ཨ་མ་དྲན་པའི་མིག་ཆུ།།          ཕྱྭ་ག་བརྩོན་འགྲུས་མཐར་ཕྱིན།།

དམར་སེར་མཚམས་སྤྲིན་གྱི་ཀློང་ནས།།

སྲིད་པའི་སྒྲོན་མེ་དེ་བཞད་ཚེ།།

དགྱེས་འཛུམ་མ་ཡུམ་གྱི་ཞལ་རས།།

དྲན་པའི་རླབས་ཕྲེང་དེ་འཕྱུར་སོང་།།

                          ཆུ་འཛིན་བལ་དཀར་གྱི་འདབ་མ།།

                         བཅོས་མེད་རང་བཞིན་དུ་རྡོལ་ཚེ།།

                         དུང་མདོག་མ་ཡུམ་གྱི་ལན་བུ།།

                         དྲན་པའི་རླུང་བུ་དེ་ལྡང་སོང་།།

ལྗང་མདོག་ལྷ་ཤིང་གི་ཁྲོད་ནས།།

ངག་སྙན་དབྱངས༡་རྟ་རུ་འཐེན་ཚེ།།

བྱམས་ལྡན་མ་ཡུམ་གྱི་བསླབ་བྱ།།

དྲན་པའི་ཆུ་བོ་དེ་བཞུར་སོང་།།

                        འཚོ་བ་དབུལ་པོ་ཡི་ཁྲོད་ནས།།

                        བཀྲེན་པའི་སྡུག་བསྔལ་དེ་མྱོང་དུས།། 

                        བརྩེ་ལྡན་མ་ཡུམ་གྱི་ཕྱག་ཟས།། 

                         དྲན་པའི་མེ་དཔུང་དེ་འབར་སོང་།།

རང་ལུས་པད་དཀར་གྱི་འདབ་མ།།

གྲང་ལྷག་བཙན་པོ་ཡིས་བཅིང་དུས།།

ཡིད་སེམས་ཐོག་མེད་ཀྱི་རླུང་བུ་།།

ཨ་མའི་མདུན་ཕྱོགས་སུ་ཆས་སོང་།།

                          ཡུན་ཐུང་འཕྲད་པ་ཡིས་སྤྲོ་སྣང་།།

                           འཛུམ་དཀར་པད་མ་དེ་བཞད་ཀྱང་།།

                           བྲལ་ཁའི་སྨོན་སེམས་ཀྱི་ལྷ་དར།། 

                           དབང་མེད་མཆི་མ་ཡིས་བརླན་སོང་།།

དམར་སེར་འདུས་སྡེ་ཡི་གྲལ་དུ།།

བཅུ་རིག་འཚོ་བ་དེ་རོལ་བཞིན།།

ཐུགས་སྨོན་འགྱུར་མེད་ཀྱི་ལྷ་དར།།

ཨ་མའི་ཞབས་རྟེན་དུ་ཕུལ་ཡོད།།

                         རི་ཆུ་སྟོང་ཕྲག་ལས་བརྒལ་བའི།།

                        བུ་ཆུང་འཁྱམས་པོ་ངའི་ལས་དབང་།།

                        སྨྱུག་རྩེར་མིག་ཆུ་ཡིས་བརླན་བཞིན།།

                        སོར་རྩེ་དབང་མེད་དུ་འཐོར་སོང་།།