དྲོད་མ་ཡལ་བ་རེ་བསྐུལ་དྭངས་མ།
ས་འཛིན་དཀར་པོས།
ཆེ་སྔ་མོ་ནས་གངས་ཅན་བོད་ཀྱི་ལྗོངས་སུ་བོད་རིགས་འདི་དང་འབྲེལ་བའི་ཆོས་ལུགས་ཤིག་ཡོད་པ་དེ་ནི་བན་ཆོས་དེ་ཡིན་མོད། དེའི་བརྒྱུད་འཛིན་རྣམས་ལ་བོད་མི་མང་པོ་ཞིག་གིས་ངན་པ་ལྟ་བུར་བརྩིས་ཏེ་བོན་ཆོས་ཀྱི་ཟབ་ཅིང་རྒྱ་ཆེ་བའི་བསྐོར་ལ་གོ་རྟོགས་མི་བྱེད་ཅིང་དེའི་གྲས་ནས་ཅིག་ངའི་ཕ་མ་གཉིས་ཀྱང་རེད། དེས་བོན་པོ་ལ་མི་དད་པའི་བགས་ཆགས་ཤིག་ང་ལ་བཞག་ཡོད་པ་མ་ཟད་བོན་ཆོས་ནི་ལྷ་ཀླུ་གཉན་གསུམ་གསོལ་མཆོད་ཙམ་ཞིག་ལ་བསྟེན་ནས་བྱུང་བ་ས་དགེ་བཀའ་རྙིང་རྒྱུན་འཛིན་པ་ཁ་ཤས་དང་རྒན་རབས་རྣམས་ཀྱི་ཁ་སྒྲུང་རིང་དེ་ཚོ་རྗེས་སུ་འབྲངས་ནས་ངས་བོན་གྱི་གསུང་རབ་བཀླག་མ་མྱོང་ལ། དེ་བཞིན་བོན་གྱི་དགོན་ཁག་ནང་དུ་མཆོད་མཇལ་ག་ལ་འགྲོ་མྱོང་། དེ་བས་གུས་པ་སློབ་གྲྭར་བསྐྱོད་པའི་སྐབས་སུ་བོན་གྱི་གསུང་རབ་བལྟ་ཀློག་ག་ལ་བྱེད་་མྱོང་། འོན་ཀྱང་སྟབས་ལེགས་པ་ཞིག་ལ་གུས་ཨ་རིག་ཡུལ་དུ་འབྱོར་ནས་ཉིན་ཤས་རྗེས་སུ་དབྱིན་ཇི་སློབ་གྲྭ་འགྲོ་བའི་དུས་སུ་བོན་གྱི་དགེ་བཤེས་ཤིག་ཐུག་པ་ཁོང་གི་མཚན་ལ་བྱ་འཕུར་དགེ་བཤེས་ལྷུན་འགྲུབ་རྒྱ་མཚོ་ཞུ་ཡི་འདུག་དེ་ནས་རིམ་གྱི་སྙིང་ཉེ་བའི་གྲོགས་མཆོག་ཏུ་གྱུར་པ་དེ་ནི་ངའི་ཚེ་ཚད་ནང་ནས་བོན་ཆོས་རྣམ་དག་ཤེས་མཁན་གྲོགས་པོ་ཐོག་མ་དེ་ཡིན་ལ་དུས་ཚད་སྟོང་པ་སྐབས་སུ་ང་ཁོང་གི་ཆོས་ཚོགས་ལ་བསྐྱོད་དེ་གཏམ་གླེང་སྣ་ཚོགས་བྱེད་སྐབས་ཁོང་་དངོས་གནས་ཁ་མཚར་ལྡན་པའི་གྲྭ་རྐྱང་ཞིག་ཀྱང་རེད།
