ཨ་མ་དྲན་པའི་མིག་ཆུ།།

                      _{ཕྱྭ་ག་བརྩོན་འགྲུས་མཐར་ཕྱིན།}

དམར་སེར་མཚམས་སྤྲིན་གྱི་ཀློང་ནས།།

སྲིད་པའི་སྒྲོན་མེ་དེ་བཞད་ཚེ།།

དགྱེས་འཛུམ་མ་ཡུམ་གྱི་ཞལ་རས།།

དྲན་པའི་རླབས་ཕྲེང་དེ་འཕྱུར་སོང་།།

           ཆུ་འཛིན་བལ་དཀར་གྱི་འདབ་མ།།

          བཅོས་མེད་རང་བཞིན་དུ་རྡོལ་ཚེ།།

          དུང་མདོག་མ་ཡུམ་གྱི་ལན་བུ།།

          དྲན་པའི་རླུང་བུ་དེ་ལྡང་སོང་།།

ལྗང་མདོག་ལྷ་ཤིང་གི་ཁྲོད་ནས།།

ངག་སྙན་དབྱང་རྟ་རུ་འཐེན་ཚེ།།

བྱམས་ལྡན་མ་ཡུམ་གྱི་བསླབ་བྱ།།

དྲན་པའི་ཆུ་བོ་དེ་བཞུར་སོང་།།

འཚོ་བ་དབུལ་པོ་ཡི་ཁྲོད་ནས།།

 བཀྲེན་པའི་སྡུག་བསྔལ་དེ་མྱོང་དུས།། 

 བརྩེ་ལྡན་མ་ཡུམ་གྱི་ཕྱག་ཟས།། 

དྲན་པའི་མེ་སྤུང་དེ་འབར་སོང་།།

རང་ལུས་པད་དཀར་གྱི་འདབ་མ།།

གྲང་ལྷག་བཙན་པོ་ཡིས་བཅིང་དུས།།

ཡིད་སེམས་ཐོག་མེད་ཀྱི་རླུང་བུ་།།

ཨ་མའི་མདུན་ཕྱོགས་སུ་ཆས་སོང་།།

 ཡུན་ཐུང་འཕྲད་པ་ཡིས་སྤྲོ་སྣང་།།

  དགྱེས་པའི་པད་མ་དེ་བཞད་ཀྱང་།།

   བྲལ་ཁའི་སྨོན་སེམས་ཀྱི་ལྷ་དར།། 

   དབང་མེད་མཆི་མ་ཡིས་བརླན་སོང་།།

དམར་སེར་འདུས་སྡེ་ཡི་གྲལ་དུ།།

བཅུ་རིག་འཚོ་བ་དེ་རོལ་བཞིན།།

ཐུགས་སྨོན་འགྱུར་མེད་ཀྱི་ལྷ་དར།།

ཨ་མའི་ཞབས་བརྟེན་དུ་ཕུལ་ཡོད།།

 རི་ཆུ་སྟོང་ཕྲག་ལས་བརྒལ་བའི།།

བུ་ཆུང་འཆམ་པོ་ངའི་ལས་དབང་།།

སྨྱུག་རྩེར་མིག་ཆུ་ཡིས་བརླན་བཞིན།།

སོར་རྩེར་དབང་མེད་དུ་འཐོར་སོང་།།