| 
སྣང་ཞིག་དངུལ་སྐུ་དགོན།
རིག་གསར་རྗེས་ཀྱི་སྣང་ཞིག་དངུལ་སྐུ་དགོན་པའི་ལོ་རྒྱུས་གནད་བསྡུས།
བླ་རབས་ཉེར་གསུམ་པ། བློ་གྲོས་བསྟན་འཕེལ་ནི་རབ་བྱུང་བཅོ་ལྔ་པའི་ས་རྟ་ལོ་༼སྤྱི་རྩིས་༡༩༧༨༽ལ་སྣང་ཞིག་གི་རྒྱལ་ཚབ་ཏུ་བཀོད་ནས་བླ་མའི་ཁྲི་ལ་ཕེབས། ཟིང་ཆུ་རྫོང་མི་དམངས་སྲིད་གཞུང་གིས་ཆོག་མཆན་གནང་ནས་ཨ་བཙས་བདེ་ཐང་དུ་སྣང་ཞིག་དགོན་པ་བསྐྱར་དུ་བཞེངས། དེ་གར་འདེབས་པའི་རྒྱུ་མཚན་ནི། སྔོན་ཆད་བླ་མ་ཤེས་རབ་བསྟན་འཛིན་གྱིས་གདན་ས་གཟིགས་པས་རྟགས་རིལ་བབས་པ་ལ། གྲོང་སྡེའི་མི་རྣམས་མ་འཐད་ཕྱིར་འགྲིག་མ་བྱུང༌། རྗེས་སུ་སློབ་མས་ཐུགས་ལ་དེ་ལྟར་དགོངས་ནས་སྣང་ཞིག་དགོན་གྱི་སྐྱ་སེར་ཀུན་བསྡུས་ནས་གྲོས་བྱས་ཏེ་གྲོས་འཆམ་བྱུང་རྗེས། རབ་བྱུང་བཅུ་དྲུག་པའི་མེ་སྟག་ལོ་༼སྤྱི་རྩིས་༡༩༨༦༽ལ་དགོན་པ་དེ་རུ་བཏབ་པའོ། །
བསྟན་པའི་སྦྱིན་བདག་ཆེན་པོ་ནི། ཁྲི་སྨིན་ཁ་ལེབ་བསོད་གོ འ་ཞ་སྣང་ཞིག གྲུབ་པ་ཚེ་དབང་རྒྱལ། ཚ་ཕྲུག་དཔལ་གོ དེ་བཞིས་གཙོ་བོ་བྱས་པ་ལ། བླ་མ་དང་གྲྭ་པ། སྐྱ་སེར་ཕོ་མོ་ཀུན་གྱིས་རང་མོས་དད་པའི་སྒོ་ནས་འབད་བརྩོན་བྱས་པས་ལོ་གཅིག་གི་རིང་ལ་དགོན་པ་དང་ཇ་ཁང་སོགས་གྲུབ་པའོ། །སྦྱིན་བདག་དད་པ་ཅན་འགའ་ཞིག་གིས་མཆོད་རྫས་དང་རྔ་གཤང་དུང་གླིང་རྒྱལ་མཚན་འཕན་གདུགས། ལྷ་ཆ། འཆམ་གོས་འབྲུག་རིས་ཅན་ཆ་བརྒྱད། ཞལ་འབག ཞྭ་ནག་རྩེ་གྲ་ཅན་བརྒྱད། བཀའ་འགྱུར་སོགས་ལོ་གཅིག་གི་རིང་ལ་གྲུབ། དགེ་སློང་དམ་པ་དེ་ཉིད་སྤྱི་རྩིས་༡༩༩༢ལོ་ལ་སྐུ་གཤེགས་སོ། །
བླ་རབ་ཉེར་བཞི་པ། སྤྲུལ་སྐུ་ཤེས་རབ་འོད་ཟེར་ནི། ཧ་སྨིན་གྲོང་བ། ཡབ་གདུགས་དཀར་སྐྱབས་དང་ཡུམ་བྱམས་གོ་གཉིས་ལ་རབ་བྱུང་བཅུ་དྲུག་པའི་ལྕགས་ཕག་ལོ་༼སྤྱི་ལོ་༡༩༧༡༽ལ་སྐུ་འཁྲུངས། ཆུང་བའི་དུས་ན། དགེ་ལ་དད་པ། སྙིང་རྗེ་ཆེ་བ། སྲོག་ཆགས་གང་ལའང་གནོད་འཚེ་མི་གཏོང་བ། བྱིས་པ་གཞན་དང་མི་འདྲ་བ། སྲག་ཆགས་གང་ལའང་གནོད་འཚེ་མི་གཏོང་བ། བྱིས་པ་གཞན་དང་མི་འདྲ་བ། རྟག་ཏུ་དབང་སྐུར་བ་དང༌། བཀའ་འཆད་པའི་ཚུལ་འཆང་བ་ལགས། དགུང་གྲངས་བདུན་པའི་དུས་ནས་ཡབ་ཀྱི་དྲུང་དུ་ཀ་ཁ་སློབ་པ་དང༌། གྲོང་སྡེའི་དགེ་རྒན་དམ་པ་རྣམས་ཀྱི་དྲུང་དུ་ཐ་སྙད་མང་པོ་གསན་ཞིང༌། ཚིག་དོན་གྱི་གོ་བ་རྒྱ་ཆེན་པོ་བྱུང༌། ཞོར་དུ་རྒྱ་ཡིག་ཅུང་བསླབ། ཉིན་ཞིག་ལ་སྣང་ཞིག་ལྕགས་མདུད་རིན་པོ་ཆེས་དགེ་སློང་ཤེས་རབ་དབང་རྒྱལ་ལ་ཁྱེད་ཚང་གི་བླ་མ་དམ་པ་དེ་ཉིད་ཧ་སྨིན་གདུགས་དཀར་སྐྱབས་ཀྱི་སྲས་སུ་འཁྲུངས་ནས་དགུང་ལོ་བདུན་ཙམ་ལོན་འདུག ངོས་འཛིན་གྱིས་ཞེས་གསུངས་པ་དང་དགེ་རྒན་གྱིས་ཐེ་ཚོམ་ཟ་ནས་ལོ་འགའ་ལ་བཞག ཡང་ཉིན་ཞིག་ཨ་བཙས་དགེ་རྒན་ཤ་སྐྱ་ལ་དེ་ལྟར་གསུངས་པས་དེས་གཞན་ལ་བསྒྲགས། དགུང་གྲངས་བཅོ་ལྔའི་དུས་ཤིང་ཕོ་གླང་ལོ་༼སྤྱི་རྩིས་༡༩༨༥༽ནས་སློབ་དཔོན་བསྐལ་བཟང་དར་རྒྱས་དྲུང་ནས་རྗེ་རིན་པོ་ཆེས་མཛད་པའི་ཚད་མ་དང༌། མཁན་ཉི་མས་མཛད་པའི་བསྡུས་གྲྭ་ལ་སོགས་པ་སྦྱངས་པས་མཐར་ཐུག་པར་གྱུར། ལོ་འཁོར་བརྒྱད་ཀྱི་རིང་ལ་སུམ་རྟགས་དང་དག་ཡིག རྩིས་རིག མཚན་ཉིད་རྩོད་པ། གཞུང་ཕར་ཕྱིན་བཅས་ལ་སྣེ་མོ་རུ་རྟེན་འབྲེལ་མེ་ཏོག་འཐོར་བའི་བཀྲ་ཤིས་སྨོན་ལམ་དང་བཅས་པ་གྲུབ་པའོ། །
དེ་ནས་བཟུང་ལོ་གསུམ་ལ། ཤར་རྫའི་སྒྲུབ་གྲྭ་རུ་བཞུགས་ནས་ཨ་སྙན་རྫོགས་གསུམ་དང༌། རྩ་རླུང་ཐུན་གསུམ་ཀུན་ལ་ཁྲིད་རིམ་གཞི་ལམ་འབྲས་རྒྱུན་དང༌། བྲུ་ཞུ་སྤར་རྨེའུ་དང་གཤེན་ཁྱུང་རྣམས་ཀྱིས་མཛད་པའི་ཁྲིད་རིམ་ཀུན་ལ་གསན་པ་རེད། དབང་ལུང་དང་བཀའ་ལུང་ཀུན་ལ་རྗེས་གནང་ཐོབ། ཆུ་སྤྲེལ་ལོ་༼སྤྱི་རྩིས་༡༩༩༢༽ལ་སྣང་ཞིག་བླ་མ་བློ་གྲོས་བསྟན་འཕེལ་དང༌། དགེ་རྒན་ཤེས་རབ་དབང་རྒྱལ་རྣམ་གཉིས་གཙོ་བོ་བྱས་ནས་སེར་སྐྱ་ཀུན་གྱིས་མི་འགྱུར་གདོང་ལྔའི་ཁྲི་སྟེང་དུ་གསོལ་བ་ལགས། རྩ་བའི་ལྷ་གྲོགས་དམ་པ་རིན་སྤུངས་པ་འགའ་ཡིས་ཞབས་འདེབས་ཕུལ་པ་ནི། ཨེ་མ་ཧོ། ཤེས་བྱའི་གནས་ཀུན་མ་ལུས་མངའ་བརྙེས་པ། །རབ་འབྱམས་མཁས་མང་ཀུན་གྱི་སྲས་གཅིག་པོ། །མཁྱེན་བརྩེ་རྣམ་དག་འོད་ཟེར་ཀུན་ནས་སྤྱད། །རྣམ་སྤྲུལ་ཆེན་པོའི་ཞབས་ལ་གསོལ་བ་འདེབས། །གང་སྐུ་མི་འགྱུར་བསྐལ་བརྒྱར་རབ་བརྟན་ཞིང༌། །གཤེན་བསྟན་རྒྱལ་མཚན་སྲིད་མཐར་བསྒྲེང་གྱུར་ཅིག །ཅེས་ཤར་བ་ཁྲི་སྐྱང་གསུམ་དང༌། དགོན་ཁག་ལྔ། ཟིང་ཆུང་དགོན་ལག་བཅུ་གསུམ། རྔ་བ་སྣང་དགོན། ཇོ་བློ་དགོན། བབ་བཟོ་མདའ་ཆེན་དགོན། ཨ་བསམ་ཡས་དཀར་ཆག་ཆེན་མོཧད་སྐྱང་ཚང་དགོན། ཞང་ངུ་བསམ་འགྲུབ་དགོན། བབ་བཟོ་བསམ་འགྲུབ་དགོན། ཟིང་ཆུ་རྫོང་གི་ལས་བྱེད་པ་མང་པོ། རྒྱ་བོད་སྐྱ་སེར་ཀུན་གྱིས་བསྟོད་འབྲེལ་དང་བསྟོད་བསྔགས། གླུ་གར་བསྒྱུར་བ་དང་མཆོད་ཚོགས་འབུལ་བ། ཕྱག་འཚལ་བ། མོས་གུས་བྱེད་པ། རྔ་གཤང་དུང་གླིང་གི་དབྱངས་དགྱེས་པ། རོལ་མོས་བསུ་བ། བཀྲ་ཤིས་པའི་སྨོན་ལམ་བཏབ་པ། ལ་ལས་མར་མེ་འབུལ་བ། ལ་ལས་ཚན་ཆབ་འབུལ། ལ་ལས་སྤོས་བསང་འབུལ། ལ་ལས་ཞལ་ཟས་འབུལ། ལ་ལས་མེ་ཏོག་འབུལ། སྣང་ཞིག་གི་བླ་མ་གྲྭ་པ་མི་དམངས་ཚོགས་རྣམས་ཀྱིས་རྒྱལ་མཚན་བསྒྲེངས་ཤིང་སེང་གེ་དང་གར་འཆམ་རྩེད་དེ་མདུན་ནས་བསུས་པ་དང༌། དགོན་ཁག་གི་འཚོགས་འདུ་གྲྭ་པ་ཀུན་གྱིས་རྒྱབ་ནས་བསྐྱལ། རྟེན་འབྲེལ་སྨོན་ལམ་ཀུན་དགའ་འགྲུབ་པ་པ་དང༌། སྤྲུལ་པའི་སྐུ་མཆོག་དེ་སྐྱེ་བོ་ཀུན་གྱི་ཡིད་འོང་བས་གུས་བཀུར་ཆེན་པོར་བྱས་པའོ། །
ཤིང་ཕག་ལོ་༼སྤྱི་ལོ་༡༩༩༥༽ལ་གཡུང་དྲུང་གླིང་ཤེས་རབ་བསྟན་འཛིན་དང་ཀུན་བཟང་བློ་གྲོས་གཉིས་ཀྱི་ཞབས་དྲུང་དུ་སླར་ཡང་སྡོམ་པ་བླངས། བླ་མ་དང་གྲྭ་པ་ཀུན་ལ་རྒྱུ་ནོར་འབུལ་བ་དང་འཚོ་བ་དྲངས་ནས་ཁྲི་ལ་ཕེབས། དེ་དུས་བསྟོད་ཚིག་ཤོ་ལོ་ཀ་གཅིག་ཕུལ་ཡོད་ཀྱང་གྲྭ་པས་ཉར་ཚགས་མ་བྱས། གྲྭ་པའི་དགོན་གོང་འོག་གསུམ་ལ་ལེགས་པར་བཏང༌། ཡར་གཤེན་དར་ལྡིང་ལ་ཕེབས། གཤེན་སྲས་ནོར་བུ་དབང་རྒྱལ་སྐུ་མདུན་ནས་དབང་