གངས་རིའི་ལྗོངས་ཀྱི་སྤུན་ཟླ་ཀུན་རིགས་དང་རུས་པ་འདྲེས་ཤིང་མཛའ་མཐུན་གྱི་སྒོ་མོ་ཀུན་ནས་འབྱེད་ཅིང་རྒན་ལ་གུས་བཀུར་དང་གཞོན་ལ་གཅེས་སྐྱོང་གི་རྣམ་པར་ཀུན་ནས་བཞད་ཅིང་ལོ་དང་ཟླ་དང་ཞག་དང་ཟ་མ་བར་དུ་འབྲལ་མེད་དུ་གནས་ཏེ་རང་རང་གི་འདོད་བློ་དང་མཚམས་པའི་མདུན་ལམ་རེ་བསྙེགས་པའི་བསལ་བློ་ཀུན་ནས་སློང་ཏེ་འཛམ་གླིང་ལ་ཁ་ཕྱོགས་ཤིང་གོ་ལ་ཅན་ལ་འཁོར་བའི་དུས་རབས་འདི་རུ་འཛམ་གླིང་གི་དུས་རབས་ཀྱི་རྗེས་སུ་བཞུགས་པ་བྱས་ཏེ་ང་ཚོ་མ་འོངས་པའི་གདོང་དམར་བོད་པའི་གཞོན་སྐྱེས་དག་ལ་ངོ་ནོངས་མི་དགོས་པའི་ལས་ཀ་རེ་བྱེད་རྒྱུ་དེ་ང་ཚོའི་ཕྲག་ཏུ་འབབས་པའི་ལས་འགན་གཙོ་བོ་ཤིག་རེད་ལ་དེ་ནི་སྙིང་སྟོབས་བསྐྱེད་དགོས་པའི་གནས་ཚུལ་འགངས་ཆེན་ཤིག་ཏུ་རེད་དོ།

གང་ལྟར་ཀྱང་རང་མི་རིགས་ཀྱི་རིག་གནས་ཏེ་ཆོས་ལུགས་ཀྱི་རིག་གནས་དམངས་སྲོལ་རིག་གནས་དེང་རབས་རིག་གནས་སོགས་རྒྱུན་འཛིན་བྱས་ཏེ་འཛམ་གླིང་སྟེང་ལ་རང་མི་རིགས་འདི་ཉིད་གང་འདྲ་ཡིན་མིན་ངོ་སྤྲོད་དང་བརྒྱུད་བསྒྲོགས་བྱེད་རྒྱུ་དེ་ད་ལྟ་ང་ཚོའི་ཁ་ཚ་དགོས་གཏུགས་ཀྱི་གནས་ཚུལ་ཞིག་ཏུ་ངོས་འཛིན་བྱེད་ན་འགྲིག་སྙམ་ལགས།

