ཤེའུ་སྨུག་འཐོམས།
རྐང་རྗེན།
སུ་དང་གང་ལའང་བཤད་མི་ཤེས་བའི། ཡིག་འབྲུ་གང་གིས་ཀྱང་སྟོན་པར་མི་ནུས་པའི། ཐག་རིང་ན་ཡོད་འདྲའི། ཐག་ཉེ་ན་ཡོད་འདྲའི། གམ་ན་ཡོད་འདྲའི། སྨུག་པ་འདྲ་བའི། ཡོད་ཡོད་འདྲ་བའི། མེད་མེད་འདྲ་བའི། གནམ་ན་ཡོད་འདྲའི། ས་ལ་འབྱར་འདྲའི། གང་ཡང་མི་བསམ་པར། ཅི་ཡང་མི་བསྒྲུབ་པར། མཁའ་མཐའི་མཚམས་སྤྲིན་ལ་ལག་པ་བསྲིངས་དོན། སུ་ཞིག་གི་ཡིད་ལ་བརྣག་པའི་གཟུགས་མེད་ཀྱི་རྨ་ཁའི་དོན་ནམ། ཡང་ན་སུའི་སེམས་ན་གར་ཏུ་རྩེན་པའི་རྐང་ལག་ཀྱོལ་བོ་དེའི་དོན་ཡིན་ནམ།
མང་མང་འདྲ་བའི། ཉུང་ཉུང་འདྲ་བའི། སྔོ་སྔོ་འདྲ་བའི། སྐྱ་སྐྱ་འདྲ་བའི། བཟུང་བ་འདྲ་བའི། ཤོར་འགྲོ་བ་འདྲ་བའི། དགའ་སྣང་ཡིན་འདྲའི། སྡུག་སྣང་ཡིན་འདྲའི། སྲོག་ལ་འཐམས་པའི་དབུགས་རྒྱུན་གཉོམ་པོ། གདངས་དབྱངས་ཀྱ་ཀྱུ་ཞིག་གི་ཁུད་ན་སད་ཙམ་སད་ཙམ་བྱེད་དོན། སྤྲུལ་བའི་དམ་པོ་སུ་ཞིག་གིས་འགྲེལ་ནུས་སམ།
