༧དེ་ལ་འདིར་དད་པ་བཤད་པ་ལ།༡ དད་པའི་ངོ་བོ།༢ བཙལ་ཐབས།༣ དབྱེ་བ།༤ གང་ལ་བརྟེན་ནས་གང་ཞིག་སྐྱེ་བ།༥ལྡོག་ན་གསོ་ཐབས།༦ ཡོད་མེད་ཀྱི་རྟགས།༧ སྐྱོན་ཡོན་བཤད་པ་དང་བདུན་ལས།༡ དང་པོ་དད་པའི་ངོ་བོ་ནི། སྡེ་སྣོད་མཛོད་ལས། དེ་ལ་དད་པའི་དངོས་པོ་ཡུལ་ལ་མོས།། ཞེས་གསུངས་པར་ལྟར།  ཡུལ་ཁྱད་པར་ཅན་གྱི་རྗེས་སུ་མོས་པའི་བློ་འཇུག་པ་སྐོམ་པ་ཆུས་གདུང་བ་ལྟ་བུ་ཏེ།  འདི་བསྟན་གྱི་དད་པའི་ངོ་བོ་ཡིན་ཏེ།    མེ་སྟོན་གྱི་སུམ་བརྒྱ་པ་ལས།  གང་ཟག་སྐོམ་པ་གང་ཞིག་ཆུས་གདུང་བཞིན།  ། དད་པས་སྔོན་ལ་དགེ་བར་མོས་ཞེས་བཤད། ། ཅེས་དང༌།   མཛོད་ལས།   དད་པའི་དངོས་པོ་དགེ་ལ་མོས།  །  ཞེས་གསུངས།   ༢  གཉིས་པ་བཙལ་ཐབས་ནི།    སྡེ་སྣོད་མཛོད་ལས།   བཙལ་ཐབས་ཡུལ་གྱི་ཡོན་ཏན་དྲན་པའོ། ། ཞེས་གསུངས་པར་ལྟར།  དད་པ་དེ་རང་གི་རྒྱུད་ལ་མེད་ན་དཀོན་མཆོག་གསུམ་གྱི་ཡོན་ཏན་བསམ་གྱིས་མི་ཁྱབ་པ་དག་ཡང་དང་ཡང་དུ་དྲ་པ་དང༌།   བཀའ་ལུང་ལ་བལྟ་རྟོག་བྱེད་པ་དང༌།  གང་ཟག་ཁྱད་པར་ཅན་ལ་བརྟེན་པས་དཔེར་ན་སྤང་ལ་ཆུ་བརྡོལ་བ་བཞིན་དུ།   དད་པ་བཞི་པོ་རང་རྒྱུད་ལ་རིམ་གྱིས་སྐྱེ་བ་སྟེ།   སུམ་བརྒྱ་པ་ལས།    སྤང་ལ་ཆུ་བརྡོལ་བཀག་པས་མི་ཁོག་བཞིན། ། དེ་ལ་བརྟེན་དེ་ནི་སྐྱེ་བར་འགྱུར།  ། ཞེས་སོ།   ༣  གསུམ་པ་དབྱེ་བ་ནི།  སྡེ་སྣོད་མཛོད་ལས།  མོས་པས་རྗེས་འཇུག་དྭངས་བས་དགེ་སྡིག་འབྱེད། ། ཡིད་ཆེས་མི་ལྡོག་མཐར་ཕྱིན་གནས་སུ་བསྐྱལ། ། དད་པས་བྱེད་ལས་གོ་རིམ་དེ་བཞིན་ནོ།། ཞེས་དང༌།  ཡང་རྩེར་ཀློང་ཆེན་ལས།  མོས་པའི་དད་པ་དང༌།  དྭངས་པའི་དད་པ་དང༌།  ཡིད་ཆེས་པའི་དད་པ་དང༌།   མཐར་ཕྱིན་པའི་དད་པ་དང་བཞི།   ཞེས་གསུངས་པར་ལྟར་བཞི་ཡོད་པ་ལས།   ༡ དང་པོ་མོས་པའི་དད་པ་ནི།    བླ་མ་དགེ་བའི་བཤེས་གཉེན་ནམ་སྐྱེས་བུ་དམ་པ་དག་གི་ཞལ་མཇལ་བའམ།   མིན་ཀྱང་དེ་དག་གི་ཡོན་ཏན་དང་རྣམ་ཐར་སོགས་ཐོས་པ་ལྟ་བུའི་རྐྱེན་གྱིས་འཕྲལ་ལ་ཐུགས་རྗེ་མ་ཆུང་སྙམ་དུ་རྒྱུད་ལ་དད་པ་ལྷངས་ཀྱིས་སྐྱེ་ཏེ།   དཔེར་ན་མའི་ཕྱི་ནས་བུ་ཚ་ཆུང་ངུ་འབྲངས་པ་ལྟ་བུ།   དེའི་རྗེས་སུ་འཇུག་པར་འདོད་པའི་སེམས་དགའ་ཡལ་ལེ་བ་དེ་ལ་མོས་པའི་དད་པ་ཞེས་ཟེར་ཏེ།  སུམ་བརྒྱ་པ་ལས།  མ་ཡི་ཕྱིན་བཞིན་བུ་གཞོན་འབྲང་བ་ལྟར། །  མོས་པའི་དད་པས་བསྟན་པ་ལ་འཇུག་འགྱུར།། ཞེས་གསུངས།   ༢  གཉིས་པ་དྭངས་པའི་དད་པ་ནི།   དེ་ལྟར་མོས་པའི་དད་པས་བླ་མ་ཚུལ་བཞིན་བསྟེན་ནས་ཐོས་བསམ་གྱི་ཤེས་རབ་རྒྱས་པའི་སྐབས་སུ་དེས་རྐྱེན་བྱས་ནས།  འཁོར་བ་སྡུག་བསལ་གྱི་རང་བཞིན་དུ་མཐོང་ནས་དེ་དང་བྲལ་འདོད།  མྱ་ངན་ལས་འདས་པ་བདེ་བའི་རང་བཞིན་དུ་མཐོང་ནས་དེ་ལ་ཐོབ་འདོད།   སྡིག་པའི་ཉེས་དམིགས་མཐོང་ནས་དེ་ལ་སྤང་འདོད།  དགེ་བའི་ཕན་ཡོན་མཐོང་ནས་དེ་ལ་བསྒྲུབ་འདོད་སྐྱེས་ཏེ།    དཔེར་ན་ནོར་བུ་ཆུ་འདང་ཞེས་བྱ་བས་ཆུའི་དྭངས་སྙིགས་འབྱེད་པ་བཞིན་དུ།   ཡིད་དགེ་བ་ལ་སྤྲོ་ཞིང་དགེ་སྡིག་གི་སྐྱོན་ཡོན་འབྱེད་ཤེས་པ་དེ་ལ་དྭངས་པའི་དད་པ་ཞེས་ཟེར་ཏེ།  ཡང་སུམ་བརྒྱ་པ་ལས།    ནོར་བུ་ཆུ་འདངས་རྫས་ཀྱིས་ཆུ་རྙོག་སེལ། ། དྭངས་པའི་དད་པས་སྤྲོར་འགྱུར་དགེ་སྡིག་འབྱེད།  །ཅེས་གསུངས།