གཅིག་ཐིག་བཅུ་ཡི་བཞི་གཅིག་བཞི་སྟེང་དུ། །

གཅིག་སྒྲིལ་ཡུལ་ཤུལ་གནས་མཆོག་དམ་པ་རུ། །

གཅིག་སེམས་ཕམ་པའི་འབྱུང་འཁྲུགས་དྲག་འགུལ་གྱིས། །

གཅིག་ཁྲི་འགའ་ཡི་ཚེ་སྲོག་འཕྲོག་པར་བྱས། །

བཅུ་གཅིག་གཅིག་བཞི་དུས་དྲན་ཆེན་མོའི་ཉིན། །

བཅུ་ཕྲག་གདུང་སེམས་མཉམ་བསྐྱེད་སྤོབས་པ་སྟེ། །

བཅུ་ཕྲག་ཐལ་མོ་སྙིང་གི་དཀྱིལ་བཟུང་སྟེ། །

བཅུ་ཕྲག་དགེ་བཅུ་དཔལ་གྱིས་མྱ་འདས་སྔོན། །

བཞི་གཅིག་བཞི་ཡིས་གདུག་སེམས་རུ་ང་ཞིག །

བཞི་གསུམ་མདོར་གནས་ཡུལ་ཤུལ་གནས་ཤིག་ལ། །

བཞི་གཉིས་ཟིན་མིན་ཡས་ཀྱི་ས་འཁྲུགས་ཀྱིས། །

བཞི་གཅིག་བཞི་ཡིས་དོན་ཆེན་ཞེས་སུ་གྲགས། །

དུས་ཀྱི་སྙིགས་མ་ཞེས་པའི་ལྔ་བདོའི་དུས། །

དུས་འཁྲུགས་དུག་རླངས་འཛམ་གླིང་ཡུལ་ཕྱོགས་ཀུན། །

དུས་མིན་མི་བདེ་ནད་མཚོན་བསྐལ་ཞི་སྟེ། །

དུས་བདེ་དགེ་མཚན་ཕྱོགས་ཁྱབ་ཤོག །

ཡུལ་གྱི་སྙིང་བོ་འཛམ་གླིང་ཡང་རྩེ་རུ། །

ཡུལ་ལུང་ཁམས་རླུང་སྤུས་གཙང་གིས་བཀང་ཞིང་། །

ཡུལ་ལུང་ས་འབུར་རྡོ་འབུར་སློག་འཁྲུགས་རྐྱེན། །

ཡུལ་ཁམས་ཀུན་ལ་མི་བདེ་ཁྱབ་པ་སྐྱོ། །

གང་དག་མྱ་ངན་འདས་པའི་འགྲོ་བ་རྣམས། །

གང་ཞིག་བདེ་ཆེན་གོ་འཕང་མངོན་ཐོབ་ཅིང་། །

གང་དག་འཚོ་བཞེས་གནང་བའི་སྐྱེ་འགྲོ་རྣམས། །

གང་ཡང་བདེ་སྐྱིད་འཚོ་བའི་བདེ་ལྡན་ཤོག །

སྒོ་གསུམ་དགེ་བའི་ལས་ཚོགས་གང་བསྒྲུབས་པ། །

ཁམས་གསུམ་འགྲོ་བའི་དོན་དུ་བསྔོ་སྨོན་གདབ། །

དུག་གསུམ་སྡིག་སྒྲིབ་མ་ལུས་བྱང་ནས་ནི། །

སྐུ་གསུམ་བདེ་ཆེན་གོ་འཕང་མྱུར་འགྲུབ་ཤོག །

ཨཱོྃ་མ་ཏྲི་མུ་ཡེ་ས་ལེ་འདུཿ ཨཱོྃ་མ་ཏྲི་མུ་ཡེ་ས་ལེ་འདུཿ

ཞེས་ཡུལ་ཤུལ་ལ་ས་འགུལ་བྱུང་ནས་ལོ་ངོ་གཅིག་སོང་བས་དུས་དྲན་དུ་རིན་སྤུངས་ཚུལ་བསྟན་ནས་༢༠༡༡ལོའི་ཟླ༤བའི་ཚེས་༡༣གྱི་མཚན་མོ་ཆུ་ཚོད་༢༣སྟེང་གང་མགྱོགས་སུག་བྲིས་བྱས་ཏེ་ཕུལ་བའོ། །