ཨེ་མ་བསྐལ་བཟང་རྫོགས་ལྡན་གསར་བའི་དུས། ། དགུང་ནས་ཉི་ཟླའི་འོད་སྣང་ཇི་བཞིན་དུ། ། གསལ་ལེ་ལྷང་ངེར་བཞུགས་པའི་བླ་མ་ལ། ། སྤྲོ་བའི་གླུ་གཞས་སྣ་ཚོགས་མཆོད་པ་འབུལ། ། མཁྱེན་བརྩེ་ནུས་གསུམ་དབང་བཞིའི་མཛོད་འཆང་བ། ། དྲིན་ཆེན་བླ་མས་ཁམས་གསུམ་འགྲོ་བ་ཀུན། ། མཐར་ཐུག་རྫོགས་སངས་རྒྱས་ཀྱི་གོ་འཕང་དུ། ། འདྲེན་ཞིང་མཛད་པའི་མཐའ་རུ་ཁྱབ་པར་ཤོག ། སྲིད་པའི་དྲང་བདེན་ལམ་གྱི་ཚད་འཛིན་པའི། ། ཕྱོགས་དང་རིས་སུ་མ་ཆད་འབངས་སྡེ་ལ། ། བདེ་སྐྱིད་དཔལ་འབྱོར་བསྐྲུན་པའི་བདག་པོ་སྟེ། ། བཞེས་ཞིང་གུས་བཀུར་ཐོབ་པའི་བཀྲ་ཤིས་ཤོག ། དཀོན་མཆོག་རྣམ་གསུམ་གཙུག་ཏུ་བསྟེན་བཞིན་དུ། ། རྒན་བཀུར་བྱིས་སྐྱོང་ཁ་བ་གངས་ཅན་གྱི། ། ལུགས་སྲོལ་བཟང་བོ་རྒྱུད་འཛིན་བྱེད་པ་ལ། ། འབད་འབུངས་གནང་བའི་གདོང་དམར་བོད་པ་རྒྱལ། ། མི་རིགས་སྲོག་སྙིང་སྐད་དང་ཡི་གེ་སོགས། ། གཅེས་ཤིང་སྦྱང་བ་མཛད་བའི་འོས་འགན་དེ། ། ཕྲག་ཏུ་འབབས་པའི་འདུ་ཤེས་སྙིང་བཟུང་ནས། ། གངས་ཅན་ཁ་བ་ཅན་གྱི་ལ་རྒྱ་འཛིན། །