དཀར་དམར་དྭངས་མར་རྣམ་ཤེས་ཁྱིམ་བྱས་ཏེ། །
ལས་དབང་སྙོམས་པོའི་གོ་ལའི་ཡང་རྩེར་འཕངས། །
གངས་རིའི་རིགས་ལས་བལྟམས་པའི་ལྗ༷ང་སྨྱུ༷ག་གཞོན། །
འཛུམ་གྱིས་བསུས་པའི་ངག་རིག་དབྱངས་རྟ་འཁྲོལ། །
གོར་དང་ཟླ་གམ་དབྱིབས་མཚུངས་ལྷོ་གླིང་གི་ཞིང་འདིར། །
ཁ་བའི་ཤེས་རིག་མ་ཕྱི་འབྲུ་ལྔ་ལས་འཕྲོས་པའི། །
འཕྲུ༷ལ་ཡིག༷་སོ་ལྔའི་ཁྱད་བོན་ཡང་རྩེ་རུ་སོན་པ། །
རྒྱ་གར་ཤར་གྱི་རྨ་བྱའི་ལྷང་ལྷང་དུ་སྒྲོག་དུས། །
ལྗ༷ང་སྨྱུ༷ག་ང་ཚོའི་སྤོབས་སེམས་ཇེ་ཆེ་རུ་ཕྱིན་སོང་། །
ཏི་སེའི་བགྲང་བྱ་ན་མཉམ་ས་མཐོ་ཡི་ཤེས༷་རིག༷ །
ཡན་ལག་བརྒྱད་ལྡན་གཙང་ཆབ་སྔོན་མོ་དང་འགྲོགས་ཏེ། །
ཁ་འབབས་བརྒྱུད་ནས་དཀར་ནག་གླིང་ཆེན་དུ་བབས་པའི། །
ཤེས་རིག་འདབ་ལག་རྒྱས་པའི་དཔེ་རྙིང་དག་མཐོང་དུས། །
ལྗ༷ང་སྨྱུ༷ག་ང་ཚོ་སེམས་སྤོབས་ཇེ་རྒྱས་སུ་ཕྱིན་སོང་། །
རྒྱལ་སྤྱིའི་ཐོག་ཏུ་བརྗིད་རྔམ་ངོམ་རིན་ཡང་ཆོག་ལ། །
ཉལ་ན་གོས་དང་ཕྱིན་ན་ཁུག་མའི་གོ་ཆོད་པའི། །
ཡ་རབས་གཟབ་མཆོར་སྤྲས་ནས་རྒྱན་ཆ་སོགས་ངོམ་ཚེ། །
ལྗ༷ང་སྨྱུ༷ག་གསར་པའི་གོམ༷་སྲོལ༷་རྒྱུན་འཁྱོངས་བྱེད་ཤེས་སོང་། །
དུས་བཞིར་བླ་མཆོད་རྣམས་པའི་ལོ་ཟླ་ཡི་རིམ་གྲོ། །
བཀའ་ཆེན་སྡེ་དགུ་མཆོང་ལྔའི་ཕྱག་དབྱངས་སོགས་བསྐྱངས་ཏེ། །
མང་ལ་འཚམས་པའི་གདུང་དབྱངས་ལྷང་ལྷང་དུ་གྱེར་ཚེ། །
ལྗ༷ང་སྨྱུ༷ག་གཞོན་ནུའི་མེས་པོའི་ཡུ༷ལ་སྲོལ༷་དེ་ཤེས་སོང་། །
ཡ་ཀི་བླ་བྲང་དབུ་རྩེར་བསྙེན་བསྒྲུབས་ལ་རེམ་ཤིང་། །
མ་ཀི་འདུས་གྲྭ་འཛོམས་སར་འཆད་རྩོད་ཀྱི་སྣང་བ། །
ཐོས་དཔྱོད་ནོར་བུའི་གླིང་དུ་ལེགས་བཤད་ཀྱི་གད་རྒྱངས། །
