༄༅།།ཀུན་གཟིགས་སྐྱབས་མགོན་ཆེན་པོ་དཔལ་དགེ་ལེགས་ལྷུན་གྲུབ་རྒྱ་མཚོ་

རིན་པོ་ཆེ་མཆོག་གི་འཁྲུངས་རབས་རྣམ་ཐར་དང་བཅས་མཎྚལ་

ཞུ་ཚིག་ཡོངས་སྦྱངས་གསེར་རིའི་ཕྲེང་བ། །

• རྩོམ་པ་པོ། སྔགས་འཆང་བསོད་ནམས་རྒྱལ།

      ཞེས་མཆོད་པར་བརྗོད་པའི་སྙན་ཚིག་ཨུ་དུམ་ཝ་རའི་ཕྲེང་བ་ལེགས་པར་ཕུལ་ཏེ། རབ་འབྱམས་རྒྱལ་བ་རྒྱ་མཚོའི་ཞིང་གི་སྐྱེ་རྒུ་ཡོངས་དང་། ཁྱད་པར་འཛམ་གླིང་བྱེ་བ་ཕྲག་བརྒྱ། ཡང་སྒོས་སུ་མདོ་སྨད་ཡུལ་གྱི་གདུལ་བྱའི་བསོད་ནམས་ཀྱིས་མེ་ཏོག་ཕོག་པའི་ལྷ་སྐལ་དུ་གྱུར་པ། རྒྱལ་བ་ཐམས་ཅད་ཀྱི་སྤྱི་གཟུགས་དམ་པ། ཡངས་པའི་རྒྱལ་ཁམས་ཀུན་ལ་ཕན་བདེའི་རྩ་བ། ལེགས་ཚོགས་ཀྱི་འབྱུང་གཞི། སྙིགས་དུས་ཀྱི་བཤད་སྒྲུབ་སྲོལ་འཛིན་ཆེན་པོ། སྔ་འགྱུར་ཟླ་ཞུན་ཅོད་པན་འཆང་བའི་བསྟན་པའི་སྲོག་ཤིང་དུ་གྱུར་པ། མཁས་གྲུབ་གཉིས་ལྡན་གྱི་སྙན་གྲགས་ཨུན་ཆེན་དུང་གི་སྒྲ་དབྱངས་ས་གསུམ་ཀུན་ཏུ་ཁྱབ་ཅིང་། ཁྱད་པར་དུ་རབ་འབྱམས་རྒྱ་མཚོའི་ཞིང་ལ་སྨིན་གྲོལ་བཀའ་བབས་ཀྱི་ཆུ་བོ་ཆེ་བཞིའི་འཁོར་ལོ་རྒྱ་ཆེན་བསྐོར་བས་འགྲོ་བ་མཐའ་དག་ཐར་་དང་ཐམས་ཅད་མཁྱེན་པའི་ས་ལ་བཀོད་པའི་རིགས་བརྒྱའི་ཁྱབ་བདག་ཆེན་པོ། དོན་གྱི་སླད་དུ་མཚན་ནས་སྨོས་ན་དཔལ་དགེ༵་ལེག༵ས་ལྷུན༵་གྲུབ༵་རྒྱ༵་མཚོ༵་མཆོག་གི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་མཛད་པ་མཐའ་ཡས་པ་ནི། འཕགས་པ་རྣམས་ཀྱིས་ཀྱང་བརྗོད་པར་དཀའ་ན། བདག་ལྟ་བུས་ཅི་སྨོས། འོན་ཀྱང་དད་གུས་ཀྱི་མེ་ཏོག་ཀུན་ནས་བཞད་པའི་གསོས་སུ། མཆོག་གི་སྐྱེས་རབས་རྒྱ་མཚོའི་འཇིང་དང་མཉམ་པ་ལས་རྣམ་དཔྱོད་བློ་གྲོས་ཀུ་ཤའི་རྩེ་མོས་མདོར་བསྡུས་ཙམ་ཞིག་སྙན་དབང་ཡོངས་འདུ་འཁྲི་ཤིང་ཚལ་ལ་འབུལ་བར་བྱེད་ན། ཐོག་མར་རིགས་ཀྱི་བདག་པོ་ངོས་བཟུང་ཙམ་བྱས་ན། དེ་ཡང་བོན་སྐུའི་མཁའ་དབྱིངས་རྣམ་པར་དག་པ་ནས་ལོངས་སྤྱོད་རྫོགས་པའི་སྐུ་མངོན་དུ་བསྟན་ཚེ་གནས་མཆོག་ཞིང་ཁམས་འོད་ཀྱི་ར་བར། ལོངས་སྐུ་གསང་བ་འདུས་པ་ཞེས་བྱ་བ་མཚན་བཟང་སུམ་ཅུ་རྩ་གཉིས། དཔེ་བྱད་བཟང་པོ་བརྒྱད་ཅུ་དང་ལྡན་པ། འཁོར་དུ་བདེ་བར་གཤེགས་པ་མ་ལུས་འཁོར་དང་བཅས་བཞུགས་པ་མཆོག་ཡིན་ལ། ཐུགས་རྗེའི་རྩལ་གྱིས་གདུལ་བྱའི་དོན་གཟུགས་དང་དགོངས་ཚད་དུ་མར་དགོངས་ནས་གང་ལ་གང་མོས་སྐུ་རུ་སྟོན་ཅིང་། ཆུ་ཟླའི་ཚུལ་དུ་བྱེ་བ་ཕྲག་བརྒྱའི་ཞིང་ན་བོན་གྱི་འཁོར་ལོ་རྒྱ་ཆེན་བསྐོར་བར་མཛད་པ་སྲས་མཆོག་འཆི་མེད་གཙུག་ཕུད་ཅེས་སྐུ་གསུམ་གྱི་ངོ་བོ་ཉིད་ཡིན་ནོོ། །མཁས་གྲུབ་མཆོག་གི་སྐྱེས་རབས་ཕྱི་མདོ་ལུགས་ལྟར་མཉམ་མེད་ཆེན་པོའི་བར་དུ་རགས་ཙམ་བརྗོད་དེ། དེ་ཡང་སྤྱིར་རང་རེའི་གཡུང་དྲུང་བོན་གྱི་འདུལ་ཁྲིམས་རྨ་མེད་པའི་འབྱུང་ཁུངས་ནི། སྟོན་པ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གཤེན་ལོ་སོ་གཅིག་བཞེས་པའི་ཚེ། ཁྲི་སྨོན་རྒྱལ་བཞད་སྒོ་ཡི་དྲུང་དུ། སྐྱེ་རྒ་ན་འཆི་བཞིའི་སྡུག་བསྔལ་གྱིས་གཟིར་བ་ལ་གཟིགས་པས། ངེས་འབྱུང་གི་རྐྱེན་བྱས་ཏེ་རྒྱལ་སྲིད་ཟང་ཟིང་རྒྱན་ལ་སོགས་པ་སྤངས་ནས། མཆོད་རྟེན་རྣམ་དག་དཀར་པོའི་དྲུང་དུ། ཉིད་ཀྱི་དབུ་སྐྲ་ཉིད་ཀྱིས་བསིལ། ཡེ་ཤེས་ལྷ་ཡིས་གནངས་པའི་ན་བཟའ་གོས་དྲུག །རིན་ཆེན་རྫས་ལྔ་ལ་སོགས་གསོལ་ཏེ་རབ་ཏུ་བྱུང་ཞིང་ཡེ་ནས་རང་བྱུང་གི་བསྙེན་པ་རྫོགས་པར་བཤད་ན་ཡང་། གདུལ་བྱའི་སྣང་ངོར་གཞན་ལས་ཐོབ་པར་དགོངས་ནས། རྫུ་འཕྲུལ་གྱི་གཤོག་དྲུག་སྐུ་ལ་སྐྱེས་ཏེ་འོག་མིན་དུ་བྱོན་ནས། སྔོན་གྱི་སྟོན་པ་གཏོ་རྒྱལ་ཡེ་མཁྱེན་གྱི་སློབ་མ་དྲང་སྲོང་ལེགས་ལྡན་རྒྱལ་བའི་དྲུང་ལས་དག་པ་དྲང་སྲོང་གི་སྡོམ་པ། ཕྱི་ཚུལ་སུམ་བརྒྱ་དྲུག་ཅུ། ནང་ཚུལ་ཉིས་བརྒྱ་ལྔ་བཅུ་རྣམས་རྫོགས་པར་མཛད་དེ་མཚན་ཡང་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་སྟོན་པ་ཁྲི་གཙུག་རྒྱལ་བ་ཞེས་བྱ་བར་མཚན་གསོལ་ཞེས་མདོ་ལས་གསུངས།

