ཁྲག་ཐིགས་ཀྱི་རི་གྲོང་དང་།

ཆ་མི་སྙོམ་པའི་འཇིག་རྟེན།

འཇིག་རྟེན་བྱེད་པོ།

ཁྱེད་ལ་དྲང་བསྐོས་ཀྱི་བསམ་ཤེས་དང་།མགོན་མེད་ལ་གཟིགས་པ།ནུས་མེད་ལ་སྙིང་རྗེ་ཞིག་ཡོད་དམ།

ལ་ལས་ལྟོ་འགྲང་རྒྱན་སྤྲོས་ཆེད་དུ་འགའ་རེའི་ཚེ་སྲོག་འཕྲོག་ནས་ཤ་ཁྲག་པགས་རུས་ལ་འདོད་རྔམ་ཀྱིས་ཧམ་འཐབ་བྱེད་དུས།ངས་འཇིག་རྟེན་ན་དྲང་པོ་མེད་པ་གཞི་ནས་ཚོར།

ཆ་མི་སྙོམ་པའི་རི་གྲོང་དེར།

ཁྲག་ཐིག་རེ་རེ་ས་རུ་ཟག་ཤུལ་ནས་ཤི་གཤེད་རེ་རེས་འཇིག་རྟེན་མི་ལ་དགྲ་རུ་ལངས་ནས་སྒུགཀེང་རུས་ཀྱི་རི་རབ་བརྩིགས་པའི་ཁོང་གསེང་ནས་གཟུགས་མེད་ཡིད་ལུས་རེ་རེས་འཇིག་རྟེན་མི་ཡིས་ལས་འབྲས་མི་བརྩི་བའི་ངུ་སྐད་འདོན་བཞིན་མི་ཡུལ་དུ་ཧྲིག་གེར་གཅེར།

ཆུང་བེའུ་ནས་བྲུད་ར་རྩེར་མ་སླེབ་བར་མགོ་ལུས་ཆ་ཤས་ཐམས་ཅད་མི་ཡུལ་ལ་ཕངས་མེད་དུ་སྦྱིན།

ད་དུང་རྨོ་འགེལ་གྱི་ཁྲལ་གཡོག་རྒྱུགས་པའི་སོ་མེད་རྒན་འཁོགས་ཀྱི་སྣེ་མོར་འདོད་དབང་ལ་མི་ལྟོས་ཤིང་།དབང་ཆེ་ཆུང་གིས་ཚེ་སྲོག་འཕྲོག་པའི་ཤུལ་ནས།ཚིལ་མེད་ཀྱི་ཤི་ཤ།ཚོ་ཉམས་མེད་པའི་མུག་རྒྱུད།རོ་བྲོ་མེད་པའི་ཐེ་རོ་ཞེས་འཇིག་རྟེན་མི་ཡིས་འཁང་རའི་སྐད་འཕང་ཆེར་འདོན་དུས།ད་འཇིག་རྟེན་གྱི་སྤྱང་ཁྱུ་ཚོ་ཞིག་ངས་འདི་ནས་རྙེད།

ཁྱོད་ནི་དོན་ངོ་མའི་ཉམ་ཆུང་ཞིག་སྟེ།བདག་མེད་ཀྱི་རྩ་ཟ།བདག་མེད་ཀྱི་ཆུ་འཐུང་།བདག་མེད་ཀྱི་ལུང་སྟོང་དུ་ཉུལ་བ་ལན་པ་ཅི་ཡོད།ཁྱོས་ལྟོ་རྒྱབ་ཆེད་དུ་གཞན་སྲོག་འཕྲོག་ནས་རྣམ་སྨིན་ངན་པ་བསགས་པ་དམྱལ་དཔོན་གྱིས་རྩིས་བྱང་ནས་ཀྱང་མ་རྙེད་པས།དོན་ངོ་མའི་འཇིག་རྟེན་གྱི་ཉམས་ཆུང་ཁྱུ་ཞིག་ངས་ད་མཐོང་།