ཁོང་གི་མཆོད་ཁང་ནང་དུ་ཆོས་སྐུ་ཀུན་བཟང་པོ་དང་འཕགས་པ་སྤྱན་རས་གཟིགས་བླ་མ་བསྟན་པ་ཤེས་རབ་སོགས་ཀྱི་སྐུ་ཐང་མདུན་དུ་མེ་ཏོག་དང་བདུག་སྤོས་དྲི་ཞལ་སོགས་ཀྱི་རྒྱལ་བ་དགྱེས་པའི་མཆོད་སྤྲིན་སྣ་ཚོགས་བཤམས་པ་དེ་དག་ནི་རང་རེ་ས་དགེ་བཀའ་རྙིང་གཅིག་མཚུངས་མཆོད་པ་ཞིག་ཕུལ་བ་ལས་བོན་པོའི་དམར་མཆོད་དང་ཁྲག་མཆོད་འུར་གཏམ་ཞིག་ལས་དེ་དག་སྒྲ་ཙམ་ཡང་མི་འདུག་པས་འཇིག་རྟེན་འདིའི་སྟེང་དུ་མ་གོ་མ་ཤེས་པའི་གཏམ་ཅི་འདྲ་ཞིག་མང་ཨང་དེ་བཞིན་རི་བོང་ཅལ་འདྲོགས་ག་ཚད་ཡོད་དམ་ཞེས་རང་གིས་རང་ལ་དྲིས་རྗེས་གཞན་གྱི་དགེ་བ་རྗེས་སུ་ཡི་རང་གི་བསོད་ནམས་བདག་ལ་ཐོབ་གསུངས་པའི་ཀོང་སྤྲུལ་གསུངས་དེ་ཡིད་ལ་འཁོར་གྱིན། སྔར་མ་དད་པ་བྱས་པ་ལ་འགྱོད་གནང་ཞིག་བྱུང་།
ཁོང་ནི་སྙན་དངགས་ལ་མཁས་ཤིང་རིགས་གནས་སྤྱིར་ལ་རྣམ་དཔྱོད་ཀྱི་ནར་སོན་པའི་དོན་རྟགས་སུ་ཁོང་གིས་བྲིས་པའི་དེབ་ཁ་ཤས་གུས་ཀྱིས་མིག་ལམ་དུ་གྱུར༏ དེ་ནས་ཁོང་གི་སྐད་བསྒྱུར་བ་དང་ཁོང་གཉིས་ཀྱིས་བོན་གྱི་ཆོས་ཚན་ཁ་ཤས་ཤིག་དབྱིན་སྐད་དུ་བསྒྱུར་བཞིན་འདུག་པ་དེ་ནི་བོན་གྱི་བླ་མ་ཤར་རྫ་བཀྲ་ཤིས་རྒྱལ་མཚན་གྱིས་མཛད་པའི་རྩ་རླུང་སྐོར་ཞིག་རེད་འདུག ངས་ཤོག་ངོས་ཤིག་འཁྱུག་ཙམ་ཀློག་པས་རྒྱུད་སྡེ་ནང་གི་རྩ་གནད་དང་ལུས་གནད་བཤད་ཚུལ་མཐུན་པོ་འདུག་པས་ཧ་ཅང་གི་ཀློག་འདོད་བྱུང་། ངས་ཁོང་ལ་དྲ་ཐོག་ནས་བསྐུར་བའི་རེ་བསྐུལ་ཞུས་ཉིན་ཤས་རྗེས་སུ་ཁོང་གིས་དྲ་ཐོག་ལ་བཏང་འདུག ཤོག་གྲངས་དེ་ཙམ་མང་པོ་མི་འདུག་པས་ངས་མགྱོགས་པོ་ཀློག་འགོ་ཙམ༏ སྤྱི་འགྲོས་བཞིན་ཐོག་མཐའ་བར་གསུམ་གྱི་དགེ་བ་ལས༏ དང་པོ་མཆོད་བརྗོད་ནི༏ རྫོགས་པ་ཆེན་པོ་སྐུ་གསུམ་རང་ཤར་ལས། མི་གཡོ་དབྱིངས་ན་བོན་སྐུ་ཀུན་བཟང་མ་སོགས་གསུངས་ཏེ། དཀོན་མཆོག་གསུམ་དང་རྩ་བ་གསུམ་མདོར་ན་རྒྱལ་སྲས་ལག་ལེན་སོ་བདུན་མ་ལས༏ དཀོན་མཆོག་སྐྱབས་འགྲོ་རྒྱས་སྲས་ལག་ལེན་གསུངས་པ་ནང་བཞིན་མཆོད་བརྗོད་དེའི་ནང་དུ་འཇིག་རྟེན་པའི་ལྷ་སུ་གང་ལ་ཡངཕྱག་བྱས་མི་འདུག་པས་སྐྱབས་སུ་མཆི་སྙམ༏ བར་གྱི་གཞུང་དོན་འཆད་པའི་དུས་སུ་གཙོ་བོ་རྩ་ཐིག་རླུང་གསུམ་དང་རྩ་འཁོར་གང་ལ་ཞི་བའི་དཀྱིལ་འཁོར་གང་དུ་དྲག་པོ་ལྷ་ཚོགས་གསུངས་སྐབས་སུ་ཀླད་པ་དུང་ཁང་ཁྲག་འཐུང་བཞུགས་པའི་རང་སྒྲ་གསུངས་འདུག་དེ་འདྲ་ཞིག་ཞི་ཁྲོ་ནས་བར་དོ་ངོ་སྤྲོད་བྱས་དུས་གསུངས་ཡོད་ཕྱོགས་མེད་ཀྱི་ཐོས་བསམ་མ་བྱས་པའི་སྐྱོན་གྱིས་ད་བར་དུ་གྲུབ་མཐའ་ལ་སྨོད་པའི་ལས་ངན་བསགས་འདུག་ཨང་བསམ་གྱིན་སེམས་ཅན་རྣམས་ཀྱི་བསམ་པ་དང་། བློ་ཡི་བྱེ་བྲག་དབང་གིས་རྒྱལ་བ་རྣམས་ཀྱིས་ཀྱང་སྒོ་གསུམ་གྱི་རྫུ་འཕྲུལ་བསམ་གྱི་མི་ཁྱབ་ལོས་བདེན་རྒྱལ་བས་རྫུན་ག་ལ་གསུངས་དད་པའི་དང་བ་ཞིག་ཡིད་བསུ༏ ཡང་འཇུག་བསྔོ་དེ་ཇི་འདྲ་ཞིག་ཡོད་ན་སྙམ་གྱིན་མུ་འཐུད་ནས་བཀླག་དངོས་གཞི་ཡོངས་སུ་རྫོགས་མཚམས་སུ་བསྔོ་བ་འགོ་རྩམ་སོང་བས་འདི་འདྲ་ཞིག་གསུངས་ཤིང་། འུ་ཅག་ས་དགེ་བཀའ་རྙིང་གིས་ཀྱང་བསྔོ་བ་སྐབས་ལ་མ་གྱུར་དོན་དུ་དགེ་བ་འདི་གསུངས་པ་ཇི་བཞིན་གཞུང་འདི་ལ་ཡང་འདིར་བྱུང་དགེ་བ་མཁའ་མཉམ་འགྲོ་བ་རྣམས། ཞེས་བརྩེ་བ་སྙིང་རྗེ་ཆེན་པོས་མ་གྱུར་འགྲོ་བའི་དོན་དུ་གཞན་ཕན་གྱིས་བློ་ཡོངས་སུ་འཁྱུད་ནས་བསྔོས་པ་ཚིགས་བཅད་དེ་ལས་རྟོགས་ཐུབ་པ་མ་ཟད་དགེ་བ་ལ་རྗེས་སུ་ཡི་རང་གི་བློ་ཞིག་ངང་གིས་སྐྱེས། མདོར་ན་བོན་གཞུང་མཚན་ལྡན་རྣམས་ཀྱི་ནང་ནས་ལྷ་ཀླུ་སྐྱབས་གནས་སུ་བྱས་མེད་པ་གསལ་བོ་ཤེས་ཐུབ་འོན་ཀྱང་བོད་ཁམས་སྐྱོང་བའི་བརྟན་མ་བཅུ་གཉིས་སོགས་ལ་བསངས་གསོལ་བྱེད་སྲོལ་ཡོད་པ་དེ་དག་ནི་་གངས་ཅན་པའི་ཆོས་བརྒྱུད་ཀུན་ལ་ཁྱབ་པ་ཞིག་ལས་བོན་གྱི་གྲུབ་མཐའ་གཅིག་པུར་ཡོད་པ་མ་ཡིན་པར་བོད་ཀྱི་དུས་ཆེན་ཁག་དང་དགོན་སྡེ་རྣམས་ཀྱི་འཕྲིན་བཅོལ་ཁང་བསྐྱོད་མྱོང་མཁན་ཀུན་གྱི་མཁྱེན་མངའ་ལྟར༏
མཐའ་མ་གུས་ཀྱིས་རེ་འབོད་ཞུ་རྒྱུ་དེ་ནི་ཆོས་ལུགས་ཕྱོགས་རེ་དང་གྲུབ་མཐའ་ལ་སྨོད་པའི་རང་དང་འདྲ་བ་རྣམས་ལ་རང་རེ་གངས་ཅན་པའི་ཆོས་བརྒྱུད་ཆེན་མོ་གཡུང་དྲུང་བོན་གྱི་བསྟན་པ་ལ་སྡང་སེམས་རྒྱངས་རིང་དུ་འདོར་ཏེ། སྤྱོད་འཇུག་ལས། རྒྱལ་སྲས་རྣམས་ཀྱི་མི་སློབ་པ། དངོས་དེ་གང་ཡང་གསུངས་པ་ཇི་བཞིན་གཡུང་དྲུང་བོན་གྱི་མཚན་ལྡན་གཞུང་ལུགས་དག་ལའང་བལྟ་ཀློག་རེ་གནོངས་དང་ད་གཟོད་ཆོས་བརྒྱུད་དེའི་ཡོན་ཏན་རྣམས་དངོས་སུ་ཤེས་ཡོང་ལ་གཞན་ཡང་སྔ་རབས་བོད་ཀྱི་ལོ་རྒྱུས་དང་མི་ལོ་སྟོང་ཕྲག་དུ་མ་སོང་བའི་ང་ཚོའི་ཡབ་མེ་ཚོས་མཐོ་སྒང་གི་ཁ་ཆར་ཁྲོད་ནས་སྒོ་གསུམ་གྱི་རྣམ་ཐར་ཟབ་མོ་ཇི་ལྟར་བསྐྱང་བའང་མཇལ་རྒྱུ་འདུག་་ཞེས་ཉམས་མྱོང་དྲོད་མ་ཡལ་པ་བདག་འདྲ་གྲོགས་པོ་རྣམས་ལ་ཟླ་ཚེས་༧་༢༩་ཉིན་ཁོ་ལི་ཕོ་ནི་ཡ་ནས་ཀརྨ་རིན་ཆེན་གྱིས་ཕུལ། ཀརྨ་རིན་ཆེན་རེ་བསྐུལ་ལྟར་གུས་པས་འདིར་བཀོད།
གསལ་འདེབས་ཞུ་རྒྱུ་ཞིག་ལ་རྩོམ་ཡིག་འདི་ཉིད་དྲ་གྲོགས་ས་འཛིན་དཀར་པོ་ལགས་ཀྱི་དགོངས་འཁྲོལ་ཐོབ་པ་གཞིར་བཞག་མི་བསྐྱུད་པའི་ཐོ་ཙམ་དུ་ཁོ་བོས་འདིར་བཤུས་པ་ལགས།
