0

推荐

སྙིང་གི་འཕར་ལྡིང་།

ཤར་པ་བསོད་བརྟན།

རྒྱང་རིང་གི་ཞིང་གྲོང་ཞིག་ན།

མཐའ་མི་མངོན་པའི་བརྩེ་བ་ཞིག་འཕར་ལྡིང་བྱས་བཞིན་པ་རེད།

སུས་ཀྱང་བཀག་འགོག་མེད་པར་འཕར་ཞིང་མཆིས།

གོ་ཐོས་ལ་ཡུལ་དེ་ནས།

སྐྱབས་མགོན་འཁྲུང་མྱོང་སྐད།

འོན་ཀྱང་།

སྐྲག་དགོས་པ་ཞིག་ལ།

ཡུལ་དེ་ན།

ཆོམ་རྐུན་གྱི་ཟློས་གར་ཤིན་ཏུ་གསང་གདའ་ཟེར།

སློབ་གྲྭ་བ་ཞིག

རི་ཁྲི་ལུང་སྟོང་གིས་བཅད་དེ་མཐོ་སྒང་གི་སློབ་ར་དེ་ནས།

སྐུལ་སློང་མཁན་སུ་ཡང་མེད་པར།

ལྐོག་འགྱུར་གྱི་སྐྱེས་བུ་ཞིག

སྙིང་ཤ་བརློན་པའི་དཀྱིལ་རུམ་ནས།

ཉིན་མཚན་དབྱེ་མེད་དྲན།

བདེན་དེ།

དྲན་དྲག་པས་མིག་ཆུ་ཤོར་སོང་།

བཙན་པོའི་དཔུང་སྡེ་ཞིག་ཡོད་ན།

རི་ཆུ་ལ་གསུམ་ཚལ་པ་བཤགས་སྟེ།

སྙིང་ཁོང་ན་ལྡིང་བཞིན་པའི་འཕར་རྩ་དེ།

འདོམས་ཀྱི་ཕོ་བྲང་ན།

བདེ་སྐྱིད་ཀྱི་རླུང་རྟ་སྤུར་ཞིང་།

རྗེ་བོ་ཞིག་བྱས་ན་འདོད།

ལོ་རྒྱུས་སྟེང་རྐང་གཉིས་ཀྱི་མཚན་གཞི་བཀོད་ནས།

ད་དུང་རང་རྐྱ་ཕེར་བའི་དྲན་པའི་ཀ་བ་ཞིག་འཛུགས་མ་ཕོག

ཁག་མེད་དེ།

ནུབ་བྱང་ཁུལ་ན།

རླུང་ཙག་རྒོད་པས།

གཅེར་བུ་ལྟར་ཇི།

ནོར་ལྤགས་གྱོན་ནས་འཁུམ་ཡོད།

     བརྩེ་བའི་ཁྲག་རྩ་ཞིག་ནང་།

དྲན་པའི་བླ་སྲོག་སྒྱུ་བས།

སྙིང་གི་འཕར་ལྡིང་བཞག་མ་ནུས།

   ངས་ད་དུང་སྔར་བཞིན་དམིགས་འདུན་བཟུང་ནས།

ལྷོད་དུ་འབབ་མི་ཐུབ་པའི་གདུང་སྲེད་སློང་ཡང་།

གཏམ་རྒྱུད་མཇུག་མ་རྫོགས་བར།

འདོད་པ་མི་སྐོང་ངོ།།

འཆི་རིན་ནོ་ཞེས་ངུ་ངག་མ་ཐོན་བར།

འདོད་པ་མི་སྐོང་།

  སྙིང་གི་འཕར་ལྡིང་ཇི་ལྟར་ཆེ་ཡང་།

སྐོང་ཐབས་བྲལ།

སྙིང་།

ཁྱེད་ཁོ་ནས་དབང་བསྒྱུར་བྱེད་དུས་ཤིན་ཏུ་གཟུགས་གཟེར་ཆེ།

སྙིང་།

དོན་དངོས་ཐོག་ངའི་བྲང་ཁོག་ནས་ལྡིང་བ་མ་ཡིན་བར།

ཁྱེད་ཀྱི་སྟེང་དུ་འཕར་བཞིན་འདུག