༼རྩེ་ཞྭ།༽

  བོན་ཀུན་འབྱུང་གནས་བོན་ཉིད་ཡེ་སྟོང་བོན་སྐུའི་བརྡ་རུ་རྩེ་ཞྭའི་ནང་ཤ་མཐིང་མདངས་ཏིང་ངེ་བརྡལ། བསྐལ་བཟང་སངས་རྒྱས་སྤྱི་བོར་རྒྱུན་དུ་བཞེངས་པའི་བརྡ་རུ་གསེར་སྐུད་ཟེར་བ་གཡོ་མེད་རྩེར་རེ་གཟེངས། འཁོར་དུ་གཤེན་ཕྲན་བསམ་ཡས་འདུས་འཚོགས་ཉན་པའི་བརྡ་རུ་གཞི་འགྲམ་གསེར་སྐུད་གྲངས་མེད་གཙངས་སེ་གཤིབས། གང་ཟག་ཟབ་པའི་ཐབས་ཤེས་ཟུང་དུ་འབྲེལ་བའི་བརྡ་རུ་རྣ་ཆ་མཉེན་འཇམ་སྙན་ཤ་ཧྲེང་ངེ་སྦྲིང་། ཕྱིན་དྲུག་སྤྱོད་པ་རྣམ་པར་དག་ཅིང་ཚངས་པའི་བརྡ་རུ་ཁུང་འགྱུར་གྲུ་རྣར་ཟུངས་སུ་ཟག་གེ་བཏབ། བསྡུ་དངོས་བཞི་ཡིས་གདུལ་བྱ་བཀྲིད་དྲང་མཛད་པའི་བརྡ་རུ་རྣ་རྩེ་ཟུར་བཞིར་རྣིལ་ཚར་འཇོལ་ལེ་འཛར། བོན་སྒོ་སྣ་ཚོགས་བསྡུ་ན་གཅིག་ཏུ་འདུས་པའི་བརྡ་རུ་མཐའ་ཆག་དམར་པོས་ཏམ་མེ་བསྐོར་བ་ལགས་སོ། །ངེས་ཚིག་ནི། རྒྱ་བྱའི་ཟེ་ལྟར་གཟིངས་པའི་རྩེ། །དབུ་ཡི་རྒྱན་དུ་སྒེག་པའི་ཞྭ། །

༼ཟླ་གམ།༽

   འཁོར་འདས་བོན་ཀུན་མ་འདྲེས་སོ་སོར་གསལ་བའི་བརྡ་རུ་ཟླ་གམ་རྐེད་པ་སྟོད་སྨད་ཕྱེད་དེ་བཅད། དོན་གྱི་དམ་པར་དེ་དག་དབྱེ་བསལ་བྲལ་བའི་བརྡ་རུ་སླར་ཡང་རང་སར་མཐུད་དེ་སྦྲེལ། གང་གི་བྱེད་པོ་གསལ་སྟོང་དབྱེར་མེད་གཤིས་ཀྱི་བརྡ་རུ་གོས་གཞི་གཅིག་ལ་ཇི་སྲིད་འདུ་ཤེས་ཡོད་པའི་བར། དེ་སྲིད་ཐེག་པའི་གྲངས་ལ་ཐེག་པ་མེད་པའི་བརྡ་རུ་སལ་སུལ་བརྒྱ་རུ་ཆ་ག་དེ་དེ་བསྡུས། པེའུ་རྩེ་གསུམ་གྱི་སྣང་ཚུལ་རང་ལ་རྫོགས་པའི་བརྡ་རུ་སུམ་བརྩེགས་ནོར་བུའི་ཕྲེང་རྒྱན་དཔྱང་ངེ་འཕྱང་། བརྩེ་ཆེན་རྣམ་བཞིས་སྐྱེ་རྒུ་རྟག་སྐྱོབ་རྩོམ་པའི་བརྡ་རུ་ཉིས་་ཆའི་གང་བ་རིང་འགྲོར་ཤད་དེ་རྐྱོང་། སྙིང་རྗེའི་ཡུལ་དུ་འགྲོ་དྲུག་གཅིག་ཏུ་འཛིན་པའི་བརྡ་རུ་ལྕགས་རི་སེར་པོས་མཐའ་ཀུན་ཧྲིལ་གྱིས་འཁྱུད་པ་ལགས་སོ། །ངེས་ཚིག་ནི། ཟླ་བ་ཕྱེད་པའི་དབྱིབས་འདྲ་གམ། །

ཞེས་པའི་ཚུལ་འདི་སྨྲ་དབང་ཀུན་དགའ་རང་གྲོལ་ལ་གཞན་སྡེའི་ལུགས་ཀྱི་འཚོགས་གཏམ་ཡོད་སྐད་ཀྱི་བཤད་སྒྲོས་ཐོས་པའི་ཚེ་རང་ལུགས་དྲི་མེད་ལུང་མཐུན་ཞིག་ཡོད་སྙམ་བསམ་ནས་སློབ་གྲྭ་སྒ་བཙུན་བློ་བཟང་རྒྱ་མཚོས་བསྐུར་བ་ལྟར་བསྐྲུན་པའོ། །མངྒ་ལཾ། དགེའོ། །

 ༧ཧོར་བ་དྲུང་རམས་པ་སྨྲ་དབང་བསྟན་འཛིན་བློ་གྲོས་རྒྱ་མཚོའི་གསུང་འབུམ་བར་ཆ་ལས་བཤུས།