བློ་གཏད་བཅུ་ཕྲག་གི་གླུ།
དཔལ་ནམ་མཁའ་ལྟ་བུའི་རྣལ་འབྱོར་བ།།
མཚན་ཡོངས་གྲགས་རྒྱལ་བ་ཚུལ་ཁྲིམས་ཞེས།།
དོན་སངས་རྒྱས་དངོས་དེར་ཕྱག་གིས་འདུད།།
ཕྲན་འདོ་མེད་བཙུན་པའི་གཟུགས་བརྙན་བདག།
དཔལ་སྔོན་བྱོན་གོང་མའི་བཞུགས་གནས་མཆོག།
ཚུལ་ངོ་མཚར་ཅན་གྱི་དབེན་པའི་རི།།
ཡིད་འཕྲེང་བའི་གླུ་ཞིག་དབྱངས་སུ་ལེན།།
སྐྱེ་དཀའ་བ་ལྷོ་རྒྱལ་འཛམ་བུའི་གླིང་།།
ཐོབ་དཀའ་བ་མཆོག་ཆེན་བཞི་ལྡན་རྟེན།།
དོན་ཡིད་བཞིན་ནོར་བུ་ལས་ལྷག་པའི།།
དཔེ་འཁོར་འདས་བསྒྲོད་པའི་ལམ་གྱི་མདོ།།
འདི་རྙེད་དུས་རྒྱལ་བ་གོང་མ་བཞིན།།
ཚུལ་དམ་པའི་རྣམ་ཐར་སྐྱོང་འདོད་ཀྱིས།།
ཕྲན་བདག་གི་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
ལུས་ལྟེ་ཁྲག་འདོར་བའི་ཕ་ཡུལ་དུ།།
དགྲ་ཞེ་ལ་སྡང་བའི་རླུང་འཚུབ་ཆེ།།
གཉེན་ཡིད་ལ་ཆགས་པའི་ལྕགས་སྒྲོག་དམ།།
དེ་བླང་དོར་མི་ཤེས་མུན་པ་འཐུག།
སྙན་མི་སྙན་ཚིག་གི་མཚོན་ཆ་རྣོ།།
སེམས་བཟོད་པའི་བུ་ཆུང་བདེ་སྐབས་མེད།།
དོན་དེ་ཕྱིར་བདག་ཡིད་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
ཡུལ་ཞིང་ཁང་ནོར་གྱི་བཙའ་རྫི་དང་།།
བུ་ཕ་མ་གཉེན་འབྲེལ་སྐྱོང་ཁུར་རྣམས།།
དོན་མ་བརྟགས་སྣང་ངོར་སྤྲོ་དགའ་ཡང་།།
ལམ་བྱང་ཆུབ་བསྒྲུབ་པའི་གེགས་རྐྱེན་དུ།།
མིང་སྙན་པོར་བཏགས་པའི་བདུད་རྗེ་ཡིན།།
སེམས་ཆགས་ཞེན་ཅན་རྣམས་འདི་ཡིས་བསླུས།།
དོན་དེ་ཕྱིར་བདག་ཡིད་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
ལུས་སྟོབས་ཤེད་དར་བའི་གཞོན་དུས་འདིར།།
གྲོགས་མེ་ཏོག་འཛུམ་འདྲ་མཛའ་མོར་བཀུགས།།
ལས་དགྲ་འདུལ་གཉེན་སྐྱོང་འབའ་ཞིག་གིས།།
དུས་འདས་ཚེ་བསམ་བློ་མི་ཤེས་ཀྱང་།།
མགོ་འཆི་བདག་ཁ་ཆུས་བྲན་པའི་ཚེ།།
བློ་འགྱོད་པའི་དུས་ཞིག་འབྱུང་ངེས་ཕྱིར།།
ཕྲན་བདག་གིས་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
ལས་ཟིན་པ་མེད་པའི་འཁོར་བའི་བོན།།
སེམས་རྩོལ་བས་ཅི་ལྟར་བསྒྲུབས་ན་ཡང་།།
དོན་ལྟོ་རྒྱབ་གསོ་བ་ཁོ་ནའི་ཆེད།།
ཚེ་ཕྱི་མར་སྐྱེས་ཆེན་འདེགས་པའི་དུས།།
རྒྱུ་ཟས་ནོར་ཡོད་ཀྱང་འཁྱེར་དབང་མེད།།
ལུས་འདི་ཡང་མལ་དུ་བཞག་དགོས་ཕྱིར།།
ཕྲན་བདག་གི་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
དགྲ་འཆི་བདག་བདུད་པོ་ཐོད་རྒོད་བཞིན།།
དུས་གློ་བུར་ཐོག་ཏུ་སླེབས་པའི་ཚེ།།
ནོར་བསགས་པ་ཡོད་ཀྱང་སླུ་ས་མེད།།
གྲོགས་ཆུང་མ་བུ་དང་འགྲོགས་དབང་མེད།།
གཉེན་ཉེ་འབྲེལ་ཤི་གསོན་འབྲེལ་ཐག་ཆད།།
གདོང་མིག་ཆུ་འཐོར་ཞིང་འགྲོ་དགོས་ཕྱིར།།
ཕྲན་བདག་གི་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
གཉེན་མཛའ་བཤེས་ཕ་མའི་བརྩེ་གདུང་དང་།།
ཡུལ་འདོད་ཡོན་དགའ་བའི་ལོངས་སྤྱོད་དང་།།
ཆེ་སྙན་གྲགས་བཀུར་བསྟི་བྱས་པ་སོགས།།