ལུང་མང་པོ་གསན། དེ་ནས་མར་གནམ་མཚོ་གསང་བ་གཡུ་རྩེ་རུ་ཕེབས། སྐྱེ་སྔོན་གྱི་རི་ཁྲོད་ལ་བཞེངས་གསོལ་བྱས། སྔོན་གྱི་སྦྱིན་བདག་རེ་འགའ་ལ་སྔོན་འཛིན་བྱས། ཡང་ཕ་ཡུལ་དུ་ཕེབས། ཚོགས་ཁང་ཆེན་མོ་ཚོན་མདངས་བརྒྱན། གླིང་བསྐོར་ལ་གསེར་འཁོར་བཞེངས། ལོ་ཕྱི་མ་ལ་ཡང་ལྷ་ས་ལ་ལན་གཅིག་ཕེབས། རི་ཁྲོད་གསང་བ་གཡུ་རྩེ་ནས་ལྷ་ཆ་མཆོད་རྫས་བླུས་པ་དང༌། གཟུགས་སྐུ་ཐང་ཀ་རེ་འགའ་བླུས་ཤིང་འགྲོ་དོན་མཛད་པའོ། །
མཐོ་ལྡན་ཞེས་པ་ཆུ་ཕོ་སྤྲེལ་གྱི་ལོ་༼སྤྱི་ལོ་༡༩༩༢༽ནས་བཟུང་སྤྲུལ་པའི་སྐུ་མཆོག་ཤེས་རབ་འོད་ཟེར་གྱི་སྐུ་དྲིན་གྱིས་སྣང་ཞིག་ཚོགས་ཁང་སྟེང་དུ་གསེར་ཏོག་དང་རྒྱལ་མཚན། མདུན་ཕྱོགས་སུ་རི་དྭགས་ཕོ་མོ་བོན་འཁོར་དང་ལྡན་པ། ནང་དུ་ཀ་སུམ་བཅུ་སོ་དྲུག་ལ་ཀ་ཚར་ཤིང་ལོ་པ་ཏྲ་འབྲུག་ཁྱུང་སེང་གེ་རྨ་བྱ་གྱད་ཤིང་སོགས་བཟོས་པ་དང་དུ་ཏྲི་སུ་ཡི་ལྷ་བྲང༌། བྱམས་ཁང་ལ་མི་མཐུན་གཡུལ་ལས་རྣམ་རྒྱལ་དང་ལྡན་པ་ལ་གསེར་དང་ཚོན་མདངས་སྣ་ཚོགས་ཀྱིས་མདངས་བྱུག་པ། ནང་རྟེན་དུའང་གསེར་གདུང་དངུལ་གདུང་ཆེན་མོ་དང་རྟེན་མཆོག་དངུལ་སྐུ་ཆེན་མོ་ལ་སངས་རྒྱས་ཀྱི་རིང་བསྲེལ་བཞུགས་ཡོད་པའི་རྟེན་མཆོག་ཁྱད་པར་ཅན་དང༌། སངས་རྒྱས་སྟོང་སྐུ་སོགས་སྐུ་གཟུགས་ཆེ་ཆུང་གྲངས་མང་དང༌། བཀའ་འགྱུར་ཚར་གཉིས་དང་བརྟེན་འགྱུར་ཚར་གཅིག རས་བྲིས་ཀྱི་ཐང་ཀ་ཆེ་ཆུང་གྲངས་མང༌། གསེར་དངུལ་གྱི་སྤོས་ཕོར། མནྚལ་བཞི། ཀོང་བུ་ཆེ་ཆུང་སོགས་གྲངས་མང༌། འཁར་རྔ་སྦུག་ཆལ་དུང་གླིང་འཕན་གདུགས་རྒྱལ་མཚན་སོགས་ལྷ་ཆ་དང་མཆོད་རྫས་སོགས་མང་པོ་བསྒྲུབས་པ། སྟེང་སྒྲུབ་ཁང་ལ། རྔ་གཤང་དུང་གླིང༌། ཆབ་ཀ་དྲག་པོའི་དཔལ་འབར་རམ་འབར་འབུམ་འབར་ལ་སོགས། དྲག་པོའི་བོན་བསམ་གྱིས་མི་ཁྱབ། ཡི་དམ་དབལ་ཕུར་ཞུང་གསུམ་སྐུ་བརྙན་བཀའ་སྐྱོང་ཀུན་གྱི་སྐུ་བརྙན་བྱིན་ཅན། གོས་དར་སྣ་ཚོགས་ཀྱི་སྙན་ཤལ་དང་རྟེན་མདུང་རྟེན་འཁོར་བཅས་ཡོད། མདུན་དུ་འཆམ་ར་དང་རྔ་གྲལ། གཡོན་དུ་ཇ་ཁང༌། བང་མཛོད་ཁང༌། འབྲུ་ཁང༌། སྣེ་ལེན་ཁང༌། ནང་དུ་འཚོགས་ཟངས་ཇ་བྲ་ཐུ་ཟ་ཐུ་ཐོམ་བཅས་གྲངས་མང་ཡོད། དགོན་པའི་ལྕགས་རིའི་ནང་དུ་ནང་ཆེན་བླ་བྲང༌། གྲྭ་ཁང༌། ནང་དུ་སྐུ་གསུང་ཐུགས་རྟེན་གྲངས་མང་ཡོད། ལྕགས་རི་ལ་ལག་འཁོར་ཆེ་ཆུང་དྲུག་བརྒྱ་ལྷག་ཙམ་ཡོད། ཞལ་འབག་དང༌། འཆམ་གོས། རྩེ་གྲ། ཕུར་པ་ཕྱག་མཚན་བཅས་ཆ་ཚང་བ། ལྕགས་རིའི་ཡར་ཟུར་དུ་ཤར་རྫའི་སྒྲུབ་གྲྭ་ཆེན་མོ་དང་གཡོན་དུ་དཔེ་ཁྲིད་ཁང༌། གཡས་སུ་སྒྲུབ་ཁང༌། ནང་དུ་སྐུ་བརྙན་སྣ་ཚོགས། རྔ་གཤང་དུང་གླིང་ཏམ་བུ་ར། ཐོ་ཕོ་སྨན་རག་ཡི་དམ་གྱི་དཀྱིལ་འཁོར་ཚོགས། བཀའ་སྐྱོན་མ་བདུད་བཙན་གསུམ་གྱི་སྐུ་བརྙན། གསུང་འབུམ་སོགས་ཡོད་པ། དགུང་གྲངས་སོ་གཉིས་ལ་༼སྤྱི་རྩིས་༢༠༠༢༽རང་ཉིད་ཀྱི་བླ་བྲང་གསར་བསྐྲུན་མཛད་པའོ། །
འཚོགས་མཁན་གྲྭ་པ་བརྒྱད་ཅུ་གྱ་དྲུག་ཡོད། ཧོར་ཟླ་དང་པོའི་ཚེས་བཞི་ནས་དྲུག་གི་བར་རྗེ་རིན་པོ་ཆེའི་འདས་མཆོད་དང༌། དགུ་ནས་བཅུ་གཅིག་བར་དུ་དབལ་གསས་སྒྲུབ་པ། ཉེར་བདུན་ནས་ཧོར་ཟླ་གཉིས་པའི་ཚེས་གཅིག་བར་དུ་མ་རྒྱུད་དང༌། བཅུ་གསུམ་ནས་བཅུ་དྲུག་བར་དབྱར་གནས་སྲུང་ལ། ཧོར་ཟླ་གསུམ་པའི་ཚེས་ཉེར་གསུམ་ཧོར་ཟླ་བཞི་པའི་ཚེས་གཅིག་གི་བར་དུ་ཏྲི་སུ་ཡི་སྒྲུབ་པ། ཧོར་ཟླ་ལྔ་པའི་ཚེས་ལྔ་ནས་བརྒྱད་བར་ལ་རྣམ་རྒྱལ་སྟོང་མཆོད། ཧོར་ཟླ་དྲུག་པའི་ཚེས་དགུ་ནས་བཅུ་གཅིག་གི་བར་དུ་ཀློང་རྒྱས་སྒྲུབ་པ། ཧོར་ཟླ་བརྒྱད་པའི་ཚེས་དྲུག་ནས་ཉེར་དགུ་བར་ལ་སྟག་ལྷའི་སྒྲུབ་པ། ཧོར་ཟླ་དགུ་པའི་ཚེས་བཅུ་བདུན་ནས་བཅུ་དགུ་བར་ལ་ཁྲོ་ཕུར། ཧོར་ཟླ་བཅུ་གཅིག་པའི་ཚེས་དྲུག་ནས་བརྒྱད་བར་ལ་སྐྱབས་མགོན་རིན་པོ་ཆེའི་འདས་མཆོད། ཧོར་ཟླ་བཅུ་གཉིས་པའི་ཚེས་ཉེར་བདུན་ནས་ཉེར་དགུའི་བར་ལ་དགུ་གཏོར་མཛད་པ་ལ་གྲྭ་པ་རྣམས་འཚོགས་སྒོ་ནི་སྤྲུལ་སྐུ་རིན་པོ་ཆེས་མཛད་པ་གསར་པ་བཙུགས་སོ། ། | 
