བསྟན་དང་འགྲོ་བའི་ཁམས་ཀྱི་མོས་སྣང་བཞིན།།

གང་འདུལ་དེར་སྟོན་མཛད་བཟང་ཐབས་མཁས་ཅན། །

འགྲོ་བའི་མ་མའི་དབང་གཞུའི་འོད་འགྱེད་པའི། །

གྲགས་པའི་སྐྱེས་མཆོག་གང་དེ་ཕྱག་གི་ཡུལ། །

འཛམ་གླིང་ཡུལ་མཆོག་ཞང་ཞུང་རིག་པའི་ཚལ། །

སྟོང་ཕྲག་དུ་མའི་གོང་རོལ་སྐྱེ་འགྲོ་རྣམས། །

བདེ་སྐྱིད་དཔལ་འབར་གཏེར་ལ་ལོངས་སྤྱོད་པའི། །

སྐལ་བ་རྫོགས་ལྡན་དཔལ་ལ་གནས་པར་དགེ། །

སྐྱེས་མཆོག་མཇལ་བའི་སྐལ་བ་མ་ལྡན་ཀྱང༌། །

ཉིད་ཀྱི་མཚན་སྙན་བདག་གི་སྒྲ་འཛིན་གྱི། །

བུ་གར་འབྱོར་བའི་མོད་ལ་དད་འདུན་གྱི། །

མོས་པའི་བསྟོད་ཚིག་སྙིང་ནས་འཐོར་ཏེ་ཐལ། །

འགྲོ་ཀུན་སྡུག་བསྔལ་སྣ་ཚོགས་གདུང་བའི་སྐབས། །

ཁྱེད་ཉིད་སྨན་བླའི་རྒྱལ་པོར་སྐུར་བཞེངས་ཏེ། །

སེམས་ཅན་དུ་མ་བདེ་ལ་དཔལ་སྦྱིན་པའི། །

སངས་རྒྱས་སྨན་རྒྱལ་དེ་ལ་གུ་དུན་ཧྲུན། །

གངས་རིའི་རྭ་བས་ཡོངས་བསྐོར་ཁ་བའི་ལྗོངས། །

རིས་མེད་རྒྱལ་བའི་བསྟན་པ་རིན་པོ་ཆེ། །

འཛིན་སྐྱོང་སྤེལ་པའི་ལས་འགན་ཡོངས་བཞེས་པའི། །

བསྟན་འཛིན་སྐྱེས་མཆོག་ཁྱེད་ལ་གསོལ་བ་འདེབས། །

བཅུ་ཕྲག་རིག་པའི་གཞུང་ལུགས་གདམས་པ་ཀུན། །

མ་ལུས་ཐུགས་སུ་ཆུད་པའི་དན་རྟགས་སུ། །

སྒོམ་པའི་ཉམས་ལེན་མཐིལ་རྟོགས་རྫོགས་སངས་རྒྱས། །

གོ་འཕང་མངོན་དུ་གྱུར་ལ་བདག་དད་དོ། །

སླར་ཡང་འཛམ་གླིང་སྤྱི་དང་ཁྱད་པར་དུ། །

གངས་ཅན་ལྗོངས་ཀྱི་སྐྱེ་འགྲོའི་དོན་ཕྱིར་དུ། །

སྐྱེ་བའི་ཕྲེང་བ་མུ་ཏིག་བསྟར་རྒྱུས་པའི། །

རྟེན་འབྲེལ་ཡང་ཡང་འབར་བའི་བཀྲ་ཤིས་ཤོག །

ཞེས་བསྟན་འཛིན་སྐྱེས་མཆོག་དམ་པ་དགེ་སློང་རིན་པོ་ཆེ་བསྟན་འཛིན་དབང་གྲགས་མཆོག་ཉིད་སྐུ་གཤེགས་ནས་ལོ་འཁོར་གཉིས་ཕྱིན་པའི་རྗེས་དྲན་དུ་རྨོངས་རྟུལ་བ་རིན་སྤུངས་ཚུལ་བསྟན་གྱིས་༢༠༠༩ལོའི་ཟླ༩ཚེས་༡༨ཉིན་ཁྲེན་འདུ་ནས་བྲིས་པའོ། །