ང་ཚོ་བོད་གངས་ཅན་པ་ལ་རྡོ་ཆས་རྙིང་བའི་དུས་རབས་ནས་བཟུང་ཟས་ཀྱི་ཕན་གནོད།གནམ་གཤིས་གྲོ་གྲང་སོགས་རང་བྱུང་ཁམས་ཀྱི་ནད་རིགས་འདྲ་མིན་ཞིག་ལ་འཐབ་རྩོད་བྱས་པའི་འཚོ་བ་དངོས་ཀྱི་ཁྲོད་ནས།གསོ་རིག་དང་སྨན་རིགས་གསར་གཏོད་བྱུང་བ་ནི་ཐེ་ཚོམ་མི་དགོས་པ་ཞིག་རེད། དཔེར་ན་ཕྲག་བཏོན་ཏེ་ན་ཟུག་ལངས་ཚེ་གཅོག་ཐབས་སུ་གཏར་ཀ་བྱེད་པ།རྐང་ལག་མགོ་གསུམ་གསུམ་སོགས་ལ་ཟུག་གཟེར་ལངས་ཚེ་མེ་བཙའ་གཏོང་བ།རྨ་གསར་བ་ལ་རྩ་རྡུམ་དང་ཤ་ཚུལ་གྱིས་ཁྲག་གཅོད་བྱེད་པ་སོགས་ཕྱི་ནད་ཀྱི་རིགས་གསོ་བཅོས་ཤེས་ཡོད་པ་མ་ཟད།ཁོག་ནད་ཀྱི་རིགས་ལ་ཡང་རྡོ་སྨན་གྱིས་བཅོས་ཚུལ།ཤིང་སྨན་གྱིས་བཅོས་ཚུལ།སྡུམ་སྨན་གྱིས་བཅོས་ཚུལ།ཤ་སྨན་གྱིས་བཅོས་ཚུལ་སོགས་བཅོས་ཐབས་སྣ་ཚོགས་ཤེས་ཡོད་པ་རེད།

   བོད་གསོ་བ་རིག་པའི་གཞུང་ལུགས་ཟེར་བ་དེ།གསོ་བྱེད་སྨན་གྱི་ངོ་བོ།གསོ་ཐབས་སྨན་གྱི་ལག་ལེན།གསོ་བྱ་ནད་ཀྱི་ངོས་འཛིན་སོགས་གང་རུང་ཞིག་བསྟན་ཐུབ་པའི་གཞུང་ལུགས་ཤིག་ལ་གསོ་བ་རིག་པའི་གཞུང་ལུགས་ཟེར།འདི་ལྟ་བུའི་གཞུང་ལུགས་ཤིགས་ནི་སྐལ་བཟང་མགྲིན་རྒྱན་ལས།གསུམ་པ་ཡེ་རྗེ་སྨན་བླའི་རྒྱལ་པོ་ལས།བྱུང་བའི་གསོ་བ་རིག་པའི་འབུམ་སྡེ་ནི།གསོ་བྱའི་ནད་འབུམ་ནག་དང་འཚོ་བྱེད་འཚོ་བྱེད་ཀྱི།དཔྱད་འབུམ་ཕྲ་བོ་རྣམ་རྒྱལ་སྨན་འབུམ་དཀར།འོལ་གླིང་གནས་སུ་དཔྱད་བུ་ཁྲི་ཤེས་ལ།འགྲོ་བ་ནད་ཀྱི་ཟུག་ངུ་བསལ་བ་དང་།ལུས་སྲོག་གསོ་བ་བྱ་བའི་ཕྱིར་དུ་བསྟན།ཞེས་པ་ལྟར་སྟོན་པ་གཤེན་རབ་ཀྱི་བཀའ་དྲི་མ་མེད་པ་འབུམ་བཞི་མཛད་པ་ནས་བཟུང་།རང་རེ་བོད་ཀྱི་གསོ་བ་རིག་པའི་གཞུང་ལུགས་རིམ་པར་དར་བར་སྣང་། 

   སྤྱིར་བོད་ཀྱི་གསོ་བ་རིག་པའི་གཤག་བཅོས་ཀྱི་ལག་ལེན་ནི་སྤྱི་ལོ་༥༡༩་ཙམ་ནས་ཚད་ངེས་ཅན་ཞིག་ལ་བསླེབས་ཡོད་པ་ཐག་གིས་ཆོད་འདུག རྒྱུ་མཚན་ནི་དུས་རབས་དེའི་སྐབས་སུ་བོད་རྒྱལ་སོ་གཅིག་པ་སྟག་རི་གཉན་གཟིགས་(མའི་མངལ་ནས་བཙས་མ་ཐག་ནས་དམུས་ལོང་ཡིན)སྐུ་ཆུང་བའི་དུས་སུ་དམུས་ལོང་ཡིན་པ་ལ།འ་ཞའི་སྨན་པ་གྱེར་སྤུང་སྣང་ཞེར་ལོད་པོས་རྒྱལ་སྲས་ཁོང་གི་མིག་ལ་གཤག་བཅོས་བྱས་ནས་མཐར་དབུས་སྟོད་སྟག་མོའི་རི་ལ་རི་དྭགས་གཉན་ཞིག་ཡོད་པར་མཐོང་བས།མཚན་ལ་སྟག་རི་གཉན་གཟིགས་བཏགས་སོ། །རྒྱུ་མཚན་དེའི་ཕྱིར་ན་སྐབས་དེ་དུས་རང་རེའི་བོད་ལ་དབང་པོའི་དྭངས་མ་མིག་གཤག་བཅོས་ཀྱི་ནུས་པ་ལྡན་པས།གཤག་བཅོས་ཀྱི་རིག་པ་ཚད་ངེས་ཅན་ཞིག་ལ་བསླེབས་ཡོད་པ་མཐོང་གི་འདུག།