(༡) ཕྱི་འདུལ་བ་ལྟར་སྐྱབས་མགོན་མཆོག་གི་བླ་རབས་དང་པོ་ནི། སྟོན་པ་གཤེན་བར་ཀྱི་དྲུང་དུ་སྲིད་པའི་དཀའ་ཐུབ་ཡིད་ཀྱི་ཁྱེའུ་ཆུང་རྣམ་བཞིའི་མཁན་པོ། སྡེ་སྣོད་མཐའ་དག་གི་འབྱུང་གནས་གཡུང་དྲུང་སེམས་དཔའ་ཆེན་པོ་མཐའ་དག་གི་ཐུ་བོར་གྱུར་པ། གཡུང་དྲུང་གཙུག་གཤེན་རྒྱལ་བ་མཆོག་ཡིན་ལ། མཆོག་ཉིད་ཀྱིས་ཐབས་དང་ཐུགས་རྗེའི་སྟོབས་ཀྱིས་ཧོས་གླིང་གི་འགུ་ལིང་མ་ཏི་སོགས་འགྲོ་མ་མཐའ་དག་ཐམས་ཅད་མཁྱེན་པའི་ས་ལ་བཀོད་པའི་ཕྱི་ནང་གསང་བའི་འཕྲིན་ལས་ཉི་མ་སྟོང་གིས་སྡུག་ཀུན་གྱི་གདུང་བ་མ་ལུས་ལྷག་མེད་བཅོམས་པར་མཛད་པ་ལགས། །

མུ་འགོད་(༡--༢༠)ཡོད།   ཆད་ལྷག་དང་ནོར་འཆུག་ཡོད་ན་ཕྲན་ལ་གསལ་འདེབས་རེ་གནང་རོགས་ཞུ།