དྲ་གྲོགས་ལྷན་རྒྱས། སྐུ་ཁམས་བཟང་། དེ་ཡང་༼ཧི་མ་ལ་ཡའི་བོན་ནམ་ཧི་བོན་ཟིན་བྲིས༽འདི་ནི། ངེད་༼ཧི་མ་ལ་ཡའི་བོན་༽དྲ་བའི་གཙོ་སྒྲུབ་པ་རྣམས་ཀྱིས་གཡུང་དྲུང་བོན་ལུགས་འཛིན་པ་རྣམས་ལ་ཆེད་དམིགས་ཀྱིས་དཀའ་ངལ་སྣ་ཚོགས་ཁྱད་བསད་བྱས་ནས་བཟོས་པ་ཞིག་ཡིན་ལ། ཧི་མ་ལ་ཡའི་ཡིག་གཟུགས་ཀྱི་ལམ་ནས་སྤེལ་བའི་གཡུང་དྲུང་བོན་དང་འབྲེལ་བའི་ཟིན་བྲིས་ཐོག་མ་ཡང་ཡིན། དེ་ཕྱིར༼ཧི་བོན་ཟིན་བྲིས༽སུ་བཞུགས་པའི་སྤུན་གྲོགས་དག་ནས་གཙོ་བོ་གངས་ཅན་བོད་ཀྱི་རིག་གཞུང་མ་ལག་གཡུང་དྲུང་བོན་གྱི་བསྟན་པའི་གཞུང་ལུགས་དང་འབྲེལ་བའི་རྩོམ་རིག་སྣ་ཚོགས་ཏེ། བོན་གྱི་གྲུབ་མཐའ་དང་། རིག་གཞུང་། ཤེས་རིག ལོ་རྒྱུས། དཔྱད་རྩོམ། སྙན་རྩོམ། འབེལ་གཏམ། མི་སྣ་ངོ་སྤྲོད། དགོན་སྡེ་རི་ཁྲོད། གནས་རི། གནའ་ཤུལ་གྲགས་ཅན་གྱི་ངོ་སྤྲོད་སོགས་ཀྱིས་མཚོན་པའི་རྩོམ་ལུས་སྣ་ཚོགས་སྤེལ་ཏེ་རིག་གཞུང་ཞིབ་བསྡུར་དང་། བརྒྱུད་བསྒྲོགས་དར་སྤེལ། ལྟ་ཚུལ་འདོན་སྤྲོད་བཅས་ཀྱི་སྒོ་ནས་ལོ་རྒྱུས་ཀྱི་རྒྱུན་རིང་བའི་གནའ་བོའི་རིག་གཞུང་འདིའི་ཁྱད་བོན་ས་སྒང་ཧྲིལ་བོར་མྱོང་ཚོར་དང་ངེས་ཟིན་ཟབ་མོ་ཐོབ་ཏུ་འཇུག་དགོས། དེ་ནི་ང་ཚོས༼ཧི་བོན་ཟིན་བྲིས༽བསྒྲུབས་པའི་ཁ་ཕྱོགས་དང་དམིགས་ཡུལ་གཙོ་བོ་ཡང་ཡིན་པས་དེའི་ལུགས་ཐུགས་ལ་འཇགས་པར་མཁྱེན། རྩོམ་ཡིག་སྤེལ་སྐབས་རྒྱལ་ཁབ་ཀྱི་ཁྲིམས་ལུགས་ལ་གཅེས་འཛིན་དང་གྲུབ་མཐའ་ཕན་ཚུན་གྱི་བར། མི་རིགས་ཁག་དང་བླ་སྤྲུལ་བར་མི་མཐུན་ཕུང་དཀྲུགས་ཀྱི་རིགས་རྣམས་རིང་དུ་དོར་ནས་མཐུན་སྒྲིལ་གྱི་ལྟ་བ་དཀྱིས་སུ་འཛིན་རྒྱུ་གལ།

ལྐུགས་པ་ཁ་འབྱེད་འཕྲུལ་ངག་བདེན་པའི་བོན། །
ལྷ་མི་ལ་སོགས་སེམས་ཅན་ཐམས་ཅད་ལ། །
སོ་སོ་རང་རང་སྒྲ་སྐད་ཅི་བཞིན་དུ། །
འགྲོ་བ་རྣམས་ལ་བོན་གྱི་ཆར་འབེབས་ཤོག །