ལང་ཚོའི་མེ་ཏོག་མཐོ་སྒང་ཞིང་ནས་བརྙེས། །
ཤེས་རིག་འདབ་ལག་ནང་སའི་ཡུལ་དུ་རྒྱས། །
བརྗིད་པའི་ཉམས་ལ་སྙན་དབྱངས་བྱུར་བུར་བལྟམས། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
ཆུང་ནས་དྲིན་ཆེན་ཨ་མའི་གཅེས་སྐྱོང་དང་། །
ཨ་ཡེས་ལྷག་བསམ་བཟང་པོའི་ཐུགས་ཁུར་ལས། །
རྒྱལ་ནང་གང་སར་མཚན་སྙན་འབར་བཞིན་པའི། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
དབུན་ཁྲོན་རང་བྱུང་འབྱུང་ཆགས་རྐྱེན་འཕྲད་ནས། །
ཚེ་སྲོག་དུ་མར་གནོད་འཚེའི་སྡུག་གྱར་ཚེ། །
གཞན་ཕན་བསམ་བཟང་རོགས་སྐྱོབ་གཏོང་ཕོད་ཅན། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
བཞི་གཅིག་བཞི་ཡིས་ཡུལ་ཤུལ་མི་དམངས་རྣམས། །
མྱ་ངན་འབོད་སྒྲ་དིར་དིར་སྒྲོག་པའི་སྐབས། །
རྒྱལ་དམངས་ཡོངས་ནས་ཕྱག་ཟུང་རིང་སྐྱོང་སྐབས། །
ཟོལ་མེད་སེམས་པའི་རྒྱུ་འབྱོར་རོགས་སྐྱོབ་མཁན། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
སྟོང་ལོར་བཅུ་པའི་འཛུམས་ཀྱིས་བསུ་བའི་སྐབས། །
གཞན་ཕན་ཚོགས་པར་ས་མཐོར་རྡོག་ཐོན་ཏེ། །
ལོང་མིག་ཕྱེས་ཞིང་སློབ་གྲྭར་རོགས་སྐྱོབ་སོགས། །
རིན་མེད་སེམས་བཟང་བྱམས་བརྩེའི་དཔལ་འབར་བ། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
མདོར་ན་རྒན་བཀུར་གཞོན་གཅེས་སྤྱོད་པ་ཡིས། །
ཡ་རབས་མེས་པོའི་ལུགས་སྲོལ་རྗེས་སུ་འཛིན། །
འཕེལ་རྒྱས་ཆེ་བའི་ཤར་གྱི་ཡ་གླིང་དུ། །
ཚངས་དབྱངས་སྲས་མོའི་རྒྱུད་འཛིན་ཕུལ་བྱུང་བ། །
ཆབ་མདོའི་གཞས་མ་ཧམ་ཧོང་ཞེས་སུ་གྲགས། །
ས་སྟེང་གང་སར་མཚན་སྙན་དཔལ་འབར་བའི། །
དཔལ་འབྱོར་ཆེ་བའི་འབྱོར་ལྡན་མང་ན་ཡང་། །
གཏོང་ཕོད་ཅན་གྱི་སེམས་བཟང་འོད་འཕྲོས་ཚེ། །
དགའ་བསུ་བསྟོད་ཚིག་རོལ་མོ་ཅིས་མི་འཁྲོལ། །
བཟོ་བཅོས་མིན་པའི་ཕྱི་ཡི་ཀུན་སྤྱོད་དང་། །
གཞན་ལ་བརྩེ་བའི་བྱམས་སེམས་ལྡན་གྱུར་ན། །
ཁྱེད་ཉིད་ཡ་རབས་དམ་པའི་རྗེས་འཛིན་འོས། །
འདིས་མཚོན་གཤིས་བཟང་ཕྱུག་པའི་སྐྱེས་བུ་གང་། །
ས་ཕྱོགས་གང་དང་གང་སར་ཕྱིན་ན་ཡང་། །
ལས་དང་སྨོན་ལམ་དབང་གིས་མཐུ་དཔལ་གྱིས། །
ཁ་དགེ་བཀྲ་ཤིས་གཡང་གི་སྨོན་པའོ། །
