ཡབ་གཅིག་ཞང་ཞུང་རྒྱུང་ཡར་ཕྱྭ་བཙུན་སྲས། །
མ་སྒྲིབ་སྐྱེ་བ་ལྔ་བརྒྱར་དུས་གཅིག་གཟིགས། །
ལྔ་སྙིགས་འདུལ་བའི་གཤེན་རབ་ཐུགས་སྲས་ཆེ། །
ཡབ་གཅིག་གྱེར་སྤུངས་དྲན་པ་ནམ་མཁའ་མཁྱེན། །
མཐིང་མདོག་དྭངས་མའི་མཚན་དཔེའི་གཟི་དཔལ་འབར། །
མི་འགྱུར་གཡུང་དྲུང་ཆག་ཤིང་ཕྱག་ན་བསྣམས། །
དཀར་གསལ་དར་གྱིས་སྤྲས་པའི་མཚན་དཔེ་ཅན། །
ཡབ་གཅིག་གྱེར་སྤུངས་དྲན་པ་ནམ་མཁའ་མཁྱེན། །
ཕྱི་དར་བསྟན་ལ་དཀའ་ཚེགས་ཆེར་འཕྲད་ཚེ། །
རླབས་ཆེན་སྤྱོད་པའི་ཐུགས་བརྩེའི་སྟོབས་ཤུགས་ཀྱིས། །
གྱེར་བརྩེ་ཆོམས་ལ་ཕབ་པའི་སེམས་དཔའ་ཆེ། །
ཡབ་གཅིག་གྱེར་སྤུངས་དྲན་པ་ནམ་མཁའ་མཁྱེན། །
རང་ཚུགས་མ་ཟིན་གཞན་རྗེའི་ལད་མོ་བྱས། །
ཕྱོགས་འཛིན་གཤེན་ལ་སྨད་པའི་དུས་སྐབས་སུ། །
ཕུང་བོན་མགོ་དམར་ཞེས་པའི་མཚན་འཆང་བ། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
ཕྱོགས་འཛིན་ལོག་པར་སྨྲ་བའི་རྟོག་གེ་ལ། །
གཤེན་རབ་རིག་པའི་གཞལ་ཚད་སྟོན་མཛད་པོ། །
བསྐལ་ཁུགས་གསོ་བའི་སྨྲ་སེང་བློ་ལྡན་པ། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
རྒྱལ་བློན་ངན་པ་བློ་ཁ་ཡངས་པའི་དུས། །
བསྟན་དང་འགྲོ་ལ་ཉེར་འཚེའི་རྐྱེན་འཕྲད་ཚེ། །
འཕགས་མཆོག་ཚོགས་ཀྱི་བསྟན་འཛིན་སྐྱེས་བུ་དངོས་། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
གདུལ་བྱའི་འགྲོ་རྣམས་ཐོས་སྦྱོངས་དགོས་ཕྱིར་དུ། །
གྲུབ་ཐོབ་ཆེན་པོ་རྔམ་པ་ལྕེ་རིང་དྲུང་། །
མཚན་ཉིད་རྒྱུ་ཡི་འབུམ་སྡེ་གསན་མཛད་པོ། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
བོན་གྱི་འདུ་གནས་མང་མཁར་ལྕགས་འཕྲང་དུ། །
རིགས་འཛིན་ཆེན་པོ་ཟ་རང་མེ་འབར་དྲུང་། །
གསང་བ་སྔགས་ཀྱི་རིག་འཛིན་རྣལ་འབྱོར་བ། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
ཡེ་གཞི་མཐའ་ཀླས་གཤིས་ལུགས་ངོ་བོ་ཆེ། །
ཡེ་སྟོང་གདོད་མའི་ཀློང་ནས་ཞལ་ཁུམ་པ། །
ཡེ་ཉིད་རིག་པ་འཛིན་པའི་རྫོགས་ཆེན་པ། །
ཡབ་གཅིག་བླ་ཆེན་དྲན་པ་ནམ་མཁའ་མཁྱེན། །
བསྟན་འགྲོ་དོན་དུ་ཐུགས་བསྐྱེད་གནང་བ་ལས། །
ཕྱི་རབས་དམུ་རྒོད་འདུལ་བའི་དོན་ཕྱིར་དུ། །
རིག་འཛིན་པད་འབྱུང་ཚེ་དབང་སྲས་འཁྲུངས་པ། །
ཡབ་གཅིག་གྱེར་སྤུངས་དྲན་པ་ནམ་མཁའ་མཁྱེན། །
ཡ་མ་ཀླས་ཀྱི་སྙིགས་མའི་གདུལ་བྱ་ལ། །
མེ་ཏོག་གང་ལ་ཕོག་པའི་ལྷ་སྐལ་བཞིན། །
ཐུགས་ཀྱི་གཉེར་དཔོན་དཔའ་བོའི་མཚན་འཆང་བ། །
ཡབ་གཅིག་གྱེར་སྤུངས་དྲན་པ་ནམ་མཁའ་མཁྱེན། །
གསོལ་བཏབ་དགེ་བའི་འབྲས་བུ་གྱུར་རོ་ཅོག །
བསྟན་འཛིན་སྐྱེས་བུའི་ཞབས་པད་བརྟན་པར་ཤོག །
འདི་བྲིས་འགལ་འཁྲུལ་ནོར་སྐྱོན་ཅི་མཆིས་པ། །
བོན་སྐྱོང་སྐྱབས་གནས་ཞིང་དུ་ནོངས་པར་བགྱིའོ། །
