ཟླ་འོད་ལ་འཁྲི་བའི་སེམས་གཞས། 
                   གངས་ལུང་སྲས་མོར་ཕུལ་བའི་བརྩེ་དུང་གི་ལེའུ1

དགུང་གི་ཟླ་འོད་ལ་བལྟས་ནས་སེམས་གཏམ་གླེང་མྱོང་།།
ས་གཞི་མལ་གདན་དུ་བཏིང་ནས་གཉིད་ལ་ཤོར་མྱོང་།།
སྐར་མ་སོར་རྩེ་རུ་བགྲེང་ནས་རྩིས་ལ་བཏབ་མྱོང་།།
སེམས་པ་རྣམ་དག་གཉིས་བསྲེས་ནས་བརྩེ་བས་བཟི་མྱོང་།།

གཅིག་སེམས་གཅིག་འདྲེས་ཀྱི་བརྩེ་བའི་རྨི་ལམ་ཞིང་ནས།།
མ་འོངས་མི་ཚེ་ལ་བྲིས་པའི་རི་མོ་གསལ་ཡང་།།
གློ་བུར་བར་ཆད་ཀྱི་བདུད་པོ་སླེབ་ཐེངས་ཤིག་གིས།།
འུ་གཉིས་སྐད་ཅིག་ལ་ཁ་ཁར་བྲལ་དགོས་བྱུང་སོང་།།

ས་ཐག་རིང་སོང་བས་མིག་ཆུ་འཆོར་གྱིན་ཨེ་ཡོད།།
གྱེས་བྲལ་འཇིགས་སྣང་གིས་ལུས་སེམས་གཙེས་ཀྱིན་ཨེ་ཡོད།།
བུ་ལོན་ལན་ཆགས་ལ་འཁོར་བའི་མི་ཡུལ་འདི་ནས།།
མཇལ་འཛོམས་ཆོས་ཉིད་ལ་སྨོན་པ་བཅངས་ནས་ཡོད་དོ།།

དགུང་གི་ཉི་འོད་ཀྱིས་མུན་པའི་གླིང་བཞི་གསལ་དུས།།
ས་ཡི་པདྨོ་ལ་ཆུ་ཐིགས་བསིལ་བ་འབབ་དུས།།
གནའ་མཁར་ཟི་ལིང་གི་འདུ་འཛིའི་བར་གླེགས་རེ་ནས།།
འདང་ཆེན་བྱམས་པ་ཡི་ཞལ་རས་ཝ་ལེར་དྲན་བྱུང་།།

རྒྱུས་མེད་མི་ཡུལ་གྱི་གྲོང་ཁྱེར་དོགས་པོ་འདི་ནས།།
ཆ་མེད་མི་ཚོགས་ཀྱི་རྒྱབ་གཟུགས་མིག་གིས་མཐོང་དུས།།
ང་ལ་རྒྱུས་ཡོད་ཀྱི་བུ་མོ་བདེ་སྐྱིད་སྒྲོལ་དཀར།།
མ་མཐོང་བདག་སེམས་ལ་སྡུག་གི་མཆི་མ་ལྷུང་སོང་།།

སྒེའུ་ཁུང་ཕྱི་རོལ་ཏུ་སྦྲང་ཆར་་ཤག་ཤག་འབབ་དུས།།
སྡོང་ལོའི་ལྗོན་པ་ལ་ལྗང་མདོག་རྣམ་པར་བཀྲ་ཡང་།།
སྙིང་ཆུང་འདར་འདར་གྱིས་མཛའ་མོ་དྲན་ཐེངས་འདི་ཡིས།།
ཡིད་བདེ་བག་ཕེབས་ཀྱི་གོ་སྐབས་གཏན་ནས་མི་འདུག།

དེ་རིང་ལམ་ཐག་གི་ལེ་དབར་གོམས་པས་གཞལ་ནས།།
རེ་བའི་མིག་ཟུང་གི་འདུན་པ་ཁྱོད་ལ་གཏད་དེ།།
མགྱོགས་མགྱོགས་བྲེལ་བྲེལ་གྱི་མདུན་དུ་ཡོང་གིན་ཡོད་མོད།།
སེམས་པ་འཚུབ་སྣང་གིས་ན་ཟུག་མྱོང་བཞིན་ཡོད་ལགས།།

སྤྲིན་པ་དཀར་དཀར་གྱི་དབུ་ཞྭ་ཐོད་ལ་མནབས་ས།།
ཆུ་བོ་དྭངས་དྭངས་ཀྱི་སྐ་རགས་ལུས་ལ་བཅིངས་ས།།
མཐོན་མཐིང་དགུང་སྔོན་ལ་སྐར་མའི་འོད་སྣང་གསལ་ས།།
འུ་གཉིས་སྐྱེ་ཡུལ་གྱི་ཕ་གཞིས་སྨུག་པོ་ཡིན་ནོ།།

ཆུང་ཆུང་འུ་གཉིས་ཀྱི་རྩེད་རྡོ་འདི་ནས་བསྒྲིགས་མྱོང་།།
ཤེས་རིག་བདུད་རྩི་ཡི་འོ་ཇ་མཉམ་དུ་བཏུང་མྱོང་།།
མ་འོངས་མི་ཚེ་ལ་རྫོགས་ཚིག་ཤར་མར་བཀོད་མྱོང་།།
སེམས་འདུན་གཙང་མ་ཞིག་རུས་པའི་གསེང་ནས་གླེང་མྱོང་།།

སྙིང་གཏམ་གསོན་པོ་ཞིག་སེམས་པའི་གཏིང་ནས་གླེང་གིན།།
བརྩེ་བ་སྣུམ་པོ་ཞིག་རུས་རྐང་གསེང་ལ་འཐིམས་ཡོད།།
བདག་མེད་བདག་ཡོད་དུ་སྣང་བའི་འཆར་ཡན་ཞིག་ལ།།
དུངས་བརྗོད་ཚིག་རྐང་འགའ་འདི་ལྟར་ཤར་མར་ཐལ་ལོ།།
             2011.9.1ཉིན་བྲིས།