དུས་རབས་གསར་བའི་ང་ཚོ།

སྙན་བཟང་བྱམས་པ།

ང་ཚོ་སྟེ།                

མེ་ཏོག་དང་ལྷན་དུ་བཞད་པའི་མཐོ་སྒང་གི་ལོ་མ་སེར་པོ

ཁ་བ་དང་ལྷན་དུ་སྐྱོམས་པའི་དྭངས་གཙང་གི་རྣམ་ཤེས་བརྗིད་པོ

སུ་ཞིག་གིས་ཀྱང་གཏོར་མ་མྱོང་བའི་གནམ་འོག་གི་བཙན་རྫོང་འདི་ནས

འདི་ལྟར།     ཉིན་དཀར་དྭངས་གཙང་གི་སེམས་པས་ནམ་མཁའ་གསོ་བཞིན་ཡོད་ལ

མཚན་མོར།    རྨི་ལམ་གྱི་མཛེས་མས་ཟླ་བ་གླེང་བཞིན་ཡོད།

ང་ཚོ་སྟེ།

ལུག་ཁྱུ་དང་ལྷན་དུ་འཚོ་བའི་གཡང་དཀར་གྱི་འཇིག་རྟེན་བྱེད་པོ

གཙང་བོ་དང་ལྷན་དུ་བཞུར་བའི་དུས་རབས་ཀྱི་རྗེས་འཛིན་གསར་བ

སུ་དང་གང་གིས་མི་ཚུགས་པའི་བར་སྣང་གི་ཕོ་བྲང་འདི་ནས

དེ་ལྟར།   དཔྱིད་ཀར་རེ་སྨོན་དང་ཡིད་ཆེས་གསར་བས་ས་བོན་སྟོར་བཞིན་ཡོད་ལ

སྟོན་ཀར།  ལོ་ལེགས་དང་འཛུམ་མདངས་ཞིམ་པོས་ཡབ་མེས་ལ་བསྙེན་བཀུར་བྱེད།

ང་ཚོ་སྟེ།

འབྲུ་དྲུག་དང་རྩམ་པས་གསོས་པའི་གངས་ལྗོངས་ཀྱི་ཉི་མ་གཞོན་ནུ

མཚེའུ་དང་རི་རབ་ཀྱིས་བཏེགས་པའི་སྣང་སྲིད་ཀྱི་ནོར་བུ་ཆ་བདུན

གནས་གང་དུའང་མནར་མ་མྱོང་བའི་མེ་ཏོག་གི་འཇའ་ཚོན་གསེབ་ནས

ནམ་ཡང་མི་ཡུལ་གྱི་རྫིང་རིང་ན་གླུ་བྲོ་ཡི་ཟློས་གར་འཁྲབ་བཞིན་མཆིས་ལ

གཏན་དུ། ཕ་ཡུལ་གྱི་དུས་གསུམ་ན་རྨི་ལམ་གྱི་སྙན་དབྱངས་དཀྲོལ་ནས་ཡོད།

ང་ཚོ་སྟེ།

སྤྲིན་དཀར་དང་འཇའ་ཚོན་ལ་འཐམས་པའི་ཀླུང་རྟ་ཡི་སྣེ་མོ་ཞིག

གངས་རི་དང་རྫ་རི་ལ་འཇུས་པའི་གླག་རྒོད་ཀྱི་གནས་ཚང་ཞིག

སྲིད་པ་གསུམ་ན་རྒྱན་དུ་ཆེ་བའི་འདོད་འབྱུང་གི་གླིང་ག་འདིའི་ཕང་བ་ན

རྒྱུན་པར་བླ་སྲོག་གི་རྟིང་མར་ཟུངས་ཁྲག་གི་མཆོད་མེ་སྒྲོན་བཞིན་ཡོད་ལ

རྟག་ཏུ། ཤེས་བྱ་ཡི་ཐང་ཆེན་ན་སྙན་ངག་གི་རྟ་མཆོག་བང་གིས་འགྲན།

རེད་ལགས། 

འདི་ནི་དུས་རབས་གསར་བའི་ང་ཚོ་ཡིན་ལ།

ང་ཚོའི་དུས་རབས་གསར་བའང་ཡིན་སྲིད།