སྨོན་ཚིག་བཀྲ་ཤིས་འཁྱིལ་བ།
ལན་གྲུ སྙན་བཟང་བྱམས་པ།
རི་བོ་གངས་དཀར་ཏི་སེའི་དྲུང་། །
འཇིག་རྟེན་གསལ་བའི་འོད་ཅིག་བྱུང་། །
སྒྲིབ་གཉིས་དག་པར་འགྲོ་བ་རྣམས། །
དོན་ཕྱིར་ཕེབས་པ་ཨེ་མ་མཚར། །
ཁམས་གསུམ་སྐྱེ་རྒུ་མཐའ་དག་གི །
ཉོན་མོངས་འདུལ་ཕྱིར་བོན་གསུངས་མཁན། །
དོན་གྱི་སླད་དུ་མཚན་བརྗོད་ན། །
གཤེན་རབ་བཀྲ་ཤིས་འཁྱིལ་བ་ལགས། །
གང་གི་བསྟན་འདི་ཡོངས་དར་ནས། །
མི་ལོ་ཁྲི་ཕྲག་གྲངས་སུ་འདས། །
གནས་སྐབས་མུན་དང་སྣང་བ་བཞིན། །
བསྒྲིབས་ཀྱང་ནུབ་པར་མ་གྱུར་ཏེ། །
ཉིན་མཚན་གོ་ལོག་བསྡེབས་པ་ལྟར། །
དེ་རིང་དར་བའི་བསྐལ་བཟང་བྱུང་། །
འདི་ཉིད་རབ་ཏུ་གཅེས་ཤེས་ན། །
སྤྱིར་ནས་བོད་འདི་གཅེས་པ་ཡིན། །
ཁ་སང་ཧི་མ་ལ་ཡ་ནས། །
བོན་གྱི་གསལ་བྱེད་ཉི་མ་ཤར། །
དེ་རིང་ཏི་སེའི་རྩེ་མོ་རུ། །
ཧི་གཟུགས་སྤྱད་དེ་བོན་གྱི་སྒོར། །
འཇུག་པའི་ཟླ་བ་རབ་ཏུ་རྒྱས། །
རྒྱལ་བ་རྒྱ་མཚོའི་ཚོགས་རྣམས་ནི། །
གདུལ་བྱའི་དོན་དུ་གཉེར་གཏད་ནས། །
བོན་གྱི་སྒོ་མོ་གང་གསུངས་པ། །
དེ་ཀུན་དྲིན་ནི་ཡོངས་དྲན་ནས། །
སྲིད་པའི་མཐར་ཡང་གནས་པར་ཤོག །
མི་ནུབ་བོན་གྱི་རྒྱལ་མཚན་དེ། །
སྲིད་པའི་མཐའ་རུ་སྒྲེངས་མཁན་གྱི། །
མི་བུ་ཁ་ཤས་བྱུང་བ་ནི། །
དེང་གི་དུས་འདིར་ཆེས་དཀོན་པས། །
ཁོང་རྣམས་མཛད་པ་མཐར་ཕྱིན་ཤོག །
བསོད་ནམས་བཟང་བོའི་མཐུན་རྐྱེན་གྱིས། །
རང་ཡང་བོན་སྒོར་འཇུག་པ་ཡི། །
བསྐལ་བཟང་རྙེད་འདི་དགའ་དྲགས་པས། །
སྨོན་ཚིག་བཀྲ་ཤིས་འཁྱིལ་བ་འདི། །
འབྲི་བའི་འདུན་པ་ངང་གིས་འཁྲུངས། །
༢༠༡༠ལོའི་ཟླ་༥བའི་ཚེས་༢༦ལ།
- ཟིན་ཐོ་གོང་མ།མཚར་སྡུག་གི་ལོ་ཟླ་ནི་ནམ་ཡང་མཚར་སྡུག་ཡིན།
- ཟིན་ཐོ་འོག་མ།བསླད་མེད་པའི་དྭངས་གཙང་གི་གྲོགས་པོ།