མི་ཁའི་རླུང་བུས་མི་བུ་ལྡེམ་མེ་ལྡེམ། 

                     ཤར་པ་བསོད་བརྟན།

གནམ་འོག་ན།

མི་བུ་ཞིག་འགྲིམ་པའི་ཤུལ་ཏུ།

རླུང་བུ་ཤིན་ཏུ་ལྡང་། 

རྐང་རྗེས་རེ་རེ་དང་དབྱེར་མེད་པའི་རླུང་བུ་ལྡང་། 

མི་བུ་དེ།

གལ་སྲིད་ད་དུང་“འདི་ལྟར་འཚོ་དགོས་ན། ”

“རྒས་ཐབས་བྲལ”བས།   

རླུང་བུ་རེ་ལྟགས་རྒྱབ་དུ་ཡུག་དེ།

མགོ་བོ་སླར་ཡང་འགྲིང་།

མི་ཚོགས་ཀྱི་དཀྱིལ་ན་ཁ་སྣ་མང་ཞིང་།

ཁེར་རྐྱང་དུ་འདུག་དུས་དྲན་པ་མོད་པས།

གསར་བུ་ཞིག

དངོས་ནས་རང་ཚུགས་སྟོན་གི།

 རང་ཚུགས་དེས།

ཁོར་ཡུག་ནས་ལྷོད་དུ་འབབ་མི་ཐུབ་པའི་རླུང་བུ་ཞིག་བླངས།

རླུང་བུ་དེ་དྲག་དུ་འགུལ་ཐེངས་རེ།

མི་བུ་དེ།

རྣ་སེམས་ཟུང་།

གོད་ཆགས་ཀྱི་ཁྲོད་ན།

གནམ་ལ་སྤུར།

རླུང་བུ་དེའི་མཁའ་དབྱིངས་ནས་“དེ་ལྟར་འཕུར་དགོས་ན།”

“འབབ་ཐབས་བྲལ་བས།”

ལྗིད་ཏིག་ཏིག་གི་སེམས་པ་ཞིག་བཅང་སྟེ།

རང་ཚུགས་སྲ་ན་འདོད།

མི་དང་དེའི་ཁ།

དཔྱོད་ཤེས་ན།

རང་ཉིད་འཕེལ་བའི་རྒྱུ་ལས་མ་འདས་རུང་།

དཔྱོད་མ་ཤེས་པར།

དུག་ལྔས་ཟིལ་གྱིས་བསྣོན་ན།

མི་ཚོགས་ཀྱི་དཀྱིལ་ན།

སེམས་སྡབ་ཀྱིས་འཆོང་ཞིང་།

ངོ་དམར་དམར་རོར།

དྲག་དུ་ལྡིང་ངེས།

འདིར་ལྟར་ཡུན་ཏུ་ལྡིང་དགོས་ན།

འཚོ་ཐབས་བྲལ་བས།

ཁྱེད་ཇི་ལྟར་འོས་ལགས་སམ།