ངོ་མ་ཁྱོད་ཀྱིས་མི་ཡུལ་དུ་བཤས་ཁྲལ་རྒྱུགས་དགོས་པ་ཅི་ཡིས་ལན།དབུ་ཡོག་ཞིག་གང་ནས་ཕོབ།

ཡང་ན་འཇིག་རྟེན་མིས་དམར་ཟས་དོར་ནས་དཀར་ཟས་སྤྱོད་ན་འཇིག་རྟེན་མི་ཡི་ལུས་སྲོག་འཚོ་མི་ནུས་སམ།གནས་མི་ཐུབ་བམ།ངོ་མ་འཇིག་རྟེན་ན་ཐོབ་ཐང་འདྲ་མཉམ་མི་འདུགངས་ལས་དབང་ལ་ཁག་མི་དཀྲི།

མི་རྐྱང་པས་ཁེ་དབང་བེད་སྤྱོད་ནས་གཞན་ལའང་བསམ་ཤེས་མེད་པར།ན་མ་རན་གོང་དུ་སྐེད་ནས་ཁྲག་འདོན།ཤི་མ་རན་གོང་ནས་སྲོག་གཅོད་ཀྱི་ཉེས་ཁྲལ་ཕབ།ལྟོས་དང་།འཇིག་རྟེན་མི་ལ་དྲང་པོ་ཞིག་འདུག་གམ།

མི་ཡི་མགོ་ལུས་ཆ་ཤས་གང་རུང་ཞིག་ལ་གནོད་འཚེ་ཕྲ་མོ་ཞིག་ཕོག་དུས་གཟོད་མི་ཐུབ་པར།ལྷ་མཆོད་ཀླུ་གསོལ་དང།ཕྱི་དྲུབ་ནང་འདོན་སོགས།མདོར་ན།འཇིག་རྟེན་ཁམས་ཀྱི་ཕན་ཐབས་ཡོད་ཚད་ཁྱོད་ལ་རྩོལ་སྒྲུབ་དགོས་པའི་ཉིང་དགོས།བདེ་བ་འདོད་དགོས་པ་དང་སྡུག་བསྔལ་མི་འདོད་པས་ལན།དེས་ན་ཁྱོད་ལ་ཅི་དགོས་སེམས་ཅན་གཞན་ལ་དགོས་པ་མ་ཚོར་རམ།

ཀྱེ་མ།མི་རྐྱང་པའི་རྒྱས་སྤྲོས་ཆེད་དུ་ཉེས་མེད་སེམས་ཅན་དུ་མ་ཞིག་གི་སྲོག་འཕྲོགས་པ།མི་ཡུལ་གྱི་བྱ་བ་དྲང་པོ་ཞིག་རེད་དམ།མི་ཡུལ་གྱི་འཚེ་བ་འདི་འདྲ།དམྱལ་ཁམས་ན་ཨི་ཡོད།མི་ཡུལ་གྱི་རྒྱས་སྤྲོས་འདི་བཞིན་།ལྷ་ཡུལ་ལ་ཡོད་དམ།

ད་དུང་།འཇིག་རྟེན་མི་ཡིས་གཞན་ལ་ཡ་རབ་གུས་ཞབས་བྱེད་ཤེས་སམ།ཤེས་ན་བྱོལ་སོང་ཉམས་ཆུང་རིགས་ལ་ཡ་རབ་གུས་ཞབས་ཅིའི་ཕྱིར་མི་དགོས།ངོ་མ་ཅིའི་ཕྱིར་མི་དགོས།

ཨེ་མ།ཤ་ཟན་གྱི་ཐང་དཀར།ཁྱོས་ལོངས་སུ་སྤྱོད་རྒྱུ་ནི།གཞན་གྱིས་བརླག་ཟིན་པའི་ཐེ་རོ་ཙམ།ཤི་ཤ་ཙམ།ངོ་མ།ཉེན་ཁ་མེད་པའི་རྐང་ལམ་ཞིགངོ་གནོང་མེད་པའི་འཚོ་ཐབས་ཅིག།

དུད་མུར་ཝེར་རོ།།