དེ་མིན་ཁ་ཕོ་ཙམ་གྱིས་ང་ཚོ་བོད་ཀྱི་རིག་གནས་ནི་འཛམ་གླིང་ལས་ཆེས་ཡ་མཚན་ཅན་དང་དགེ་མཚན་གང་གིས་ཆ་ནས་ཀྱང་འགྲན་དུ་མེད་པ་དང་དོ་ཟླ་བྲལ་བའི་རིག་གནས་ཤིག་ཡིན་པར་རློམ་ནས་ནུས་པ་གང་ཡང་ཐོན་མི་སྲིད་པས་དུས་རབས་ཉེར་གཅིག་པའམ་གོ་ལ་ཅན་གྱི་དུས་སྐབས་འདི་རུ་སྐྱེས་བུ་སུ་དང་སུ་ཡིན་ནམ་འང་འདྲ་ཚང་མས་མིག་མཐོང་ལག་ཟིན་ནམ་བདེན་དཔང་མངོན་སུམ་ཞིག་མེད་ན་རིག་གནས་དང་བྱ་བ་དངོས་པོ་སོགས་གང་ཡིན་ཀྱང་ཁས་ལེན་ནམ་ཡིད་ཆེས་སོགས་གཏན་ནས་བྱེད་མི་སྲིད་པས་ད་སྐབས་ང་ཚོས་འཛམ་གླིང་ལ་ཁ་ཕྱོགས་ཏེ་ཆ་འཕྲིན་ལག་རྩལ་དུས་རབས་ཀྱི་རྗེས་སུ་བསྙེགས་པ་དང༌། ང་ཚོ་ལ་ཡིད་ཆེས་བྱེད་འོས་པ་བདེན་དཔང་ཡོད་པ་ཞིག་དང༌། དེ་བཞིན་གངས་ཅན་བོད་པའི་བསྟན་པའམ་ཆོས་ལུགས་ཕན་ཚུན་ཁག་ཚང་མ་མཐུན་སྒྲིལ་གྱི་སྒོ་ཀུན་ནས་འབྱེད་ཅིང་གངས་རིའི་རིང་ལུགས་ཀྱི་ཆོས་ལུགས་ཁག་ཚང་མས་དམིགས་པ་གཅིག་ཏེ་གནས་སྐབས་ཐར་པ་མཐར་ཐུག་ཐམས་ཅད་མཁྱེན་པའི་གོ་འཕང་རིན་པོ་ཆེ་སྒྲུབ་པ་དང་ལྟ་བ་བླ་ན་མེད་པ་རྫོགས་པ་ཆེན་པོའི་ལྟ་བ་སྤྱོད་པ་འཚེ་མེད་འདུལ་བའི་སྤྱོད་པ་སྒོམ་པ་དྲི་མེད་མཁའ་ལྟར་དག་པའི་དམིགས་པ་མེད་པ་འབྲས་བུ་བླ་མེད་བྱང་ཆུབ་རིན་པོ་ཆེ་བཅས་ལ་དམིགས་ཡུལ་དུ་བྱས་ནས་རང་སོ་སོའི་བསྟན་པའི་ལྟ་བ་གཙོ་བོར་བཟུང་སྟེ་རིས་མེད་བསྟན་ལ་དག་སྣང་ཀུན་ནས་སློང་པ། ཡུལ་དཀོན་མཆོག་གནས་བཞིའམ་རིན་ཆེན་རྣམ་གསུམ་གྲགས་པའི་དབྱངས་སྙན་པོ་སྲིད་པ་གསུམ་ན་ཕེབས་དཀའ་བ་དེ་ལས་གདུལ་བྱའི་མཐུན་མོངས་སྣང་ངོར་སོ་སོའི་ཐ་དད་དུ་གྱུར་མོད་ལྟ་སྒོམ་སྤྱོད་འབྲས་སོགས་ཀྱི་ཆ་ནས་ཐམས་ཅད་ལམ་གཅིག་རོལ་གཅིག་ཤར་ནས་སྤྱིར་སེམས་ཅན་ཐམས་ཅད་དང་སྒོས་སུ་རང་མི་རིགས་ཀྱི་བདེ་སྡུག་སེལ་བའི་ཕྱིར་དང་ཡང་སྒོས་ཚེ་འདིར་ལྷ་སྐལ་བབས་པའི་སངས་རྒྱས་གཡུང་དྲུང་བོན་གྱི་བསྟན་པ་འདི་ཉིད་ཕྱོགས་བཅུ་ཀུན་ཏུ་དར་སྤེལ་དང་བརྒྱུད་བསྒྲོགས་འཛམ་གླིང་ལ་རང་ཉིད་ངོ་ནོངས་མི་དགོས་པའི་བྱ་བ་གལ་ཆེན་ནམ་དོན་པོ་ཆེ་ཞིག་སྒྲུབ་རྒྱུ་དེ་མ་བགོས་སྤྱི་ལ་བཞག་པའི་རང་ཉིད་ཀྱི་འོས་འགན་དང་མི་སོ་སོའི་ཕྲག་ཏུ་བབས་པའི་བྱ་བ་ཞིག་རེད།

དེ་མིན་རང་མི་རིགས་ཀྱི་རིག་གནས་དང་དམངས་སྲོལ་གོམས་གཤིས་སོགས་ཀྱི་གནས་ལ་ཟུར་ཙམ་ཕྱོགས་ཙམ་ཡང་མ་ཤེས་ན་རྗེས་ཕྱོགས་ཏེ་མ་འོངས་པའི་མདུན་ལམ་རིང་མོ་སྟེ་རང་ཉིད་ཀྱིས་རང་ཉིད་ཀྱི་ལམ་དེ་སྒོ་དགག་པ་ཞིག་ལས་གང་མ་མཆིས།

ད་རང་ཉིད་ཀྱི་བསམ་བློ་ནི་རང་ཉིད་ཀྱིས་བསྒྱུར་བཅོས་བྱེད་དགོས་པ་ལས་གཞན་གང་གིས་ཀྱང་བསྒྱུར་བཅོས་དང་བཀོད་སྒྲིག་མི་ཡོང་བ་ཀུན་གྱིས་མཁྱེན་གསལ་ལྟར།

སྤྱིར་གངས་ལྗོངས་ཀྱི་བཅུ་ཕྲག་རིག་པའི་གནས་འདི་མི་རིགས་གཞན་དག་འགའ་དང་བསྡུར་ན་ཆེས་ངོ་མཚར་བ་དང་ཆེས་མཛེས་སྡུག་ལྡན་པའི་སྒྱུ་རྩལ་གྱི་དོ་ར་ཞིག་ཏུ་ངོས་འཛིན་བྱེད་ན་མི་ཆོག་པར་མེད་དོ། །