ཀ་རྩོམ།

ཀ་ལི་སུམ་ཅུ་ཐམ་པ་དེ།།

ཁ་ཕྱོགས་ཆོས་རང་གཏད་པ་མིན།།

ག་ཆད་ཐང་གི་འཇིག་རྟེན་ན།།

ང་རང་འཚོ་བའི་བདག་པོ་ཡིན་།།

ཅ་ཀ་སྲོག་གི་རྩ་བ་དེ།།

ཆ་ཚང་ཆོས་ལ་གཏོང་རྒྱུ་མིན།།

ཇ་མ་འཚོལ་བའི་བདག་པོ་དེ།།

ཉ་ཉོའི་སྐོམ་པ་སེལ་སླད་ཡིན།།

ཏ་ལེར་བྲིས་པའི་ཡི་གེའི་ཚོགས།།

ཐ་དག་སེམས་པ་འདུལ་བྱེད་མིན།།

ད་ལྟ་སྒྲུབ་པའི་འཁོར་བ་པའི།།

ན་ཟུག་ཕྱི་རུ་བཏོན་པ་ཡིན།།

པ་སངས་ལང་ཚོ་རྒྱས་པའི་བུ།།

ཕ་ལམ་ཆོས་རང་འཇུག་དོན་མེད།།

བ་གམ་ཅན་གྱི་ཁང་བཟང་ན།།

མ་བུའི་བརྩེ་བ་སྐྱོངས་སླད་ཡིན།།

ཙ་རིའི་ཞིང་གི་འཕྲང་ཆེན་དེ།།

ཚ་གྲང་དམྱལ་བའི་ལམ་རང་མིན།།

ཛ་དྲག་ཅན་གྱི་རྐང་གཉིས་མིའི།།

ཝ་ལེར་འཕྲད་པའི་དོན་དག་ཡིན།།

ཞྭ་ཆེན་མཁས་པའི་གསུངས་སྐད་དེ།།

ཟ་ཟིའི་གདོན་འཇོམས་གཅོད་རང་མིན།།

འ་འུར་ལ་ཞེན་ཆགས་སྡང་ཅན།།

ཡ་མེད་དཔའ་བོའི་ངར་སྐད་ཡིན།།

ར་རྒན་ཚེ་ཐར་གཏོང་རྒྱུ་དེ།།

ལ་རྒན་གཅིག་པུའི་ཆེད་དུ་མིན།།

ཤ་ཁྲག་ཁུར་བའི་འཇིག་རྟེན་པའི།།

ས་སྟེང་མཉམ་དུ་འཚོ་དོན་ཡིན།།

ཧ་ལམ་བཤད་ཚད་ཆོས་བཤད་མིན།།

ཨ་རོག་འཚོ་བའི་འཚོ་གཏམ་ཡིན།།