༥ བྱང་གི་གཞོན་པ་རྭ་བཟི་རྗེས།
ཚེས་༢༣ཉིན།
ཞན་ཆེན་ཤང་ནི་སྒེར་རྩེ་རྫོང་གི་ནུབ་བྱང་མཚམས་སུ་ཡོད།རྫོང་ཡོངས་ནས་བཤད་ན་དཔལ་འབྱོར་རྗེས་ལུས་ཀྱི་ས་ཆ་ཡིན་ཏེ་མང་ཚོགས་ཀྱི་ཡོང་སྒོ་དབུལ་ལ་འཚོ་བ་སྐྱོ།ད་བར་དུ་གློག་མེད་པས་ཉི་འོད་ནུས་པར་བརྟེན་ཡོད་ལ་འགྲུམ་འགྲུལ་སྟབས་བདེ་པོ་མེད།
དགོང་མོ་དེར།ང་ཚོས་ཤང་གི་ཁྱིམ་ཚང་ཞིག་ནས་གནས་ཚང་གཡར་ཐུབ་སོང་། ཁྱིམ་བདག་མས་སེམས་རྩ་འཁོལ་མོས་གསོལ་ཇ་བཀྱགས། ང་ཚོས་ཀྱང་འཚེར་བ་མེད་པར་རྩམ་རྒན་རེ་ཟོས། མཇུག་ཏུ་ཁ་ལོ་བས་སྦི་རག་འཐུང་།འཐུང་རོགས་ཤང་གི་ཕོ་གསར་ཆུང་ཆུང་འགའ་འདུག། ཁོ་ཚོས་གཏམ་རྒྱུད་ཅི་རིགས་ལབ་གླེང་བྱས་ཐལ།ཉན་མཁན་ང་དང་བྱིས་པ་ཁ་ཤས་ཡིན། ཁ་ལོ་བ་ཆང་གིས་ཅུང་ཙམ་དམར་པོར་གྱུར་རྗེས་ཤང་གི་སློབ་གསོའི་ལམ་ལུགས་བཟང་མིན་སྐོར་གླེང་།
ཁོ་ན་རེ།རྒྱལ་ཁབ་གྱི་ལམ་ལུགས་འདི་ཅི་ཡིན།བྱིས་པ་སློབ་གྲྭར་མ་སོང་ཚེ་སྒོར་༡༨༠༠ཡིས་ཆད་པ་གཅོད།ང་ཚོས་གང་ཞིག་ནས་ཆད་པ་འདི་འདྲ་མང་པོ་ཞིག་ཁྱེར་འོང་ངམ། སློབ་གྲྭར་སོང་ན་ལོས་བཟང་། རིག་གནས་མ་ཤེས་ན་འགྲིག་གི་མ་རེད། ཡིན་ནའང་།སློབ་གྲར་སོང་ན་ཤེས་དགོས་རྒྱུའི་ཤེས་བྱ་མི་ཤེས།མི་ཤེས་རྒྱུའི་ཆང་དང་ཐ་མག་ལོངས་སྤྱོད་རྒྱུ་ཤེས་འདུགཐ་ན་སློབ་གྲྭའི་དགེ་རྒན་གྱིས་ཀྱང་འགན་ལེགས་པོ་མི་འཁུར།བྱིས་པ་སློབ་གྲྭ་ནས་བྲོས་བྱོལ་བྱས་ཏེ་ཕ་ཡུལ་དུ་སོང་།ལམ་ཐག་རིང་བས་ལ་ལ་འཁྱགས་ཤི་ཐེབས་པའང་ཡོད།ཕ་མའི་སེམས་ཅི་ལ་མི་འཁྱག་ཟེར།དེར་མཐུད་ནས་གཡས་གཡོན་ན་ཡོད་པའི་ཕོ་གསར་དེ་ཚོས་ཀྱང་རེད་གདའ་ཞེས་བདེན་ཁ་སྟེར་བར་བྱེད།
ངས་ཁོ་ཚོ་ལ་རང་ཉིད་ཆུང་ངུ་ནས་སློབ་གྲྭར་བསྐྱོད་ཚུལ།དཀའ་ལས་མྱངས་ཚུལ་སྐོར་ཅུང་ཟད་བཤད་མོད། གསལ་པོ་ཞིག་ཁོ་ཚོས་ཀྱང་ཧ་གོ་གི་མེད་པ་འདྲ། ཕར་ཆེར་ཨམ་སྐད་ཀྱི་གདངས་ལ་ཤོར་ཆེ་བས་མིན་སྙམ།
ཉལ་ཁར། ངས་ཡང་བསྐྱར་དེའི་སྐོར་ལ་བས མ་བློ་མང་དུ་གཏོང་དགོས་བྱུང་།
ཞན་ཆེན་དུ།
