སྨན་རིའི་ཁྲི་འཛིན་རིན་པོ་ཆེ་ལ་བསྟོད་པ།

ཀ་དག་རྫོགས་པ་ཆེན་པོའི་ལྟ་བ་དེ་གཟིགས་ཤིང་།

ཁ་ལྔས་བཏེགས་པའི་སྨན་རིའི་གསེར་ཁྲི་རུ་བཞེངས་ནས།

ག་ལོག་རྨོངས་བའི་ཚོགས་རྣམས་ཚར་ཐག་རང་གཅོད་པའི།

ང་ཡིས་རྟག་ཏུ་བསྟོད་ཡུལ་མཁན་པོ་དེར་འདུད་དོ།

ཅ་ཅོ་གཏམ་གྱིས་མ་བསླུས་སྟོང་ཉིད་ངང་གནས་ཤིང་།

ཆ་ལུགས་ལྔ་ལྡན་ཞབས་མཐིལ་དཀྱིལ་དཀྲུང་དུ་བཞུགས་པའི།

ཇ་ཁུའི་མདངས་ལྟར་དམར་སེར་གོས་དྲུག་གིས་མཛེས་པ།

ཉ་གང་ཟླ་བས་འགྲན་བྲལ་མཁན་པོ་ཁྱེད་མཁྱེན་ནོ།

ཏ་ལའི་སྡོང་བཞིན་དོན་གྱི་སྙིང་བོ་ཡིས་སྟོང་ཞིང་།

ཐ་སྙད་གྲགས་ཆེད་མགོ་བོ་རྒྱལ་ཁམས་ཀུན་འཁོར་བའི།

ད་ལྟའི་བླ་མ་སྤྲུལ་སྐུའི་ངན་སྤྱོད་དེ་མཐོང་དུས།

ན་གེ་ནོག་གེའི་བྱ་བྲལ་མཁན་པོ་ཁྱེད་མཁྱེན་ནོ།

པ་ཏྲའི་རི་མོས་མཛེས་པའི་ཁྲི་སྟེང་དུ་བསྡད་དེ།

ཕ་རོལ་དད་མོས་ཆེན་པོའི་མགོ་བོ་དེ་སྐོར་བའི།

བ་གླང་ཟླ་གྱུར་དེང་དུས་བླ་གཟུགས་དག་མཐོང་དུས།

མ་གྱུར་འགྲོ་ཀུན་བྱམས་པའི་མཁན་པོ་ཁྱེད་མཁྱེན་ནོ།

ཙནྷ་སྡེབ་སྦྱོར་ཀློག་པའི་བློ་རྩལ་ཙམ་མེད་ཀྱང་།

ཚ་ཚོད་མེད་པར་ལྷ་མཐོང་འདྲེ་མཐོང་དེ་སྨྲ་ནས།

ཛ་ལང་སྤྱོད་ངན་འཆང་བའི་བླ་གཟུགས་དག་མཐོང་དུས།

ཝ་སྐྱེས་རྒོལ་ཚོགས་གཞོམ་པའི་མཁན་པོ་ཁྱེད་མཁྱེན་ནོ།

ཞྭ་དཀར་བསྟན་པའི་དོན་ཞེས་རང་དོན་ལ་གཞོལ་ནས།

ཟ་འཐུང་ཁོམ་ལོང་ཙམ་གྱི་ངལ་གསོ་དེ་མེད་པའི།

འ་འུར་ཟང་ཟིང་གཡེང་བའི་བླ་གཟུགས་དག་མཐོང་དུས།

ཡ་མཚན་གཞན་དོན་སྐྱོང་མཁས་མཁན་པོ་ཁྱེད་མཁྱེན་ནོ།

ར་ཅོ་ལྟ་བུའི་སེམས་རྒྱུད་གྱོང་པོ་དེ་ཁུར་ནས།

ལ་རྒྱ་འཛིན་ཁུལ་ཕན་ཚུན་རྙོག་འཛིང་དེ་སློང་བའི།

ཤ་ཚ་སྙིང་རྗེ་མེད་པའི་བླ་གཟུགས་དག་མཐོང་དུས།

ས་བཅུའི་ཡོན་ཏན་རྫོགས་པའི་མཁན་པོ་ཁྱེད་མཁྱེན་ནོ།

ཧ་ཧ་རྒོད་པའི་འཛུམ་ཆུང་གདོང་པ་ལ་ལང་སྟེ།

ཨ་རིའི་སྒྲོ་ལོ་མཐོང་དུས་སྲུང་ཁྲིམས་དེ་ཤོར་བའི།

ཧ་ཅང་བསྟན་པའི་ཞབས་འདྲེན་བླ་གཟུགས་དག་མཐོང་དུས།

ཨ་དོན་སྐྱེ་མེད་རྟོགས་པའི་མཁན་པོ་ཁྱེད་མཁྱེན་ནོ།

ཆང་འཐུང་སྨྱོན་པའི་འགྲོས་བཞིན་འཁྱར་འཁྱོར་གྱི་ཚིག་འདིར།

གསོན་ཉམས་ལྡན་པའི་སྙན་ཚིག་ཡང་དག་ཅིག་དབེན་ཀྱང་།

སྟག་ཚའི་གྲྭ་བཙུན་ལུང་རྟོགས་རྒྱ་མཚོ་རུ་འབོད་པའི།

རྩོམ་རིག་ངག་རྩལ་རྒྱུགས་ཐེངས་གཉིས་པ་རུ་བྲིས་སོ།