ཀུན་ལུས་མེད་བདུད་ཀྱི་འཆིང་ཞགས་རེད།།
བོན་འཇིག་རྟེན་འཁོར་བའི་ཕུན་ཚོགས་རྣམས།།
མཆོག་རྒྱལ་བ་རྣམས་ཀྱིས་སྨད་པའི་ཕྱིར།།
ཕྲག་བདག་གི་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
མཆོག་སྐྱེས་བུ་དམ་པའི་བསྔགས་པའི་ཡུལ།།
རི་སྤོ་མཐོན་ས་གཙང་ཉམས་དགའ་ཞིང་།།
གནས་ལྷ་ཡུལ་ལྟ་བུའི་དབེན་ཁྲོད་དུ།།
ལུས་མི་ལྟོ་བ་ཡི་ཆས་སུ་ཞུགས།།
ངག་མི་སྨྲ་ལྐུགས་པའི་བརྟུལ་ཤུགས་བསླབ།།
སེམས་རྣལ་དུ་ཕབ་ནས་བསྒོམ་འདོད་ཀྱིས།།
ཕྲག་བདག་གི་སེམས་པ་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
སེང་དཀར་མོ་འགྱིང་བའི་གངས་ཁྲོད་དང་།།
གཅན་སྟག་མོ་འགྲིམས་པའི་ནགས་ཚལ་ཀློང་།།
བྱ་རྒོད་པོ་འཁྲེས་པའི་བྲག་ཕུག་དང་།།
འབྲོང་དར་མ་རྒྱུ་བའི་རྫ་སྐྱིབས་ན།།
མིས་བདག་བཟུང་མེད་པའི་གནས་ཁང་མང་།།
ཆར་ཆུ་ཐིག་འཇིག་པའི་དྭོགས་པ་མེད།།
དོན་དེ་ཕྱིར་དབེན་པའི་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
ཤིང་བྱང་ཆུབ་ལྗོན་པའི་བསིལ་གྲིབ་དང་།།
རྩྭ་འཇག་མས་བསྐྲུན་པའི་སྐྱིལ་བོ་དང་།།
རྐྱང་མ་བུ་བརྩེ་བའི་སྤངས་ཀྱི་ལྗོངས།།
བྱ་ངང་བ་འདུ་བའི་མཚོ་གླིང་རྣམས།།
རྗེ་སྒོམ་ཆེན་གོང་མའི་བཞུགས་གནས་ཡིན།།
གནས་དེ་ན་བདེ་སྐྱིད་གཏེར་ཁ་ཡོད།།
དོན་དེ་ཕྱིར་དབེན་པའི་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
གནས་ངོ་མཚར་ལུང་སྟོང་དགོན་པ་ན།།
ཆུའི་ལྷུང་སྒྲས་ཉམས་ཀྱི་གསལ་གྲོགས་བྱེད།།
བྱ་བྱི་འུས་མི་སྙན་སྒྲོག་མི་ཤེས།།
ཉམས་འཆའ་བའི་རི་དྭགས་བག་ཕེབ་ཏུ།།
ལུས་རྩེད་འཇོ་བྱེད་ལ་ལྟད་མོ་མང་།།
སེམས་ཉོན་མོངས་སློང་བའི་ཡུལ་རྐྱེན་མེད།།
དོན་དེ་ཕྱིར་དབེན་པའི་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
གནས་ཚལ་གསར་འཛུམ་པའི་དོ་ར་ན།།
འབུ་བུང་བས་གླུ་ཆུང་ལེན་རྐྱེན་གྱིས།།
ཉམས་མགུར་གླུ་ལེན་ལ་སྤྲོ་རུ་འཇུག།
ཕྱི་སྣང་ཡུལ་དེ་ཡི་སློབ་དཔོན་གྱིས།།
དོན་སེམས་ལ་གདམས་ངག་འཆར་དུ་འཇུག།
དོན་སངས་རྒྱས་འཁྲུལ་མེད་རང་ལས་འཁྲུངས།།
དོན་དེ་ཕྱིར་དབེན་པའི་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
སོ་རབ་ཏུ་གསོད་པའི་དབེན་པ་ན།།
དུས་རིང་ནས་ངལ་བའི་སེམས་ཉིད་འདི།།
གཤིས་མ་བཅོས་སྐྱོང་བའི་གང་ཟག་དེ།།
མཆོག་རྩ་གསུམ་རྒྱལ་བས་ཉེ་བར་གཟིགས།།
ལྷ་དཀར་ཕྱོགས་ཚོགས་ཀྱིས་མཐུན་རྐྱེན་སྒྲུབ།།
ཚེ་འདི་ཕྱིའི་བདེ་སྐྱིད་འགྲུབ་པ་ཡིན།།
དོན་དེ་ཕྱིར་དབེན་པའི་རི་ལ་སྐྱོ།།
རི་ངོ་མཚར་ཅན་ནས་བསྒོམ་ལ་སྤྲོ།།
སེམས་དབེན་པར་སྤྲོ་པའི་གླུ་ཡི་ཚོམ།།
གྲངས་བཅུ་གསུམ་དབྱངས་སུ་བླངས་པའི་དགེས།།
ཕ་བླ་མའི་རྣམ་ཐར་རྗེས་ཟིན་ནས།།
ཚེ་སྒྲུབ་པ་རི་ལ་སྐྱེལ་ནུས་ཤོག། །།
- ཟིན་ཐོ་གོང་མ།གཡུང་དྲུང་།
- ཟིན་ཐོ་འོག་མ།རྣལ་འབྱོར་བ།