སུས་ཀྱང་མ་ཚོར་བར་འཁྱགས་ཤི་ཐེབས་ཚུལ།
རྐང་རྗེན།
ས་རྡོའི་གསེང་ན་མུ་གེ་ཡིས་མནར་བ་དག
གད་སྐྱིབས་དག་ན་ངུ་དངངས་ཀྱིས་འདར་བ་དག
གོས་ཆེན་རུམ་ན་ཚེར་མ་ཡིས་འཇིགས་པ་དག
དབྱར་གཞུང་དག་ལ་ཙག་རླུང་གིས་བསྡམས་པ་དག
ཐང་ཆེན་དག་ན་ཆུང་དོག་གིས་འཁྲུལ་བ་དག
ན་ནིང་གི་ན་ནིང་དང་སང་ལོ་ཡི་སང་ལོར།
སུ་ལའང་ཐར་ས་མེད།
དར་ལྕོག་སྣེ་ལ་འཚངས་པའི་ལྷ་སྐད་དག
ཟོར་བའི་མངར་ཁུག་ནས་རྫོགས་པའི་ནས་རྩྭའི་ཡུ་བ་དག
རླུང་ལ་བསྐུར་བའི་རྩམ་སྐྱའི་གཤོག་པ་དག
བཞོ་ཟེའུ་ཁ་ཡི་འབྲི་མོའི་རྨུག་རྡུལ་དག
རྡང་ཐག་རུལ་གཞུག་གི་འབྲོག་ལྷས་ཀྱི་བེའུ་དག
ཐབ་ངོགས་ཀྱི་གྲང་ཤུར་ཤུར་གྱི་མེ་ལྕེ་དག
འོད་ཐིགས་དག་ལ་འཁྱག་ཤེད་སིམ་པའི་ནུབ་ཁར།
དངངས་སྐྲག་དག་ལ་སོ་སྒྲ་འདྲེས་པའི་སྨག་ཏུ།
རྨི་ལམ་དག་ན་མེ་མདའ་གཏད་པའི་སྐྱ་རེངས་སུ།
ནག་དྲེག་ཅན་གྱི་ངོ་གདོང་རེ་རེ།
ཁྲག་རྙོག་ལ་འཇིངས་པའི་སེམས་པ་ལྗན་ལྗིན།
སུས་ཀྱང་བཀྲུས་མ་བྱུང་།
སུས་ཀྱང་སྐྱབས་མ་བྱུང་།
མེ་ལོང་གི་ནམ་མཁའ་ལ།
ཁྲོམ་པའི་ནམ་མཁའ་ལ།
བྱ་ཁྲ་མ་ཐོན་པའི་སྔ་རོལ་ནས།
དྲ་རྒྱ་བཟོས་ཟིན།
ས་རྡོས་བཅད་ཟིན།
མེ་ལོང་ངོས་ཀྱི་གཤོག་པ་གཉོམ་པོ།
མེ་ལོང་གི་གཟེབ་ལས་རུལ།
ཁྲོམ་མཐིལ་གྱི་མཆོངས་ལྡིང་།
ཁྲོམ་པ་ནས་འཇགས།
མིག་མང་བོས་རིག་མ་བྱུང།
རྣ་མང་བོས་ཐོས་མ་བྱུང་།
དུས་ཚོད་ཀྱི་མདའ་རྩེ་ལས་གཞན།
སུས་ཀྱང་འཆད་མ་ཤེས། གཏམ་རྒྱུད་འདི།
ཁུ་ཚུར་འདི་དམ་དུ་བསྡམས་ཚུལ།
ཀི་རིང་ཞིག་རླུང་གིས་བཅོམས་ཚུལ།
སུས་ཀྱང་ཤེས་མ་བྱུང་།
སུས་ཀྱང་་་་་་་་་་་་་་་
