ཟླ་བ་གཞོན་ནུ།

             རྐང་རྗེན།  

མིག་ཀོང་དུ་འཁྱིལ་བའི་སྐད་ཆའི་དྭངས་མ།

མཆི་མའི་མུ་ཏིག་གི་རྒྱུན་ཐག་ཆད་པ་ནང་བཞིན།

སྐྱ་ཐལ་བའི་མཁུར་མགོ་ན་རྦབ་རྡོ་བཞིན་ཉིལ།

སུའི་སེམས་གཞོང་བརླན་པ་ཡིན་ནམ།

དུས་ཚོད་ཀྱི་མདའ་རྩེས་དོད་པའི་གཉེར་མའི་ཡུར་བར།

སུ་ཚང་གི་བུ་ལོའི་འདང་བརྩེ་ཤོང་ངམ།

ཉག་ག་དེར་ལུས་པའི་ལ་གཞས་འཕྲོ་མ།

རྩྭ་མེ་ཏོག་གཉིས་ཀས་བརྩམ་མམ།

སྒེའུ་འགྲམ་གྱི་མེ་ཏོག་དམར་བོ་དེས།

སུ་ཞིག་གི་སུའི་ཆེད་དུ།

མཛེས་ཆས་སྣུམ་པོ་ཞིག་སྤྲས་པ་ཡིན་ནམ།

མཚེའུ་ངོགས་ཀྱི་ཟླ་བ་གཞོན་ནུ།

ཇི་འདྲར་གཡོས་ཀྱང་མི་དུབ་དོན།

སུས་བླུད་པའི་གསོས་སྨན་དེས་དྲིན་ནམ།

སེམས་པའི་ཐང་དཀྱིལ་ལ་བབས་པའི་ཟླ་བ་གཞོན་ནུ།

གཡོ་འགུལ་མི་མངོན་འདམ་ལ་ཟུག་དོན།

སུའི་སེམས་ལ་དཔྱངས་རྡོ་ཐོགས་སམ།