དགེ་རྒན་དུས་ཆེན་ལ་ཕུལ་བའི་སྙན་ཐུང་།

ཆུང་ཆུང་བྱིས་པ་ཚོའི་མི་ཚེའི་ནང་ལ།།

གསེར་འོད་ལམ་ལམ་གྱི་འོད་སྣང་བསྩལ་མྱོང་།།

བུས་པ་བསམ་མེད་ཚོའི་ཡིད་ཀྱི་ངོས་ལ།།

རིན་བྲལ་ཤེས་རིག་གི་རི་མོ་བྲིས་མྱོང་།།

མ་འོངས་གངས་ལྗོངས་ཀྱི་བདག་པོ་རྣམས་ལ།།

ཞི་བདེ་བག་ཕེབས་ཀྱི་ལམ་བུ་བསྐྲུན་མྱོང་།།

ང་ལ་མུན་སེལ་བའི་གློག་འོད་སྒྲོན་ནས།།

ཁྱེད་ལ་ཤེས་རབ་ཀྱི་འོ་མ་སྡུད་མྱོང་།།

ཐོག་མའི་ཀ་མད་ཀྱི་ཕྲེང་ཐག་བརྒྱུས་ནས།།

མཐའ་མའི་རིག་གཞུང་གི་ཕོ་བྲང་བཞེངས་མྱོང་།།

འཛམ་གླིང་ལོག་ལམ་ནས་སླར་ཡང་ལྡོག་སྟེ།།

ལེགས་པའི་ལམ་ཆེན་དུ་སེམས་ཀྱིས་ཁྲིད་མྱོང་།།

མེ་ཏོག་དཀར་དམར་གྱི་ལེགས་སྐྱེས་བསྣབས་ནས།།

དྲི་མེད་ཁ་བཏགས་ཤིག་སེམས་པས་བཏེགས་ནས།།

ལྷག་བསམ་གཙང་མ་ཞིག་དྲན་པས་བསྙོར་ནས།།

ཉི་མའི་འོད་སྐར་ལ་རྟེན་འབྲེལ་ཞུས་ཡོད།།

2011.9.10ཉིན་མདོ་ཁམས་མགོ་ལོག་ནས་བྲིས།