རབ་གསལ་མཛོད་དུ་ཕྱུར་བུར་བལྟམས།

ཙ་རི་དང་མཚུངས་ཚ་བའི་ལུང་པ་འདིར།

ཚ་དམྱལ་ལྟ་བུའི་དཀའ་ཚེགས་མི་བཟོད་པ།

ཛ་ཊི་ཙམ་ཡང་མི་འབྱུང་སྤྱིར་ཆུང་འདི།

ཝ་ལེར་བསམ་ན་བདེ་བའི་ཁང་བཟང་ཉིད།

ཞྭ་གོས་ལྷམ་སོགས་ཧ་ཅང་མཐུག་པོ་དང་།

ཟ་འོག་གོས་ཆེན་རིགས་དག་འཛོམས་མིན་ཡང་།

འ་འུར་སློབ་ལ་བརྩོན་པའི་ཆ་རྐྱེན་ཀུན།

ཡ་མཚན་ཤག་ཆུང་འདི་ན་ངེས་པར་ཚང་།

ར་མ་ན་སོགས་རྒྱལ་པོའི་ཕོ་བྲང་དང་།

ལྭ་བ་ཅན་གྱི་ཕྱུག་པོའིི་ཁང་བཟང་དང་།

ཤ་ཟན་སྲིན་རྫོང་ལྟ་བུའི་གནས་མལ་ལས།

ས་མཐའི་གྲྭ་རྐྱང་ཞིག་ལ་འདི་འདྲར་འཚམས།

ཧ་ཅང་བཟང་བས་འཕྲག་དོག་མི་སྐྱེ་ཞིང་།

ཧ་ཅང་ངན་པས་འཕྱ་ཁྲེལ་མི་འབྱུང་བའི།

ཨ་ལགས་བླ་མས་གནང་བའི་ཤག་ཆུང་འདི།

ཨ་རོགས་ཁམས་ཕྲུག་བདག་གི་རང་གནས་ཡིན།།

ཞེས་བརྡ་སྤྲོད་བཏགས་མིང་དུ་ཧོས་ཕྱྭ་སྲས་དགྱེས་པའི་ཟླ་གཞོན་དུ་འབོད་པས་ཕྱི་ལོ་༢༠༡༠། ཟླ་༦། ཚེས་ཤར་ལ་རང་སྤྱིལ་ཡེ་མཁྱེན་རིགས་ལྔ་དགྱེས་པའི་དགའ་ཚལ་དུ་ཤར་མར་བྲིས་པ་ཐ་ཚན་མུ་ཙུག་སྨར་རོ།།