ཁྱེད་ཚ་ཞང་རྣམ་གཉིས་ཕེབས་དོན་དེ་ཅི་ཞིག།

སྤུ་ཟེའི་དར་རྒོད།

བོན་ཐེག་དགུའི་སྙིང་ཐིག་གཞན་ཕན་གྱི་སྙིང་རྗེ། །

སྟོབས་ཡོངས་སུ་གྲུབ་པའི་ཁྱུང་ཡུལ་གྱི་གྲུབ་རིགས། །

དཔལ་མེ་སྟོན་རྒྱལ་བའི་གདམས་དོན་གྱི་རྒྱལ་ཚབ། །

ཁྱེད་ཚ་ཞང་རྣམ་གཉིས་ཚད་ཐུབ་ཀྱི་སྐྱབས་གནས། །

དུས་ངེས་མེད་རིག་གསར་གཉན་འཕྲང་དང་འཕྲད་ཀྱང་། །

ཐུགས་གཡོ་མེད་དམ་བཅས་བསྟན་སྲོག་ལ་དགོངས་ཏེ། །

ཁྲིམས་རྨ་མེད་འཛིན་པའི་དྲང་སྲོང་གི་དྲང་སྲོང་། །

ཁྱེད་ཚ་ཞང་རྣམ་གཉིས་ཚད་ཐུབ་ཀྱི་བཙུན་པ། །

སྐུ་སྒམ་པོས་མཆོད་སྦྱིན་རྫས་བསགས་ལ་བརྩོན་པ། །

གསུང་ཟབ་མོས་ཆོ་གའི་སྔགས་ཕྲེང་ལ་བསྙེན་པ། །

ཐུགས་བརྟན་པོས་བསྐྱེད་སྒོམ་འཕྲོ་འདུ་ལ་བཞོལ་བ། །

ཁྱེད་ཚ་ཞང་རྣམ་གཉིས་ཚད་ཐུབ་ཀྱི་སྔགས་པ། །

གཤིས་སྟོང་ཆེན་ཡིན་ལུགས་མངོན་སུམ་གྱིས་གཞལ་བ། །

རྩལ་སྣང་སྲིད་གཡོ་འཕྲུལ་ཇི་བཞིན་གྱི་བཀོད་པ། །

ཐུགས་ཉམས་ལེན་འགྲུབ་པའི་རྒྱན་མཆོག་ཏུ་བཞེས་པ། །

ཁྱེད་ཚ་ཞང་རྣམ་གཉིས་ཚད་ཐུབ་ཀྱི་རྫོགས་ཆེན། །

མཐོ་ངོ་བསྟོད་བྱེད་པའི་གཏམ་བཤད་ཀྱང་མ་རིག །

དམན་བྱམས་བརྩེས་བོར་བའི་ཚུགས་ཀ་ཞིག་མ་མཐོང་། །

བར་ཁ་ཁོག་འཛོལ་བའི་མཛད་པ་ཞིག་མ་མཇལ། །

ཁྱེད་ཚ་ཞང་རྣམ་གཉིས་ཚད་ཐུབ་ཀྱི་སྐྱེས་བུ། །

ཕྱི་གསས་ཁང་གསར་པའི་རྨིང་གཞི་རེ་བཏིང་ནས་། །

ནང་བཤད་སྒྲུབ་བསྟན་པ་ཐུགས་དམ་དུ་བཞེས་སྐབས། །

དུས་གློ་བུར་མཐའ་དག་ཞེན་མེད་དུ་བསྐྱུར་ནས། །

ཁྱེད་ཚ་ཞང་རྣམ་གཉིས་ཕེབས་དགོས་དེ་ཅི་ཞིག །

སྡུག་སང་མེད་མུན་པ་དགུ་འཁྲིགས་ཀྱི་གླིང་འདིར། །

མགོན་ལྷ་མེད་ཉམས་ངའི་དྭ་ཕྲུག་གི་ཚོགས་པས། །

ཡིད་སླད་མེད་གསོལ་སྨོན་གདུང་ཤུགས་ཀྱིས་གྱེར་བཞིན། །

ཁྱེད་ཚ་ཞང་ཉི་ཟླའི་ཡང་སྤྲུལ་ལ་བསྒུག་ཡོད། །

དུས་ངན་དགུ་མངོན་པའི་མཚན་རྟགས་ཤིག་མིན་ན། །

སྐུའི་དཀྱིལ་འཁོར་བཤིག་པའི་འཕྲིན་ལས་དེ་སྔ་ཕྱིར། །

འཁོར་དད་བརྒྱའི་སྐྱོ་བའི་རེ་སྨོན་ལ་གཞིག་སྟེ། །

ཁྱེད་ཚ་ཞང་རྣམ་གཉིས་མི་འགྱང་བར་ཕེབས་ཤོག། །།

ཅེས་འདི་རིགས་ཀྱིས་ཚ་ཞང་གྱུར་པའི་ཁྱུང་ཁོག་བསྟན་བདག་རྣམ་གཉིས་ལོ་འདིར་ལྷན་དུ་བཞུད་པ་ལ་ཡིད་སྐྱོ་བཞིན་རེ་འབོད་དུ་ཉེ་གནས་པ་ཤོ་ཁྲི་རྒྱལ་ནས་བྲིས།།