རྩོལ་མེད་ལྷང་ལྷང་བསྒྲོགས་པའི་བལྟད་མོ་སོགས་མཐོང་དུས། །
ལྗ༷ང་སྨྱུ༷ག་གསར་པའི་ཡ༷བ་མྱེས༷་རིག་གཞུང་དེ་ཤེས་སོང་། །
འཁྲུག་ཆ་ཆེ་བའི་ཡུལ་སྟོན་དགྱེས་འཛོམས་ཀྱི་གླིང་ཁར། །
གཞོན་ཤ་དོད་པོའི་རིགས་བཟང་གཞོན་སྐྱེས་ཀྱི་གསེར་ཉའི། །
ཉམས་འགྱུར་གར་གྱི་ལྷ་བྲོ་རལ་པ་སོགས་འཁྲབ་དུས། །
ལྗ༷ང་སྨྱུ༵ག་གསར་པའི་ཞང་བོད་རྒྱུ༵་རྩ༵ལ་དེ་ཤེས་སོང་། །
རྒྱལ་ནང་གང་སར་ཤེས་རིག་དར་རྒྱས་སུ་སོང་བས། །
དེང་རབས་ཅན་གྱི་མེ་ཏོག་ཟེའུ་འབྲུ་ཡི་རྩེ་ན། །
གཡུ་སྦྲང་བློ་གསལ་རིག་པའི་རོ་བཅུད་ཀུན་ལེན་སྐབས། །
ལྗ༷ང་སྨྱུ༵ག་གསར་པའི་མ་ཡུམ་སློབ༵་གྲྭ༵་དེ་དྲན་སོང་། །
ཚང་ཚིང་གཡུ་ཤུག་རྒྱས་པའི་ནགས་གླིང་གི་ཁྲོད་དུ། །
ཆོག་ཤེས་དཀའ་ཐུབ་མཛད་པའི་མི་ཚེ་རུ་བསྐྱལ་ནས། །
ཐོས་དོན་རྒྱུད་ལ་སྦྱར་བའི་བོན་རྒན་ཞིག་མཇལ་ཚེ། །
ལྗ༷ང་སྨྱུ༷ག་གཞོན་ནུའི་དད་པའི་མིག་ཆུ་ཞིག་ཤོར་སོང་། །
ལབ་རྩེའི་མདུན་ནས་སྣ་ལྔའི་ཀླུང་རྟ་སོགས་སྒྲོན་ཞིང་། །
བསང་ཞིམ་གཡུ་ཤུག་དུད་སྤྲིན་བར་སྣང་གིས་བཀང་སྟེ། །
ཕྱེ་མར་འོ་ཞོའི་བསང་རྫས་ནམ་མཁའ་རུ་གཏོར་ནས། །
ཀི་བསྭོའི་ལྷ་རྒྱལ་འབར་སྒྲ་དིར་དིར་རུ་བསྒྲོགས་དུས། །
ལྗ༷ང་སྨྱུ༷ག་བུ་ངའི་བླ་རི་མཆོད་སྟངས་དེ་ཤེས་སོང་། །
ལྗ༷ང་སྨྱུ༷ག་མགོ་ལྕོག་ལྡེམས་སའི་གཡང་ཞིང་གི་འགྲམས་ནས། །
ལྗ༷ང་སྨྱུ༷ག་སེམས་པ་དགའ་བའི་ངག་རིག་གི་དབྱངས་རྟ། །
ལྗ༷ང་སྨྱུ༷ག་གསར་དུ་འབུད་པའི་གངས་གཞོན་གི་ཚོགས་ལ། །
ལྗ༷ང་སྨྱུ༷ག་ཤེས་ཡོན་འཕེལ་ཁའི་ལོ་ལེགས་ཞིག་ཡོང་བའི། །
ལྗ༷ང་སྨྱུ༷ག་གཡང་ར་འབོད་པའི་མགྲིན་གླུ་ཞིག་བླངས་ཡོད། །