སྐྱང་དགོན་སློབ་དཔོན་བསྟན་པ་ཚུལ་ཁྲིམས་རིན་པོ་ཆེ་དགོངས་པ་ཞི་དབྱིངས་སུ་གཟིགས་རྗེས།
གཤེན་བསྟན་དྲི་མ་མེད་པ་ཀུན་ཌྷ་ཚལ།།
གངས་ལྗོངས་དབང་ཕྱོགས་ནོར་འཛིན་སྒེག་མོ་ལྟོར།།
ཚུལ་བཟང་ཁྲིམས་ཀྱི་ཟླ་འོད་ལ་བརྟེན་ནས།།
སྤེལ་མཁས་མཚུངས་མེདབཤེསགཉེན་དམ་པས་སྐྱོངས།།
ཁ་བའི་རྡུལ་མང་བརྩེགས་པའི་ལྷུན་པོ་བཞིན།།
རབ་དཀར་དྲི་མེད་མཚན་དཔེས་བརྒྱན་པའི་སྐུ།།
གཤེན་བསྟན་སྤེལ་བའི་ལང་ཚོ་མ་ཉམས་ཤིང་།།
གངས་ལྗོངས་མཁས་མང་རི་ཕྲེན་དབུས་ན་བརྗིད༎
རྨད་འབྱུང་མཁས་གྲུབ་བྱེ་བའི་གཙུག་རྒྱན་དུ༎
བསྔགས་འོས་དོན་མཐུན་རབ་འབྱམས་དགེ་བའི་བཤེས༎
མདོ་སྨད་ཤར་ཕྱོགས་དུང་རིའི་ཉེ་འདབས་སུ༎
ཡིད་འོང་མཚན་དཔེའི་ལང་ཚོ་མངོན་པར་བཞད༎
ཤར་ཕྱོགས་གསེར་སྦྱངས་ལྷུན་པོའི་ཕྲག་གོང་ནས།
མཚན་དཔེའི་དཀྱིལ་འཁོར་བསིལ་སྦྱིན་སྣང་བའི་འོད༎
སྐལ་ལྡན་ཀུན་ཌྷའི་དགའ་ཚལ་སྐྱོང་བའི་སླད༎
དེང་འདིར་ཤར་བའི་དགེ་མཚན་སྲིད་ན་འབར༎
བྱ་བྲལ་སྒོམ་ཆེན་གྲགས་པའི་ཀུན་སྤངས་པ༎
རང་བྱུང་བྲག་ཕུག་ལྷ་བའི་ཁང་བཟང་དུ༎
ཐོད་རྒལ་སྣང་བཞིའི་ཉམས་ལེན་ལ་བརྟེན་ནས༎
ཟག་མེད་འཇའ་ལུས་ཉེར་བཞིའི་དབྱིངས་བྲལ་ཟིན༎
བསླུ་མེད་ལྷ་ཡི་ཚད་མའི་བརྡ་ལུང་གིས༎
གང་ཞིག་ཡོངས་བསྔགས་དམ་པའི་སྐྱེས་བུ་ཆེ༎
རྣམ་གསུམ་བསྟན་པའི་མཛོད་འཛིན་བདག་གི་བཤེས༎
སྤྱི་གཙུག་བདེ་ཆེན་འཁོར་ལོའི་རྒྱན་དུ་རོལ༎
ཟབ་ཟབ་འཕྲུལ་ངག་གཡུང་དྲུང་བོན་གྱི་སྒོ༎
ཞིང་འདིར་་ཡང་ཡང་སྤེལ་བ་སྐྱབས་ཀྱི་མཆོག །
མཁས་མཁས་བསྟན་པ་ཚུལ་ཁྲིམས་གཡུང་དྲུང་རྗེ༎
བདག་གི་དུང་དུང་འབྲལ་མེད་སྤྱི་བོར་བསྟེན༎
མཁས་ཚང་བུ་དངོས་གནས་དེ་རིང་གི་རྩོམ་རྩལ་ཡར་ཐོན་འདུག་ད། ཧ་ཅང་གི་ཡག་པོ་འདུག ཡིན་ནའང་དག་ཆ་དང་ཚིག་སྦྱོར་རིགས་ལ་དོ་སྣང་ཆེ་བཞེས་གནང་གོ དེ་དེ་བཞིན་བྱས་ན་ཡུན་རིང་འགལ་ས་མ་རེད། མཁས་ཚང་གི་མིང་འཁྱེར་ན་འགྲི་ས་རེད། ཡར་ཐོན་ཡོང་ཆེད་དུ་བྲིས་པའོ།