| 2011/5/29 22:01:00ཀུན་རྨོངས་གཅོད་པའི་ཀུན་ཤེས་རལ་གྲི།
ཀུན་ནས་ལེགས་པའི་ཡོན་ཏན་རབ་རྫོགས་པའི། །
ཀུན་དགའ་ར་བའི་གངས་ཅན་ཤེས་རིག་མཛོད། །
ཀུན་གསལ་ནམ་མཁའ་ཇི་བཞིན་གཏིང་ཟབ་པའི། །
ཀུན་ལྡན་ཁ་བ་ཅན་གྱི་རིག་གཞུང་རྒྱས། །
ཀུན་རྨོངས་དྲ་བ་བཙུད་པའི་འགྲོ་བ་རྣམས། །
ཀུན་བཟང་མཁྱེན་རྩལ་དགོངས་པ་མངོན་པའི་སླད། །
ཀུན་ཤེས་སྨྲ་བའི་སེང་གེ་གཙུག་བསྙེན་ནས། །
ཀུན་རིག་ཡོན་ཏན་མ་ལུས་མཐར་རྒྱས་ཤོག །
ཀུན་ནས་བསོད་ནམས་དགེ་བའི་དཔལ་རོལ་བ། །
ཀུན་དག་སྒྲིབ་གཉིས་ཟད་པའི་མངོན་རྟོགས་རིགས། །
ཀུན་བདེ་མཐའ་ཡས་མོས་པ་སྤྲོ་བ་ཡིས། །
ཀུན་བཟང་བདག་ཞལ་མངོན་དུ་རོལ་བར་ཤོག །
ཀུན་རིག་རྣམ་དག་ལམ་གྱི་དམིགས་པའི་ཐབས། །
ཀུན་མཁྱེན་དབང་བོ་ཡུལ་མཆོག་གནས་ཀྱི་སྐྱབས། །
ཀུན་དང་མཐུན་པའི་ཡུལ་ལུགས་དང་བསྟུན་ནས། །
ཀུན་དགའ་གནས་ལ་མྱུར་དུ་འཐོབ་ལ་འབད། །
ཀུན་གྱི་རྩ་བ་གཞན་ཕན་བྱང་ཆུབ་སེམས། །
ཀུན་ནས་དོན་དུ་བླངས་པའི་སྤོབས་པ་དེ། །
ཀུན་ནས་རྒྱན་པའི་རྟེན་འབྲེལ་འབར་བའི་གཤིས། །
ཀུན་ཀྱང་རང་སེམས་བདག་སྐྱོང་དེར་མ་འདས། །
ཀུན་དབང་འདོད་སེམས་འཆང་བའི་ཉོན་མོངས་པ། །
ཀུན་བདེ་ལམ་གྱི་བཀག་རྡོ་ངེས་པ་ལ། །
ཀུན་ཀྱང་དེ་ལ་འཇུག་པའི་གོམས་གཤིས་དེ། །
ཀུན་གྱིས་དོར་བའི་དུས་ཤིག་འབར་བར་ཤོག །
ཀུན་དང་མཐུན་པའི་རྩ་བ་རྩེར་བཟུང་ནས། །
ཀུན་དགའ་བྱ་བ་ལམ་གྱི་འཇུག་སྒྲིལ་ཏེ། །
ཀུན་མཁྱེན་སྨྲ་བའི་སེང་གེའི་དགོངས་པ་དག །
ཀུན་ཀྱང་ཐུགས་སུ་ཆུད་པའི་བཀྲ་ཤིས་ཤོག །
༢༠༡༠་༡༢་༥ཉིན་གྱི་དགོང་དྲོ་གང་མགྱོགས་སུ་བྲིས་པའོ། །
- ཟིན་ཐོ་གོང་མ།རྟོགས་ལྡན་བསྐལ་ཁོའི་རྩོམ་ཡིག
- ཟིན་ཐོ་འོག་མ།རང་བཞིན་གྱི་འོད་མདངས།
གོང་གྲོགས་རྣམ་གཉིས་ཕེབས་པར་དགའ་བསུ་ཞུ།
ཨེ་མ་ཡ་ཨེ་མ།། ཁྱེད་ཀ ྱིསམཛེས་རྒྱན་འ དི་ངོ་མ་གཉིས་ཀྱིས་ངོ་མཚར་བའི་གཏམ་རྒྱུད་ཞིག་རེད།།
ལྷག་སེམས་འོ ད་སྟོང་གིས་ཁྲོད་ནས།།
གཟི་བརྗིད་པད་དཀར་གྱི་གཞོན་ནུ།།
འཛམ་གླིང་གོ་ལ་ཡི་ཁྱོན་འདིར།།
བཞད་པས་བཀྲ་ཤིས་དེ་བསྩོལ་ཅིག།
